लकडाउनकाे माझमा बाजुरा भित्रिए दुई हजार मानिस

भारतको धार्चुलाबाट आएकाहरू बाजुरा सदरमुकामको बस पार्कमा, फोटोः निमेन्द्र शाही

A+ A A-

सरकारले गरेको लकडाउनको माझमा बाजुरा जिल्लामा दुई हजारभन्दा बढी मानिस भित्रिएका छन् । शनिबार मात्र भारतको धार्चुलाबाट ८४ जना जिल्ला भित्रिएका छन् । एकसाथ ठूलो संख्यामा आएकाले उनीहरू बाजुराको सदरमुकामा अलपत्र परेका छन् । उनीहरूलाई बिहानको खाना खुवाएको हाडबजार व्यवस्थापन समितिले घर पठाउन स्थानीय सरकारसहित सरोकावालासँग समन्वय गरिरहेको छ ।यसरी आएकाहरूमा हुम्लाका ३० जना, मुगुका २६, सुर्खेतका ४ र दैलेखका २ जना छन् । मार्तडी हाटबजार व्यवस्थापन समितिका अध्यक्ष चक्रबहादुर मल्लका अनुसार उनीहरूलाई घर पठाउन आवश्यक समन्वय भइरहेको छ ।भारतमा ३५ दिन सीमा क्षेत्रको क्वारेन्टाइनमा बसेर घर फर्केको बताउने धनलाल भियालले भने, ‘हामी घर आउने भनेर आएका थियौं, हामी सिमानामा आइपुग्दा बोडर बन्द भयो र रोकियौँ । अहिले नेपालको सरकारले हामीलाई उद्धार गरेर यहाँसम्म ल्याइदियो । अब घर पुग्न पाए ढुक्क हुन्थ्यो ।’जिल्ला स्तरीय कोभिड–१९ संकट व्यवस्थापन केन्द्रको आइतबार बसेको बैठकले जिल्ला बाहिर फसेका आफ्ना नागरीकहरूलाई राहातको व्यवस्था मिलाउने तर जिल्ला आउन प्रोत्साहन निर्णय गरेको थियो । यद्यपि, दुई दिनयता जिल्ला भित्रिनेको संख्या बढेको छ । केन्द्रले जिल्ला फर्किएकाहरूलाई क्वारेन्टाइनको व्यवस्थापन गर्न नसकिने बताएको छ ।

व्यवस्थापन केन्द्रले निर्णय गरेको दिन जिल्ला भरका क्वारेन्टाइनमा जम्मा ३८ जना थिए भने सोमबार बेलुका मात्र यस्तो संख्या बढेर दुई सय २७ पुगेको छ ।

प्रमुख जिल्ला अधिकारी गंगाप्रशाद न्यौपानेले जिल्ला भित्रिसकेपछि मात्रै बाहिरबाट आएकोहरूको विवरण थाहा पाउने गरेको बताए । ‘हाम्रो सीमानामा गाडी आइपुगेपछि मात्र हामीलाई थाहा हुन्छ । कैलालीबाट गाडीका गाडी मान्छे पठाईन्छ तर हामीलाई कुनै जानकारी दिइँदैन । अब घरको ढोकामा पुगेका मान्छे हामीले फर्काएर कहाँ पठाउने, खासमा स्थानीय तहका प्रतिनिधिले बोलाई रहेका छन्, उनीहरूले रोक्नु पर्छ ।’

प्रकाशित मिति: शनिबार, वैशाख २०, २०७७ १२:२१