मजदुर दिवसमा उद्योगीको शुभकामना : समस्यामा छौँ, सँगै लडौँ

A+ A A-

१ मे २०२० अर्थात् १३१औँ श्रमिक दिवु । विश्वभरका मजदुरबीच एकआपसमा शुभकामना आदानप्रदान गरेर मनाइँदै छ । विगतका वर्षहरूमा नेपालमा पनि बृहत् कार्यक्रमका साथ मनाइने मजदुर दिवस यस वर्ष भने औपचारिक कार्यक्रम नराखी मनाइएको छ ।

धेरै श्रमिकहरू अहिले कामविहीन अवस्थामा बस्नुपरेको छ । कतिको रोजगारी नै गुमेको अवस्था छ । करिब डेढ महिनादेखि देशमा लकडाउन भएको अवस्थामा सरकारले चैत महिनामा पूरा तलब र वैशाखको तलब आधा दिएर बाँकी पछि दिनका लागि आग्रह गरेको छ । उद्योगी, व्यवसायीले मजदुरका समस्या बुझेर माग पूरा गर्न नसकेको गुनासो गरिरहेका छन् ।

श्रमिक दिवसका दिने उद्योगीहरूले दिएका सन्देशमा विकास र प्रगतिमा श्रमिकको योगदान रहेको भन्दै श्रमिकको समस्या सम्बोधन गर्ने प्रतिबद्धतासमेत जनाएका छन् ।

नेपाल उद्योग वाणिज्य महासंघकी अध्यक्ष भवानी राणा, रोजगारदाता परिषद्का अध्यक्ष चन्द्र ढकाल र नेपाल उद्योग परिसंघका अध्यक्ष सतिशकुमार मोहरले शुभकामना दिँदै श्रमिकसँग समझदारी बनाएर अघि बढ्ने प्रतिबद्धता जनाएका छन् ।

कसले के भने ?

भवानी राणा, अध्ययक्ष, नेपाल उद्योग वाणिज्य महासंघ

निश्चय नै आजको समय अत्यन्त कठिन छ । यतिखेर सिंगो मानवजाति महामारीको रूपमा विश्वभर फैलिएको कोरोना भाइरससँग लडिरहेको छ । ठूलो मात्रामा विश्वमा जनधनको क्षति भएको छ । नेपाल पनि त्यसबाट प्रभावित भइरहेको छ ।

उद्योग, व्यवसाय ठप्प छ । अर्थतन्त्रका महत्त्वपूर्ण आधारहरू, विप्रेषण, पर्यटनलगायत सेवा क्षेत्र नराम्ररी थलिएका छन् भने अन्य उद्योग व्यवसाय पनि ग्रस्त भइरहेका छन् । अझै पनि हाम्रा अगाडि निकै ठूलो चुनौती छ । अहिले हाम्रो पहिलो प्राथमिकता मानव जीवनको सुरक्षा हो, हामी सबै एकजुट भई कोभिड- १९ लाई परास्त गर्ने अभियानमा छौँ ।

चाँडै नै यो महामारी नियन्त्रणमा आउने हामीले आशा गरेका छौँ । सम्भावित चुनौतीसँग लड्न यतिखेर सरकार, निजी क्षेत्र, श्रमिक, कामदार, कर्मचारीहरूसहित सिंगो मुलुक नै एक ढिक्का भएर लागेको छ ।

अर्थतन्त्रलाई पहिलेकै अवस्थामा ल्याउन आगामी दिनमा अझ बढी समझदारी र सहकार्यका साथ काम गर्नुपर्ने आवश्यकता र चुनौती हाम्रा सामुन्ने रहेको म यस अवस्थामा स्मरण गर्न चाहन्छु । कठिन चुनौतीको सामनाका साथै साझा समस्याको समाधान गर्न हामी सफल हुनेछौँ भन्ने विश्वास गर्दै सम्पूर्ण श्रमिक दाजुभाइ तथा दिदीबहिनीहरूको सुस्वास्थ्य र सुरक्षाको कामनासहित पुनः एक पटक हार्दिक शुभकामना व्यक्त गर्छु ।

चन्द्र ढकाल, अध्यक्ष, रोजगारदाता परिषद्

आज सम्पूर्ण विश्व नोबेल कोरोना भाइरस (कोभिड- १९)को महामारीको सङ्कटबाट गुज्रिरहेको अवस्था छ । यसबाट बच्न विश्वका विभिन्न मुलुकहरूले आफ्नो मुलुकमा बन्दाबन्दीको घोषणा गरेका छन्, जसका कारण आज सारा संसार नै ठप्पप्रायः छ ।

अन्तराष्ट्रिय मुद्रा कोषले अप्रिल २०२० मा सार्वजनिक गरेको वर्ल्ड इकोनोमिक आउटलुकका अनुसार कोरोनाको विश्वव्यापी महामारीका कारण सन् २०२० मा विश्व अर्थतन्त्र ३.० प्रतिशतले सङ्कुचन आउने प्रक्षेपण गरेको छ । अस्ति मात्र केन्द्रीय तथ्याङ्क विभागले नेपालको आर्थिक वृद्धिदर २.२७ प्रतिशत हुने अनुमान गरेको छ । यो निकै प्रारम्भिक प्रक्षेपण मात्र हो ।

कोरोनाको असर बढ्दै गएमा र बन्दाबन्दीको समय लम्बिँदै गएमा यो दर अझ तल झर्ने निश्चित छ । नेपाल विगत १ महिनाभन्दा लामो समयदेखि पूर्ण रूपमा बन्दाबन्दीको अवस्थामा छ । विकास, निर्माणका कामहरू सबै ठप्प छन् । उद्योग, व्यवसाय र कलकारखानाहरू बन्द छन् । रेमिट्यान्सको आप्रवाह घट्दो छ । स्वदेश तथा विदेशमा रहेका नेपाली श्रमिक दाजुभाइ, दिदीबहिनीहरू आफ्नो रोजगारीबाट विमुख हुँदै छन् ।

अहिलेसम्मकै मात्र अवस्थालाई हेर्दा पनि यो कोरोना महामारीका कारण विश्वमा लाखौँ मानिसको ज्यान जाँदै छ । करोडौँ मानिसले आफ्नो रोजगारी गुमाउँदै छन् । त्यति नै संख्यामा मानिसहरू भोकमरी र खाद्य सङ्कटमा पर्दै छन् । र, विश्व अर्थतन्त्र पुनः एक पटक दीर्घकालीन रूपमा थला पर्दै छ । यस जोखिमपूर्ण महामारीको अवस्थामा तपाईं हामी आपसी सद्भाव, मित्रता र समन्वयबाट आफ्नो जिउधन र व्यवसायको सुरूक्षा गर्दै अगाडि बढ्नुपर्ने खाँचो छ ।

इतिहासको कठिन समयमा अझ बढी समझदारीका साथ सहयात्रा गर्ने प्रतिबद्धताका लागि आग्रह गर्दै सबै श्रमिक दाजुभाइ एवं दिदीबहिनीहरूको सुस्वास्थ्य र सुरक्षाको कामना गर्छु ।

सतिशकुमार मोर, अध्यक्ष, नेपाल उद्योग परिसंघ

१ मेका दिन आज मनाइने अन्तर्राष्ट्रिय श्रमिक दिवसका अवसरमा समग्र श्रमिक वर्गमा नेपाल उद्योग परिसंघका तर्फबाट र मेरो व्यक्तिगततर्फबाट समेत हार्दिक शुभकामना दिन चाहन्छु ।

हामी सधैँ श्रम र उत्पादनको हार्दिकतापूर्ण सम्बन्धको सेतुलाई स्वीकार गर्दै समृद्ध आर्थिक प्रणालीको विकासमा श्रमिक वर्गसँग हातेमालो गर्दै आएका छौँ । यसैबाट दिगो आर्थिक प्रणालीको विकास हुन्छ भन्नेमा हाम्रो गहिरो विश्वास रहँदै आएको छ । यसैले श्रमिक दिवसको अवसरमा थप सौहार्दपूर्ण श्रम सम्बन्ध विकासमा साझेदारीका लागि आह्वान गर्न चाहन्छु ।

कतिपय अवस्थाहरू हाम्रो वसभन्दा बाहिर रहन पुग्ने यथार्थ आज हाम्रा सामुन्नेमा छ । कोरोना भाइरसको महामारीले विश्व उत्पादन तथा वितरण प्रणाली ठप्प हुँदा विश्व अर्थ व्यवस्था नै नराम्ररी प्रभावित भएको छ । यो महामारी, आर्थिक सङ्कट र बेरोजगारीको महामारीका रूपमा समेत फैलिरहेको छ । यसबाट नेपाल समेत अछुतो छैन ।

अझ, श्रमप्रधान तथा विप्रेषणमा आधारित नेपालको अर्थतन्त्र झनै सङकटोन्मुख अवस्थामा पुगेको छ । त्यसैले बिग्रिँदो परिस्थितिलाई सम्हाल्दै अघि बढ्नु नै हाम्रा अगाडि सबैभन्दा ठूलो कार्यभार रहन पुगेको आजको दिनमा स्मरण गर्न चाहन्छु ।

यसरी विद्यमान विषम परिस्थितिको सामना गर्दै सामुन्नेमा आएको आर्थिक सङ्कट थेग्न थप आपसी समझदारीका साथ अघि बढ्ने विश्वास व्यक्त गर्दै सम्पूर्ण श्रमिक दाजुभाइ तथा दिदीबहिनीहरूको सुस्वास्थ्य र सुरक्षाको कामनासहित पुनः मे दिवसको हार्दिक शुभकामना व्यक्त गर्छु ।

प्रकाशित मिति: शुक्रबार, वैशाख १९, २०७७ १४:४८