युनियन हाइड्रोपावर: २०८० सम्म लाभांशको आशा छैन

A+ A A-

जलविद्युत कम्पनीले साधारण शेयर जारी गर्ने क्रम बढ्दो छ | पछिल्लोपटक युनिभर्सल पावर कम्पनीको शेयर सूचीकरण भएको छ | यसैक्रममा लमजुङमा निर्माण भएको मिदिम खोला जलविद्युत आयोजनाले शेयर जारी गर्न लागेको छ |

विषय	विवरण
जारी पूँजी	७५ करोड
जारी हुने कित्ता	३५ लाख ३४ हजार ३ सय ४०
कर्मचारीलाइ आरक्षित	७० हजार ६ सय ८६
सामुहिक लगानी कोषलाई आरक्षित	१ लाख ७६ हजार ७ सय १७
सर्वसाधारणमा जारी हुने वास्तविक कित्ता	३२ लाख ८६ हजार ९ सय ३७
आयोजनाको कुल लागत	७९ करोड ५० लाख
प्रतिमेगावाट लागत	२६ करोड ५० लाख
जडित क्षमता	३ मेगावाट
व्यापारिक उत्पादन मिति	२०७४ माघ १० गते
प्रतिशेयर नेटवर्थ (आव २०७४/७५)	रु. ७९.८२
मूल्य वृद्धि	व्यापारिक उत्पादन भएका मितिले एक वर्ष पुगेको महिनाको लगत्तै पछिको महिनादेखि लागु हुनेगरी प्रत्येक वर्ष ३% का दरले ५ पटक तर उत्पादन ३४ महिना ढिला भएको हुँदा २ पटक मात्र पाउने \|
व्यापारिक उत्पादन शुरु भएको २५औं महिनादेखि पूर्ण अवधिसम्मको बिक्री दर	हिउँदमा ८.४० रुपैयाँ र वर्खामा ५.०९ रुपैयाँ
वार्षिक उर्जा	१ करोड ६७ लाख ७६ हजार २१ युनिट
हिउँद	२८ लाख ४९ हजार १ सय १२ युनिट
वर्खा	१ करोड ३९ लाख २६ हजार ९ सय १० युनिट
आवेदन खुल्ने मिति	२०७५ चैत १३ गते
आवेदन दिने अन्तिम मिति	छिटोमा चैत १७ गते ढिलोमा २०७६ बैशाख १२
अधिकतम आवेदन गर्न सकिने कित्ता	३५,००० कित्ता
न्यूनतम आवेदन गर्न सकिने कित्ता	५० कित्ता
रेटिंग	इक्राएनपि आइपिओ ग्रेड ५

पूँजीको उपयोग

कम्पनीले प्राथमिक निष्काशनबाट प्राप्त हुने रकम उपयोग निम्न शीर्षकमा गर्ने उल्लेख गरेको छ |

शिर्षक	रकम
कम्पनीको आर्थिक वर्ष २०७४/७५ को लेखापरीक्षण प्रतिवेदन तथा असोज मसान्तसम्मको प्रोभिजनल प्रतिवेदन अनुसार भुक्तानी गर्नुपर्ने दायित्व अन्तर्गतका शीर्षकहरु लेखापरीक्षण शुल्क, कर कट्टी रकम, कर्मचारीलाई तिर्नुपर्ने तलव तथा भत्ता, संचालन खर्च तिर्नुपर्ने बाँकी रहेको रकम विद्युत विकास विभागलाई तिर्नुपर्ने रोयल्टी, हाई हिमालय हाइड्रो प्रालि निर्माण कम्पनी तथा बाँकी रहेको दायित्व रकम आदिमा उपयोग गरिने	१०,२९,०८,०२८
बैंक ऋण भुक्तानी	२५,०५,२५,९७२
जम्मा	३५,३४,३४,०००

प्रक्षेपण अनुसार २०८० माघसम्ममा बैंक ऋण तिरिसकिने उल्लेख गरेको छ | बैकबाट लिईएको ४० करोड ऋणमध्ये माघ मसान्तसम्म १५ करोड रुपैयाँ तिरिएको उल्लेख गरिएको छ |

नाफा-नोक्सान

कम्पनीले गत वर्ष माघबाट व्यापारिक उत्पादन शुरु गरेको थियो | आर्थिक वर्ष २०७४/७५ मा २ करोड ८१ लाख रुपैयाँको विद्युत बिक्री गरेको छ | बिजुली बिक्री गरे पनि कम्पनी संचालन घाटामा छ | २०७४/७५ को लेखापरीक्षण भएको वित्तीय प्रतिवेदन अनुसार कम्पनी ७ करोड ७४ लाख रुपैयाँ संचित घाटामा छ |

असोज मसान्तमा आइपुग्दा संचित घाटा अझ बढेर झन्डै ८ करोड रुपैयाँ पुगेको छ | निर्धारण गरिएको समय भन्दा ३४ महिना ढिलो व्यापारिक उत्पादन भएकोले नेपाल विद्युत प्राधिकरणलाई १ करोड ३० लाख रुपैयाँ क्षतिपूर्ति तिर्नुपरेको हुँदा कम्पनीको संचित नोक्सान बढेको हो |

पछिल्लो विवरण अनुसार असोज मसान्तसम्ममा २ करोड ५१ लाख रुपैयाँको बिक्री आम्दानी गरेको छ | असोज मसान्तमा २४ लाख रुपैयाँ संचालन घाटा भएको छ | यसरी त्रैमासिक रुपमा संचालन घाटा बढ्दै जाँदा संचित नोक्सान बढ्ने क्रम बढेको छ |

प्रक्षेपित नाफा-नोक्सान

चालु आर्थिक वर्ष २०७५/७६ मा कम्पनीको बिक्री आम्दानी ५ करोड ८५ लाख रुपैयाँ हुने प्रक्षेपण गरे पनि करिब १ करोड रुपयाँ संचालन घाटा हुने अनुमान कम्पनीले नै गरेको छ | यसले संचित नोक्सानलाई अझ बढाउने छ | तर, आर्थिक वर्ष २०७६/७७ मा भने ८ करोड ३७ लाख रुपैयाँ बिक्री आम्दानी गर्ने हुँदा उक्त साल २ करोड ८७ लाख रुपैयाँ खूद नाफामा जाने प्रक्षेपण गरेको छ |

आव २०७७/७८ मा बिक्री आम्दानी बढेर ८ करोड ५२ लाख रुपैयाँ पुग्ने प्रक्षेपणको आधारमा ३ करोड ५२ लाख रुपैयाँ खूद नाफा हुने प्रक्षेपण गरिएको हो | बिक्री आम्दानी बढेर खूद नाफा देखिए पनि कम्पनीको संचित घाटा पुरा नहुने हुँदा आव २०७७/७८ पनि कम्पनी धनात्मक नेटवर्थमा आउन नसकी ऋणात्मक नै रहनेछ | आव २०७७/७८ मा कम्पनीको नेटवर्थ ९६ रुपैयाँ ८९ पैसा कायम हुनेछ |

प्रक्षेपण र वास्तविकता

कम्पनीले निर्धारित समयमा व्यापारिक उत्पादन गर्न नसकेकोले नेपाल विद्युत प्राधिकरणलाई क्षतिपूर्ति तिर्नुपरेको हुँदा आम्दानीको हिस्सा यतातिर खर्च भएको छ | त्यस्तै बेलैमा व्यापारिक उत्पादन नहुँदा आधार मूल्यमा ५ पटक पाउने मूल्यवृद्धि पनि २ पटक मात्र पाउने भएको छ | यसले कम्पनीको दीर्घकालीन आम्दानीलाई असर पारेको छ |

हिउँदमा प्राप्त हुने उर्जाले कम्पनीको आम्दानीलाई थप टेवा दिने भए पनि हिउँदमा थप उर्जा प्राप्त हुनसक्ने स्थिति विवरणपत्रमा उल्लेख गरिएको छैन | प्रक्षेपणलाई आधार मान्ने हो भने आगामी २०७८/७९ मा कम्पनी संचित घाटा पुरा गरेर धनात्मक नेटवर्थमा जानेछ | कम्पनी धनात्मकमा आएपनि लाभांश बाँड्न सक्ने स्थिति भने देखिन्न |

लगानी निर्णय

कम्पनीले प्रकाशन गरेको विवरणपत्रको आधारमा यो विश्लेषण गरिएको हो | यो विश्लेषणले लगानी गर्न वा नगर्न कुनै सल्लाह दिंदैन | शेयर लगानी लाभांश बाहेक शेयर बजारमा हुनसक्ने मूल्य उतार चढावबाट पनि लाभ लिन सकिने हुँदा अर्को पाटो पनि रहन्छ |

प्रकाशित मिति: बुधबार, चैत १३, २०७५ ०२:२३