कोरोना परीक्षण सुस्त, २४ घण्टामा २४ जनाको मात्रै परीक्षण

A+ A A-

सुदूरपश्चिममा कोरोना भाइरस (कोभिड–१९) को परीक्षणको गति सुस्त बनेको छ । थ्रोट स्वाबको नमूना नै संकलन नहुँदा कोरोना परीक्षण सुस्त बनेको हो ।

पीसीआर परीक्षण निकै कम संख्यामा भइरहेको सुदूरपश्चिममा र्‍यापिड टेस्ट गर्ने क्रम पनि घटेको छ । धनगढीमा स्थापना भएको कोरोना परीक्षण प्रयोगशालाको क्षमता अनुसार अहिलेसम्म परीक्षण हुन सकेको छैन ।

धनगढीको सेती प्रादेशिक अस्पताल र पशु अन्वेषण प्रयोगशालामा स्थापना गरिएको आरटीपीसीआर मेसिनको क्षमता अनुसार कोरोना परीक्षण हुन नसकेको हो । धनगढीमा स्थापना भएका कोरोना परीक्षण प्रयोगशालाको क्षमताअनुसार अहिलेसम्म परीक्षण हुन सकेको छैन् ।

सेती प्रादेशिक अस्पतालमा स्थापना भएको प्रयोगशाला मार्फत दैनिक १२ जना सम्मको परीक्षण गर्न सकिन्छ । तर, सो प्रयोगशाला भने महिना दिनदेखि नै बन्द रहेको छ । यस्तै धनगढीकै पशु अन्वेषण प्रयोगशालामा स्थापना गरिएको आरटीपीसीआर मेसिन मार्फत दैनिक दुई सय ७० जनाको परीक्षण गर्न सकिने क्षमता रहेको छ ।

सो मेसिनबाट पछिल्लो पाँच दिनमा ९७ जनाको मात्रै परीक्षण भएको छ । प्रयोगशालाका अनुसार अहिले दैनिक २० जनाको परीक्षण भईरहेको छ । तर, थ्रोट स्वाबको नमूना नै संकलन नहुँदा क्षमता अनुसार परीक्षण गर्न नसकिएको प्रयोगशालाले जनाएको छ ।

२४ घण्टामा २४ जनाको मात्रै कोरोना परीक्षण

सुदूरपश्चिममा २४ घण्टामा २४ जनाको मात्रै पीसीआर विधिबाट कोरोना परीक्षण गरिएको छ । धनगढीमा स्थापना गरिएको आरटीपीसीआर मेसिन मार्फत पछिल्लो २४ घण्टामा २४ जनाको मात्रै कोरोना परीक्षण गरिएको हो ।

पछिल्लो २४ घण्टामा एक सय ५७ जनाको र्‍यापिड टेस्ट पनि गरिएको छ । सुदूरपश्चिम स्वास्थ्य निर्देशनालय डोटीले दिएको जानकारी अनुसार नौ जिल्लाका एक सय ५७ जनाको र्‍यापिड टेस्ट गरिएको हो ।

२४ जनाको पीसीआर परीक्षण र एक सय ५७ जनाको र्‍यापिड टेस्ट गर्दा कसैमा पनि संक्रमण र एन्टिबडी नदेखिएको निर्देशनालयले दाबी गरेको छ । यस्तै आज थप परीक्षणका लागि १७ जनाको थ्रोट स्वाबको नमूना संकलन गरिएको छ भने अझै ५३ जनाको रिपोर्ट आउन बाँकी रहेको छ ।

स्वास्थ्य निर्देशनालयका अनुसार अहिलेसम्म सुदूरपश्चिम प्रदेशमा दुई हजार नौ सय १९ जनाको पीसीआरबाट कोरोना परीक्षण भएको छ भने १४ हजार चार सय एक जनाको र्‍यापिडटेस्ट भएको छ ।

पीसीआर परीक्षणमा पाँच जनामा कोरोना पोजेटिभ देखाएको थियो भने ¥यापिड टेस्टमा १० जनामा एन्टिबडी देखाएको थियो । १० जनाकै पीसीआर रिपोर्ट भने नेगेटिभ देखाएको थियो ।

१ सय १९ जना डिस्चार्ज

सुदूरपश्चिममा हालसम्म चार जना संक्रमितसहित आइसोलेसनमा राखिएकामध्ये १ सय १९ जनालाई डिस्चार्ज गरिएको छ । ९ जिल्ला रहेको प्रदेशका विभिन्न स्वास्थ्य संस्थामा बनाइएका आइसोलेसनबाट उनीहरुलाई डिस्चार्ज गरिएको हो ।

शंकास्पदलाई कोरोना रिपोर्ट नेगेटिभ आएपछि डिस्चार्ज गरिएको हो भने संक्रमितलाई दुई पटक सम्म रिपोर्ट नेगेटिभ आएपछि डिस्चार्ज गरिएको हो ।

प्रदेशमा सबैभन्दा बढी सेती प्रादेशिक अस्पतालबाट चार जना कोरोना संक्रमितसहित ४३ जना डिस्चार्ज भएका छन् । अछामको बयलपाटा अस्पताल र डडेल्धुरा अस्पतालबाट १४–१४ जना डिस्चार्ज भएका छन् ।

अछाम जिल्ला अस्पतालबाट ११, महाकाली अस्पतालबाट ८, डोटी जिल्ला अस्पतालबाट ६ जनालाई डिस्चार्ज गरिएको निर्देशनालयले जनाएको छ ।

बैतडी जिल्ला अस्पतालबाट र गोकुलेश्वर अस्पतालबाट ५–५, बाजुरा अस्पतालबाट ४, कैलालीको भजनी प्राथमिक स्वास्थ्य केन्द्रबाट तीन, चौमाला प्राथमिक स्वास्थ्य केन्द्र, टिकापुर अस्पताल, दार्चुलाको गोकुलेश्वर अस्पतालबाट २–२, बझाङ र बाजुराको कोल्टी प्राथमिक स्वास्थ्य केन्द्रबाट १–१ जनालाई डिस्चार्ज गरिएको जनाइएको छ ।

३ हजार चार सय ४० जना क्वारेन्टाइनमा

सुदूरपश्चिमका विभिन्न क्वारेन्टाइनमा तीन हजार चार सय ४० जना राखिएको छ । सुदूरपश्चिम स्वास्थ्य निर्देशनालय अहिले प्रदेशभरीका क्वारेन्टाईनमा ति व्यक्तिलाई राखेको जनाएको छ ।

तीन हजार एक सय ७५ पुरुष र दुई सय ६६ जना महिलालाई क्वारेन्टाइनमा राखिएको छ । प्रदेशभरी स्थानीय र प्रदेश सरकार तथा नेपाली सेनाले नौं हजार २९ जना अटाउने ३ सय ८० वटा क्वारेन्टाईन स्थापना गरेका छन् ।

४ जनाले जिते कोरोनालाई

सुदूरपश्चिममा कोरोनाको संक्रमण देखिएका ४ जनाले कोरोना जितेर घर फर्किएका छन् । कोरोना संक्रमित धनगढी उपमहानगरपालिका–५ का ३४ वर्षीय युवक, लम्कीका २१ वर्षीय युवक, लम्कीकै ६५ वर्षीय महिला र कञ्चनपुरको वेदकोटका ४१ वर्षीय पुरुष कोरोनालाई जितेर घर फर्किसकेका छन् ।

प्रकाशित मिति: बुधबार, वैशाख २४, २०७७ ११:१९