'पाएको राहत त घरभेटीले खान्छन्, घरभाडामा के छुट देलान् र ?'

A+ A A-

भक्तपुरमा ज्यालादारी मजदुरी गरेर बस्दै आएकी सिन्धुपाल्चोककी दिलमाया सुनारलाई अचेल उपत्यका विरानो लाग्न थालेको छ । ८ वर्षदेखि मजदुरी गर्न २ छोरी १ छोरासँगै उपत्यका आएकी सुनारलाई स्थानीय तह तथा स्थानीय वासिन्दाहरूको आजभोलिको व्यवहारले कतै परदेशमा छु कि जस्तो अनुभव गराउँछ ।

घर नजिकै बेच्नका लागि बारीमा साग टिप्दै गर्दा भेटिएकी सुनार आफ्नो बह यसरी पोख्छिन् ।

काम नपाएको २ हप्ता भयो । घरमा खाने सुको छैन । राहत बाँड्दै छ भनेर नगरपालिका गएको, तैँले पाउँदिनन् भनेर पठाए । हामीले किन नपाउने ? प्रश्नसँगै उत्तर पनि उनैले दिन्छिन् यो ठाउँको स्थानीयले मात्र पाउँछ रे ? हामी बाहिरबाट आएकालाई नदिने रे ?

बल्ल थाहा भयो, उनी त सिन्धुपाल्चोकबाट आएको भन्दै राहत बाँड्न आउनेले राहत नदिएपछि खिन्न मन लागाएर घर आएकी रहिछन् । तर, जब उनी घर आइपुगिन्, उनी तीन छक्क परिन् । राहत लिएर आफ्नै घरबेटी मुसुमुसु हाँस्दै आइरहेका रहेछन्, जबकि आधा घण्टा लाइनमा बसरे उनी रित्तै फर्केकी थिइन् ।

सुनारका अनुसार उनका घरभेटी र उनीसँगै पुगेका थिए राहत लिने ठाउँमा । उनलाई फर्काएपछि आफ्नै घरभेटीलाई भने खाना नसक्ने कोटीमा राखेर राहत दिइएको रहेछ ।

सुनार भन्छिन्, छिमेकमा घर हुने जग्गा हुने र पसलेहरूले समेत राहत भन्दै चामल, दाल, आलु पाए, त्यो पनि २ पटकसम्म । हामी जस्तालाई चाहिँ बाहिरको हो, हुँदैन भन्दै फर्काउँछन् । एक पटक पनि पाएको छैन ।

गाउँका ठूला ठालुले आफ्ना मान्छे र चिनेजानेकालाई मात्र राहत बाँडेको गुनासो गर्छिन् उनी । २ पटकसम्म राहत लिन जाँदा फर्किइन् तर उनै बसेको कार्की थरका घरधनीले भने उनीसँगै हातमा राहतको पोको बोकेर आए । त्यसैले अचेल उनलाई काठमाडौँ विरानो लाग्न थालेको छ ।

सुनार भन्छिन्, यहाँको मानिसले हामीलाई मानिससमेत ठान्दैनन् । घरभाडा छुट दिने भन्ने कुरा सुनेकी थिएँ, पाएको राहत त घरभेटीले खान्छन्, घरभाडामा के छुट देलान् र ?

उनीसँगै भक्तपुरको समथली क्षेत्रमा बस्ने करिब १५ परिवारभन्दा बढी मजुदरहरू छन्, जहाँ मुस्किलले ५ वटा परिवारले मात्र राहत पाएका छन् भने बाँकीले अझै पाउन सकेका छैनन् । यी परिवारमध्ये अधिकांश घर बनाउने मजदुर छन् ।

महिनैपिच्छे ठाउँ परिवर्तन गर्दै हिँड्ने भएकाले नदिएको एक स्थानीयका बताए । यी परिवार जहाँ काम पायो, त्यहीँ कोठा सर्दै हिँड्ने भएर पनि त्यहाँका वासिन्दा हुन् कि होइनन्, यकिन नभएकाले राहत नदिएको उनी बताउँछन् ।

प्रकाशित मिति: शुक्रबार, वैशाख १९, २०७७ १५:१०