जंगलमा गाडेको अवस्थामा भेटियाे वीणाको शव, श्रीमान् भन्छन् : आवेशमा हत्या गरेँ

जंगलमा गाडेको अवस्थामा भेटियाे वीणाको शव, श्रीमान् भन्छन् : आवेशमा हत्या गरेँ

A+ A A-

धनुषामा श्रीमानले श्रीमतीको हत्या गरेर जंगलमा गाडेको ४ दिनपछि शव फेला परेको छ । धनुषाको मिथिला नगरपालिका- ९, लालभिट्टीका २८ वर्षीय हरि चौहानले कान्छी सालीसँगको प्रेम सम्बन्धका कारण श्रीमतीको हत्या गरेका छन् । उनले २५ वर्षीया पत्नी वीणा चौहान लामाको हत्या गरेको प्रहरीले जनाएको छ ।

श्रीमतीले तिम्रो अवैध सम्बन्ध मेरो बहिनीसँग छ, तिमी जहिले नि ढिलो गरी घर आउँछौ भनेर मानसिक यातना दिँदै आएकाले आवेशमा आएर हत्या गरेको प्रारम्भिक अनुसन्धानका क्रममा देखिएको प्रहरीले जनाएको छ ।

उनले वीणालाई बलो काट्ने बहानामा लालगढ सामुदायिक वनस्थित मगर्नी खोलामा लगेर सलले घाँटी बेरेर हत्या गरी शवलाई जंगलमै गाडेको अवस्थामा प्रहरीले ४ दिनपछि उत्खनन गरेर निकालेको हो ।

१८ वैशाख बिहीबार साँझ करिब साढे ५ बजेको समयमा वीणालाई बलो काट्न जंगल जाऔँ भन्दै त्यहाँ लगेर घाँटीमा लगाएको सलले बेरेर उनको हत्या गरी शवलाई जंगलमै गाडेको बयान चौहानले प्रहरी समक्ष दिएको प्रहरीले जनाएको छ ।

हत्या गर्नुअघि नै चौहानले खाडल खनी तयार पारेर राखेको प्रहरी अनुसन्धानबाट खुलेको छ । ‘हत्या गर्नुअघि खाडल खनेर तयार बनाएको रहेछ’, इलाका प्रहरी कार्यालय ढल्केवरका प्रहरी निरीक्षक तीर्थ कार्कीले भने, ’वीणालाई जंगलमा लगेर हत्या गरी खाडलमा गाडिएछ । घटना योजनावद्ध तरिकाले भएको देखिन्छ ।’ पेसाले गाडी चालक रहेका चौहानले १९ वैशाखका दिन बिहान पत्नी हराएको भन्दै प्रहरी समक्ष मौखिक जानकारी गराएका थिए ।

५ वर्षअघि वीणासँग अन्तरजातीय विवाह गरेकाले बुबाआमाले घरमा बस्न नदिएपछि ससुरालीको छेउमै आफ्नो घर बनाएर बस्दै आएका उनको करिब १ वर्षदेखि कान्छी साली गंगा लामासँग एकतर्फी प्रेम रहेकाले पत्नीको मानसिक यातना सहन नसकेर उसले वीणाको हत्या गरेको देखिएको छ’, घटनास्थल पुगेर फर्किएका प्रहरी निरीक्षक कार्कीले भने, ‘श्रीमानले योजनावद्ध तरिकाले श्रीमतीको हत्या गरी आफ्नो साथी गोपाल श्रेष्ठलाई फोन गरी घटनाका सम्बन्धमा जानकारी दिएको प्रारम्भिक अनुसन्धानले देखाएको छ ।’

खाडलमा पुरिएको शवलाई प्रहरी निरीक्षक कार्कीको नेतृत्वमा गएको प्रहरी टोलीले आइतबार साँझ उत्खनन गरेको हो । सडेको अवस्थामा भेटिएको शवलाई पोस्टमार्टमका लागि प्रादेशिक अस्पताल जनकपुरधाम ल्याइएको छ ।

हत्या अभियोगमा चौहानलाई पक्राउ गरी म्याद थपका लागि जिल्ला अदालतमा पठाइएको छ । घटनाको थप अनुसन्धान भइरहेको प्रहरीले जनाएको छ । मृतक वीणाको ४ वर्षकी १ छोरी र साढे २ वर्षका १ छोरा छन् ।

प्रकाशित मिति: सोमबार, वैशाख २२, २०७७ १४:३०