बाजुरामा गहुँ उत्पादन २० प्रतिशतले घट्यो

A+ A A-

बाजुरा जिल्लामा बुधबार दिउँसो परेको पानीसँगैको असिनाले फलेको गहुँ चुटेर खेतमै झारेको छ । अर्कोतिर लगाएको वर्षे तरकारीका बेर्नामा समेत क्षति पुगेको छ । हरेक वर्ष भोकमरीको चपेटमा पर्ने बाजुरामा यस वर्ष गहुँको उत्पादनमा २० प्रतिशतले गिरावट आउने जिल्ला कृषि ज्ञान केन्द्रले जनाएको छ ।

‘लगातारको पानीका कारण हिउँदे सिजनका तरकारी आलु खेती र पाकिसकेको गहुँ कुहिएको छ । किसानले भित्र्याउँन पाएका छैनन् । यस पटको गहुँको उत्पादन कम्तिमा २० प्रतिशत उत्पादन घट्ने देखिएको छ’ कृर्षि ज्ञान केन्द्र बाजुराका कार्यालय प्रमुख गोविन्द सिजापतीले भने ।

सिजापतीका अनुसार बुधबार र यस अगाडि पटक-पटक परेको असिना पानीले लगाएको अन्नवालीमा क्षति पुर्‍याएको छ । पाकिसकेको गहुँ, जौलगायत हिउँदेवाली नै सखाप पारेको छ ।

जिल्लाको पुरा क्षेत्रफलको ९.२१ प्रतिशत खेतीयोग्य जमीन रहेको छ। सिँचित क्षेत्र १.४२ प्रतिशत मात्र रहेको छ । अर्थात ७.७९ प्रतिशत जमीनमा सिँचाइ सुविधा छैन । हरेक वर्ष खाद्यान्न असुरक्षित जिल्लाको परिचय बनाएको छ । बर्सेनि जिल्लालाई २८ हजार १ सय ५ मेक्ट्रिक्टन खाद्यान्न आवश्यक पर्छ । अहिले १५ हजार मेक्ट्रिकटन खाद्यान्न अपुग छ । नेपाल खाद्य संस्था, स्थानीय व्यापारी विश्व खाद्य कार्यक्रमलगायतबाट जिल्ला बाहिरबाट ढुवानी गरेर आवश्यकता पूरा हुँने गरेको छ ।

विगत १० दिनदेखि बाजुरामा असिना परिरहेको छ, बुधबार त धेरै आएको छ लगाएको सबै अन्नवाली सखाप पारेको बडिमालिका नगरापलिका–८ का किसान हर्क बडुवालले बताए । अन्नवालीसँगै तरकारीमा पनि क्षति पुर्‍याएको छ । पाक्ने बेला गहुँ नै असिनाले लिएपछि किसानहरू चिन्तित भएका छन् ।

‘अनिकालमा बिउँ जोगाउँनु संकटकालमा जिउँ जोगाउँनु भन्ने आहान थियो । यो दुवै एकैसाथ आउँदा थप समस्या भएको एकातिर कोरोनासँग विश्व लडिरहेको छ । अर्कोतिर हामीलाई असिना र पानीले पनि सताएको छ’ बडिमालिका नगरपालिका-७ का वडा अध्यक्ष धर्मराज पाध्यायले भने । उनका अनुसार बाजुराका अधिकांश भागमा पाक्न लागेको गहुँ, जौलगायतका अन्नबालीमा क्षति पुर्‍याएको छ ।

प्रकाशित मिति: बिहीबार, वैशाख २५, २०७७ १४:२२