७ मुलुकमा १ लाख २७ हजार नेपालीको भिसा सकियो

A+ A A-

७ मुलुकमा वैदेशिक रोजगारीमा रहेका १ लाख २७ हजार नेपाली कामदारको भिसाको म्याद सकिएको र अवैध कामदारलाई आममाफी दिएका कारण तत्काल नेपाल फर्नुकपर्ने देखिएको छ ।

वैदेशिक रोजगार विभागका कार्यकारी निर्देशक राजनप्रसाद श्रेष्ठका अनुसार अहिले प्रमुख रोजगारदाता मुलुकमा मलेसिया, कतार, साउदी अरब, यूएई, कुवेत, बहराइन र ओमानमा १३ लाख ४८ हजार नेपाली श्रमिक रहेका छन् । जसमध्ये १ लाख २७ हजारको म्याद सकिएर अवैध रूपमा रहेकालाई आममाफी भएको छ । कोभिड– १९ का कारण रोजगारी गुमाएर फर्कनेकाे संख्या थप २ लाख ८० हजार छ भने यी देशबाट मात्रै जम्मा ४ लाख ७ हजार जना फर्कन सक्ने विभागले जनाएको छ ।

कोभिड भाइरसका कारणले विभिन्न मुलुकमा रोजगारी गुमाएर फर्किने नेपालीको संख्या ४ लाख ७ हजारको हाराहारीमा रहेको आँकलन गरेका छौँ, प्रतिनिधिसभाअन्तर्गत अन्तर्राष्ट्रिय सम्बन्ध समितिको बुधबारको बैठकमा विभागका महानिर्देशक श्रेष्ठले भने ।

हवाई टिकट काटिसकेका र भिसा सकिएका कारण खाडी मुलुकमा अलपत्र परेकालाई पनि स्वदेश फर्काउनुपर्ने अवस्था रहेको महानिर्देशक श्रेष्ठले बताए । भारतबाहेकका मुलुकमा करिब १५ लाख जना वैदेशिक रोजगारीमा रहेका छन् ।

कुवेतमा ठूलो मात्रामा भिसा सकिएका नेपालीलाई आफ्नै खर्चमा पठाउने निर्णय कुवेत सरकारले लिए पनि त्यसको व्यवस्थापनको तयारी नगरेको भन्दै सांसदले आपत्ति जनाए । कांग्रेस सांसद पुष्पा भुसाल वैदेशिक राेजगारीमा रहेका सबै नेपाली फर्कन नचाहेको अवस्थामा समस्यामा परेका नेपालीलाई फर्काएर उचित व्यवस्थापन गर्नुपर्ने बताइन् ।

त्यस्तै, कांग्रेस सांसद दिव्यमणि राजभण्डारीले नेपालबाट विदेश जाने तर विदेशबाट त्यही जहाजमा समस्यामा परेका नेपालीलाई ल्याउन नसक्नु सरकारको कमजोरी भएको बताए ।

अस्ट्रेलियन नागिक बोकेर अस्ट्रेलिया उडान गर्ने जहाजले अस्ट्रेलियाबाट समस्यामा परेका नेपाली किन ल्याउन सक्दैन, विश्‍वका अन्य देशहरूले आफ्ना नागरिक १ जना बोक्नका लागि पनि जहाज पठाएका छन् । तर, सोही जहाजमा किन नेपाली ल्याउन सक्दैन ? यो सरकारको गैरजिम्मेवारिपन हो राजभण्डारीले भने ।

प्रकाशित मिति: बुधबार, वैशाख २४, २०७७ १४:५४