अतिक्रमित टहरा हटाउँदै डिभिजन वन कार्यालय डडेल्धुरा

A+ A A-

लकडाउनको मौका छोपी अतिक्रमण गरी सामुदायिक र राष्ट्रिय वनमा अवैधरूपमा निर्माण गरिएका टहरा भत्काइएका छन् ।

डिभिजन वन कार्यालय डडेल्धुराको सक्रियतामा जिल्लाका विभिन्न स्थानमा निर्माण गरिएका दर्जन बढी घर तथा टहरा भत्काइएको कार्यालय प्रमुख विष्णुप्रसाद आचार्यले जानकारी दिए ।

वन अतिक्रमणसँगै काठ तस्करी बढेपछि वन कार्यालयले निगरानीसमेत बढाएको छ । लकडाउनका समयमा चुरे र महाभारत वन क्षेत्रमा अक्रिमणसँगै काठ तस्करी हुन थालेपछि भित्रिमधेशको चुरे तथा माहाभारत वनक्षेत्रमा निगरानी बढाइएको हो ।

निगरानीको समयमा अवैधरूपमा निर्माण गरिएका घर, टहराका साथै अतिक्रमण जग्गा र काठसहित केही व्यक्तिलाई पक्राउसमेत गरेको वन कार्यालय प्रमुख आचार्यले बताए ।

उनका अनुसार पक्राउ परेका व्यक्ति तथा समूहलाई वन ऐन अनुसारको कारवाही गरिने छ । अक्रिमण गरेको जग्गाबाट अतिक्रमणकारीलाई हटाउनुका साथै घर तथा टहरा निर्माणमा लगाएको काठसमेत बरामद गरिएको छ ।

आलिताल गाउँपालिका–४ को जालटुडाँको सालका १८ थान कडी १०.५ घन फिट, वडा नं. ६ को बसन्त हरियाली सामुदायिक वनभित्र गस्ती निरीक्षणको क्रममा साल र सल्लोको ६० थानको ५९.९३ घन फिट चिरान काठ बेवारिसे अवस्थामा बरामद गरिएको डिभिजन प्रमुख आचार्यले बताए।

त्यस्तै, परशुराम नगरपालिका–८ को सुन्दरी सामुदायिक वनमा नयाँ र पुराना गरी १० वटा काठका गोलिया (५२.८ घन फिट) बरामद गरिएको छ। भित्रिमधेशको आलिताल र जोगबुढा क्षोत्रमा वन अतिक्रमण तथा काठ चोरी गर्नेको संख्या बढेसँगै वन कार्यालयले निगरानीसमेत बढाएको छ।

वनलाई सुरक्षित राख्न स्थानीय उपभोक्ता र समुदायका मानिसले सहयोग गरे मात्रै वन जोगाउन सकिने वन संरक्षणकर्मी बताउँछन् ।

प्रकाशित मिति: सोमबार, वैशाख २२, २०७७ ०९:३७