नेकपा (विप्लव) लाई ९ धक्का

A+ A A-

सरकारले नेत्र बिक्रम चन्द (विप्लव) नेतृत्वको नेकपाका गतिविधिमा प्रतिवन्ध लगाएको १५ दिन नपुग्दै पार्टीले सरकारका तर्फबाट ९ बटा ठुला धक्का व्यहोरेको छ ।

प्रधानमन्त्री केपी शर्मा ओलीले चैत मसान्तभित्रै विप्लव नेतृत्वको पार्टी ( सरकारको भाषामा समुह) का गतिविधि नियन्त्रण गरिसक्ने उद्घोष गरिसकेको छ । सरकारले विप्लवका गतिविधि नियन्त्रणमा लिने भनेको १५ दिन नपुग्दै उसका ९ जना ठुला नेता पक्राउ परेका छन् ।

पक्राउ पर्नेमा अधिकांश पार्टीका व्युरो सदस्य र जिल्ला इन्चार्ज छन् । विप्लवका सबै भन्दा विश्वाशिला पात्र हेमन्तप्रकाश वली गत ९ चैत राती काभ्रेबाट गिरफ्तार भए । उनी पार्टीको स्थायी समिति सदस्य हुन । अहिलेसम्म गिरफ्तार पर्नेमा पदीय हैसियतमा यी सबै भन्दा ठूलो नेता हुन ।

उनी विप्लवको सैद्धान्तिक नेताको रुपमा बुझिन्छन् । दर्शन, राजनीति, विचारको राम्रो ज्ञान भएको मानिने वली पक्राउ पर्नुभन्दा दुई दिन पहिला भाग्न सफल भएका थिए । दोस्रो पटक भने उनी पक्राउ पर्नबाट बच्न सकेनन् । पछिल्लो समयमा उनले पार्टी प्रवक्ताकोसमेत जिम्मेवारी सम्हालिरहेका थिए । उनी मध्य कमाण्डको इन्चार्ज हुन । उनी पार्टीका अन्य आठ जना कार्यकर्ता पनि गिरफ्तारीमा परेका छन् । मोहन कार्की ‘जीवन्त’ पोलिट ब्युरो सदस्य पनि गिरफ्तारमा परेका छन् । उनी गत १ चैतमा गिरफ्तार परेका हुन् । पार्टीका गतिविधिमाथि प्रतिबन्ध लगाएपछि गिरफ्तार हुने कार्की पहिलो नेता थिए ।

उनी ललितपुरको आफ्नै डेराबाट गिरफ्तारीमा परेका हुन । उनले मध्यकमाण्ड अन्र्तगत रहेकर काम गर्ने गरेको विप्लव नेतृत्वको पार्टीका नेता बताउँछन् । उनी यो भन्दा पहिला अर्का पोलिटब्युरो सदस्य कृष्ण धमलासहित थानकोटबाट १० साउनमा गिरफ्तारीमा परेका थिए । अदालतले रिहा गर्ने आदेश दिएपनि प्रहरीले उनलाई अदालत परिसरबाट गिरफ्तार गरेर संखुवासभा लगेको थियो । गत भदौमा मात्र उनी रिहा भएका थिए । अहिलेसम्म गिरफ्तारी पर्नेमा विप्लव नेतृत्वको नेकपाका उनी दोस्रो ठूलो नेता हुन ।

विजय श्रेष्ठ नेकपाको केन्द्रीय सदस्य हुन । उनी पश्चिम ताम्सालिङको इन्चार्ज हुन । उनीपनि काभ्रेबाट वलीसँगै पक्राउ परिसकेका छन् । कोशी ब्युरो संयोजक घनश्याम श्रेष्ठ ‘पुस्कर’लाई पनि प्रहरीले १० चैत राती मोरङबाट गिरफ्तार गरेको बताएको छ । उनी पूर्वी कमाण्ड अन्र्तगतको कोशी ब्युरो संयोजक हुन ।

शंकर अधिकारी पनि काभ्रेबाट वलीसंगै गिरफ्तारीमा परेका अर्का नेता हुन् । अधिकारी केन्द्रीय सदस्य हुन । उनी गिरफ्तार हुदा रौतहट जिल्लाको इन्चार्ज थिए । उनी काठमाण्डौबाट ३० हजार रुपैयाँ भाडा तिरेर स्कारपियो गाडी लिएर काभ्रे जाने क्रममा प्रहरीले पछ्याउदै पक्राउ गरेको हो । गाडि भाडामा लिएको ठाउँबाट नै प्रहरीले पिछा गरेको सुरक्षा निकायका उच्च अधिकारी बताउँछन् । स्कारपियो लाई प्रहरीले काभ्रेको खानीखोला–९ मा घेरा हालेर ९ जनालाई नै गिरफ्तार गरेको थियो ।

नेकपा विप्लवको भातृ संगठन अखिल नेपाल किसान महासंघ (क्रान्तिकारी) का संयोजक राजु कार्कीलाई भने प्रहरीले २१ फागुनमा काठमाडौको सामाखुसीबाट गिरफ्तार गरेको थियो । कार्कीलाई ११ चैतमा जिल्ला अदालतले ८ हजार धरौटीमा रिहा गरेपनि प्रहरीले अदालत परिसरबाटै पुन गिरफ्तार गरेको हो । पार्टीको महिला संगठन अध्यक्ष बन्धु चन्दलाई ११ फागुनमा अछामको बिनायक नगरपालिकाबाट प्रहरीले गिरफ्तार गर्यो । उनी पार्टीको केन्द्रीय सदस्य हुन ।

पार्टीको भातृ संगठन जनपरिषद कालिकोटका प्रमुख तथा भेरी कर्णालीका बुद्धिजीवी परिषदका इन्चार्ज धनराज शाहीलाई १० चैतमा कालिकोटको रातागामबाट प्रहरीले गिरफ्तार गरेको छ । सुर्य भुजेल पनि ११ फागुनमा काठमाडौको कलंकीबाट गिरफ्तारीमा परिसकेको छन् । उनी हेमन्तप्रकाश वलीको सचिवालयमा रहेर काम गरिरहेका थिए । उनी नेकपाको उपत्यका ब्युरो सदस्य रहेको प्रहरीले जनाएको छ ।

नेकपा विप्लव निकट क्रान्तिकारीका सचिवालय सदस्य पुष्पबहादुर न्यौपानेलाई २९ फागुनमा सुर्खेतबाट प्रहरीले गिरफ्तार गरेको छ । प्रहरीले कोसी ब्युरो सदस्य माधव गौतमलाई पनि १० चैतमा मोरङबाट गिरफ्तार गरेको छ । गौतमलाई इन्चार्ज श्रेष्ठसँगै गिरफ्तार गरेको प्रहरीले जनाएको छ ।

११ चैत राती नवलपरासी जिल्ला इन्चार्ज सुमन ज्ञवालीलाई पनि प्रहरीले गिरफ्तार गरेको छ । उनीसहित अर्का जिल्ला सदस्य धनबहादुर मर्दनियालाई उनकै घरबाट गिरफ्तार गरेको नवलपरासी प्रहरीले जनाएको छ । मर्दनियालाई उनकै घर कावासोतीको सेरगन्जबाट गिरफ्तार गरेको प्रहरीले जनाएको छ ।

प्रकाशित मिति: मंगलबार, चैत १२, २०७५ २३:३९