कोरोना जितेका भारतीय नागरिक भन्छन् : नेपाल सरकार र चिकित्सकको व्यवहारबाट सन्तुष्ट छौँ

कोरोना जितेका भारतीय नागरिक भन्छन् : नेपाल सरकार र चिकित्सकको व्यवहारबाट सन्तुष्ट छौँ

A+ A A-

भारतको नयाँदिल्लीका ३० वर्षीय अनुस जैदी २० दिनको उपचारपछि अस्पतालबाट आज बिहान डिस्चार्ज भए । कोरोना संक्रमण पुष्टि भएपछि गत वैशाख ५ गते उदयपुरको त्रियुगा नगरपालिका ३ भुल्केबाट विराटनगरको कोसी अस्पताल कोभिड-१९ उपचार केन्द्रमा भर्ना भएको २० दिनपछि डिस्चार्ज हुँदा उनी प्रफुल्ल थिए ।

कोभिड अस्पतालबाट डिस्चार्ज हुँदै गर्दा उनले पूर्णरूपमा ठीक भएको बताए । उनले भने, ‘ २० दिनको अस्पताल बसाइँबाट हामीले कोरोना परास्त गर्‍यौँ ।’

प्रदेश सरकार र चिकित्सकको व्यवहारबाट आफूहरू पूर्ण सन्तुष्ट भएको जैदीले बताए । लकडाउन खुलेपछि भारत जाने उनले बताए । ४ जना नेपालीसहित १६ जनाको टोली यात्रामा रहेका बेला कोरोना संक्रमण देखियो जैदीले भने, ‘हाम्रो रिपोर्ट पोजेटिभ आएपछि उदयपुर प्रशासनले विराटनगर पठायो ।’ अस्पतालमा चिकित्सकबाट राम्रो सेवा पाएको उनले बताए ।

जैदीसँगै बुधबार बिहान कोभिड-१९ अस्पतालबाट ६ जना भारतीय डिस्चार्ज भएका हुन् । डिस्चार्ज भएका सबैलाई प्रदेश सरकारले विराटनगर रानी मरकजमा निर्माण गरेको क्वारेन्टाइनमा लगिएको छ ।

गत वैशाख ५ र ६ गते उदयपुरबाट ल्याइएका १३ जना कोरोना संक्रमितमध्ये ६ जनामा तीन पटकसम्म स्वाव परीक्षण गर्दा नेगेटिभ रिपोर्ट आएको थियो । बुधबार बिहान डिस्चार्ज हुनेमा जैदीसहित २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्वद राशिद रहेका छन् ।

कोसी अस्पताल कोभिड १९ उपचार केन्द्रमा उपचाररत ३१ जना मध्ये ६ डिस्चार्ज भएपछि २५ जना उपचाररत रहेको अस्पतालका इन्चार्ज डा. दीपक सिग्देलले बताए । उनका अनुसार सबैको स्वास्थ्य अवस्था राम्रो छ ।

अकल्पनीय अवस्थाको सामाना गरिरहेका छौं : मन्त्री घिमिरे

कोभिड अस्पताल भर्ना भएको २० दिनपछि डिस्चार्ज भएका ६ जनालाई सामाजिक विकास मन्त्री जीवन घिमिरेले स्वास्थ्य लाभको कामना गरे । अस्पतालबाट डिस्चार्ज भएपछि आज बिहान स्वागत गर्दै उनले विश्वले नै अहिले अकल्पनीय परिस्थितीको सामना गरिरहेको बताए ।

प्रदेश सरकारले कोरोनाको सामना गर्नका लागि छुट्दै अस्पताल सञ्चालन गरि काम गरिरहेको उनले बताए । अस्पतालमा उपचाररत अन्यपनि छिट्टै डिस्चार्ज हुने उनले बताए । डिस्चार्जको प्रकृया शुरु भएको मन्त्री घिमिरेले बताए ।

कोभिड अस्पतालमा उपचाररत विरामीलाई अहिले सम्म ७२ जना स्वास्थ्यकर्मीले सेवा दिइसकेको उनले बताए । डिस्चार्ज भएकाहरू तत्काल स्वदेश फर्कन सक्ने अवस्था नभएकाले क्वारेन्टाइनको व्यवस्था गरि राखीएको उनले बताए ।

टिमवर्कले राम्रो काम गर्‍यो : मेसु मिश्रा

कोसी अस्पताल विराटनगरकी मेडिकल सुपरिटेन्डेन्ट डा. संगीता मिश्राले टिम वर्कले उपचार सफल भएको बताइन् । ६ जनालाई कोभिड अस्पतालबाट डिस्चार्ज गर्दै उनले आफू भाग्यमानी भएको बताइन् ।

‘बिरामीले चिकित्सकप्रति सन्तुष्ट छु भन्नु त्योभन्दा गर्व गर्ने अरू विषय हुँदैन’ उनले भनिन् । बिरामीले उपचारप्रति सन्तुष्ट हुँदै मस्जिद सम्म लगिदिनु भनेको उनले बताइन् । बिरामीको इच्छाअनुसार मस्जिदमा निर्माण गरिएको क्वारेन्टाईनमा पुर्‍याएको मेसु मिश्राले बताइन् ।

कोभिड-१९ अस्पतालबाट ६ जना डिस्चार्ज भएसँगै नेपालमा उपचारपछि निको भएर फर्कनेको संख्या २२ पुगेको छ । यद्पि ३ जनामा पुन: संक्रमणको लक्षण देखिएपछि अस्पतालमा भर्ना गरिएको छ । सनसिटीका १ जना र वीरंगजको नारायण अस्पतालमा उपचार गराएर फर्किएका २ जना पुनः संक्रमणको लक्षण देखिएपछि भर्ना गरिएको हो ।

२२ जना निको भएर फर्किए पनि ३ जनालाई पुन अस्पतालमा ल्याइएकाले संक्रमण मुक्त हुनेको संख्या १९ रहेको छ । अब ६३ जना अहिले उपचाररत रहेका छन् ।

प्रकाशित मिति: बुधबार, वैशाख २४, २०७७ १२:०३