कोरोना महामारी व्यवस्थापनमा केन्द्रित डडेल्धुरा प्रहरी

A+ A A-

कोरोना भाइरस संक्रमणको सन्त्रासका कारण सरकारले सिंगो देश नै लकडाउन गरेको छ । दिनप्रतिदिन कोरोना संक्रमितको संख्या बढ्दै जाँदा सरकारले लकडाउन अवधी थप्दै गएको छ । लकडाउनको यो समयमा धेरै ठाउँमा आपराधिक घटना बढेको गुनासो पनि सुनिदै छन् ।

तर, लकडाउन लम्बिदै जाँदा डडेल्धुरामा भने आपराधिक कृयाकलापमा कमी आएको छ । अपराधिक कृयाकलाप घटदै गएपछि डडेल्धुरा प्रहरी कोरोना महामारी व्यवस्थापनमा केन्द्रित भएको छ ।

जिल्लामा अपराधिक कृयाकलापहरु घटदै गएपछि डडेल्धुरा प्रहरी कोरोना महामारी व्यवस्थापनमा केन्द्रित भएको डडेल्धुराका प्रहरी नायव उपरीक्षक दधिराम न्यौपानेले जानकारी दिए ।

जिल्ला प्रहरी कार्यालय र मातहतका प्रहरी इकाईमा दिनहुँजसो घरेलु हिंसा, जर्बजस्ती करणी, कुटपिट, ठगी, चोरीजस्ता बिभिन्न अपराधिक कृयाकलापहरुको उजुरी दर्ता हुने गरेकोमा लकडाउन अवधीमा अपराधिक कृयाकलाप घटदै गएको उनले जानकारी दिए ।

‘पछिल्ला दिनमा प्रहरीमा अपराधिक कृयाकलापसँग सम्बन्धि उजुरी दर्ता हुन छाडेको छ । अपराधिक कृयाकलाप घट्दै गएपछि कोरोना महामारी रोकथाम तथा व्यवस्थापनका लागि प्रहरी केन्द्रित छ।’ उनले भने, ‘कोरोना भाइरस संक्रमित ब्यक्तिको मृत्यु भएमा मृतकको शव व्यवस्थापन गर्नेसम्बन्धी तालिम पनि प्रहरीलाई दिएका छौँ ।’

कोरोना संक्रमित मृतकको शव व्यवस्थापनसम्बन्धी तालिम

जिल्ला प्रहरी कार्यालय डडेल्धुराको आयोजनामा कार्यालयमा कार्यरत प्रहरी कर्मचारीहरु मध्ये प्रहरी नायव निरीक्षकको कमाण्डमा १० जना प्रहरीको टोलीलाई कोरोना महामारीबिरुद्धको कार्य योजना र कोरोना संक्रमणबाट बन्दीगृहमा मृत्यु भएका मानिसहरुको शव ब्यवस्थापन गर्ने सम्बन्धि तालिम सम्पन्न गरिएको हो ।

स्वास्थ्य कार्यालय डडेल्धुराका प्रमुख आशुतोष श्रेष्ठ, डडेल्धुरा अस्पतालका चिकित्सकहरु प्रहरी प्रमुख डीएसपी न्यौपानेले तालिमको सहजीकरण गरेका थिए । कोरोना महामारीबाट मृत्यु हुनेहरूको शव समयमै व्यवस्थापन गर्न नसके थप संकट सिर्जना हुनसक्ने भएकाले समयमै सतर्कता अपनाउन प्रहरीलाई सो विषयमा प्रशिक्षण दिइएको हो ।

प्रहरी नायव उपरीक्षक न्यौपानेका अनुसार कोरोनाको महामारी बढ्दै गएमा प्रहरी उच्च जोखिममा रहने भएकाले कोरोना संक्रमितको शव व्यवस्थापनका लागि प्रहरीलाई यस विषयमा प्रशिक्षण दिइएको हो ।

कार्यक्रममा सुरक्षितरूपमा शव व्यवस्थापनका लागि अपनाइनुपर्ने उपायबारे प्रस्तुतीकरण गरिएको स्वास्थ्य कार्यालय डडेल्धुराका प्रमुख श्रेष्ठले बताए। शव व्यवस्थापन गर्दा पीपीई लगाउने, शव बोक्ने सामग्री र सवारीसाधनलाई स्यानिटाइज गर्ने, परिवार तथा समुदायलाई टाढै राखेर शव व्यवस्थापन गर्नेलगायतका विषयमा डडेल्धुरामा कार्यरत प्रहरीकर्मीलाई प्रशिक्षण दिइएको हो।

यसवाहेक जिल्ला प्रहरी कार्यालय डडेल्धुराले पछिल्ला दिनहरुमा समुदायस्तरमा कोरोना महामारीबारे जनचेतना जगाउने र सरकारले जारी गरेको लकडाउनको प्रभावकारिता बढाउन विशेष भूमिका निर्वाह गरिरहेको डडेल्धुराका प्रमुख जिल्ला अधिकारी जगन्नाथ पन्तले जानकारी दिए। उनले कोरोना महामारी रोकथाम, नियन्त्रण र व्यवस्थापनमा प्रहरीले महत्वपुर्ण भूमिका निर्वाह गरिरहेको बताए ।

प्रकाशित मिति: मंगलबार, वैशाख २३, २०७७ १७:०३