'विदेशमा राेजगारी गुमाएका सबै फर्किए भने देशमा संकट आउँछ'

फाइल तस्वीर

A+ A A-

सरकारले श्रम र रोजगारी क्षेत्रकाे व्यवस्थापनमा बेलैमा ध्यान नदिए कोरोना भाइरसको विपदपछि ठूलो संकट आउन सक्ने चेतावनी विज्ञहरूले दिएका छन् । श्रम रोजगार पत्रकार समूहले भिडियाे कन्फ्रेन्सिङमार्फत गरेकाे श्रम र रोजगारी क्षेत्रमा कोरोना भाइरसपछि देखिने चुनौती विषयक कार्यक्रममा जानकारहरूले यस्ताे चेतावनी दिएका हुन् । उनीहरूले तत्काल यो क्षेत्रमा ठोस रणनीति ल्याउन सरकारलाई सुझाव दिएका छन् ।

कोरोना भाइरसका कारण श्रम र रोजगारीका क्षेत्रमा ठूलो संकट देखा पर्न सक्ने रोजगादाता परिषद्का अध्यक्ष चन्द्र ढकालले चेतावनी दिए । विदेशमा राेजगारी गुमाएका सबै फर्किए भने देशमा संकट आउन सक्छ, त्यसैले सरकारले नेपालमै राेजगारी सिर्जना गर्ने गरी याेजना बनाउन ढिलाइ गर्न हुँदैन , उनले भने ।

कोरोना भाइरसका वैदेशिक रोजगारी क्षेत्रसँगै रेमिट्यान्समा पनि समस्या देखा पर्ने उनले बताए । ढकालले सरकारले देशभित्र रोजगारी र श्रम क्षेत्रलाई व्यवस्थित गर्ने योजना बनाउनुपर्नेमा जाेड दिए ।

यसैगरी, कोरोना भाइरसपछि श्रम र रोजगारीका क्षेत्रमा सरकारले विशेष योजना ल्याउनुपर्ने नेपाल कांग्रेस ट्रेड युनियनका अध्यक्ष पुष्कर आचार्यले बताए ।

सरकारी पक्षले भने सम्भावित चुनाैतीकाे सामना गर्न याेजना र व्यवस्थापनकाे काम भइरहेकाे बताएकाे छ । राष्ट्रिय याेजना आयाेगका सदस्य डा. रामकुमार फुयाँलले देशभित्र आवश्यक श्रम र रोजगारीलाई समेट्ने गरी योजना ल्याउन सरकारले गृहकार्य गरिरहेको बताए । सरकारले देशभित्र कृषि, पर्यटन, निर्माण र अन्य क्षेत्रमा रोजगारी सिर्जना गर्नका लागि आवश्यक अध्ययन गरिरहेको उपाध्यक्ष फुयाँलकाे भनाइ छ ।

‘श्रम र रोजगारीसँग सम्बन्धित सबै मन्त्रालयले रोजगारी सिर्जना गर्ने विषयमा सरकारले अध्ययन गर्दै छ । नेपालको मुख्य रोजगारीका क्षेत्र कृषि र पर्यटन नै हुन् । श्रम र रोजगारीका विषयमा प्रधानमन्त्री कार्यालयले समेत चासो दिएको छ , उनले भने, ‘सरकारले रोजगारीसँग सम्बन्धित आयोजनालाई रोजगारीमैत्री बनाउनुपर्छ । यो विषयमा छलफल भइरहेको छ । श्रम र रोजगारीका क्षेत्र व्यवस्थित गर्ने पक्षमा सरकार छ ।’

१५औँ योजनामा २५ लाख रोजगारी सिर्जना गर्ने सरकारी लक्ष्य रहेकाे उनको भनाइ छ ।

प्रकाशित मिति: बिहीबार, वैशाख १८, २०७७ १६:०४