बाजुरामा जनप्रतिनिधिकै कारण कोरोनाको जोखिम

तस्वीरः निमेन्द्र शाही

A+ A A-

बाजुरामा बाहिर जिल्लाबाट भित्रिने नागरिकको संख्या ह्वात्तै बढेको छ । कोरोना भाइरस (कोभिड–१९) नियन्त्रणका लागि सरकारले गरेको लकडाउनको अवधिमा पनि बाजुरामा बाहिर जिल्लाबाट भित्रिने नागरिकको संख्या ह्वात्तै बढेको हो ।

जिल्ला स्तरीय कोभिड–१९ संकट व्यवस्थापन केन्द्रको आइतबार बसेको बैठकले जिल्लाको बिषयमा ८ वटा निर्णय गरेको थियो ।

जसमा आफ्ना नागरिक जहाँ बसेका छन् त्यहाँ अप्ठ्यारोमा परेका भए राहतको व्यवस्था मिलाउने तर जिल्लामा ल्याउन नसकिने निर्णय पनि गरिएको थियो । निर्णयपछि जिल्ला भित्रिने मानिसको संख्या रोकिनुको साटो झन् बढेको छ ।

व्यवस्थापन केन्द्रले निर्णय गरेको दिन जिल्ला भरका क्वारेन्टाइनमा ८ जना मात्र थिए । तर, बुधबार बेलुकासम्म त्यो संख्या बढेर ३ सय पुगेको छ । संख्या वृद्धिसँगै जिल्लामा कोरोनाको जोखिम पनि बढेको छ ।

स्वास्थ्य कार्यालय बाजुराका प्रमुख दयानाथ पन्थले दिएको जानकारी अनुसार मंगलबार बेलुकासम्म बुढीनन्दा नगरपालिकामा २१ जना, बडिमालिका नगरपालिकामा १४, बुढीनन्दा नगरपालिकामा ६, त्रिवेणी नगरपालिकामा २६ जना, स्वामीकार्तिक गाउँपालिकामा ३७, जगन्नाथ गाउँपालिकामा ३७, हिमाली गाउँपालिकामा ५, गौमुल गाउँपालिमा १८ र खप्तड छेडदह गाउँपालिकाको क्वारेन्टाइनमा ५२ जना रहेका छन् ।

प्रमुख जिल्ला अधिकारी गंगाप्रसाद न्यौपानेले बाहिर जिल्लाबाट बिना जानकारी मानिस पठाउँदा व्यवस्थानमा समस्या भइरहेको बताए । ‘हाम्रो सीमानामा गाडी आइपुग्छन् अनि मात्र थाहा पाउँछौँ’ उनले भने, ‘कैलालीबाट गाडीकागाडी मान्छे पठान्छ तर हामीलाई कुनै जानकारी दिइदैन । अब घरको ढोकामा पुगेका मान्छे हामीले फर्काएर कहाँ पठाउने ?’

अहिले जनप्रतिनिधिले आफ्ना स्थानीय तहका मानिसहरु धमाधम बोलाइरहेकाले जिल्ला भित्रिने नागरिकको संख्यामा वृद्धि भएको प्रजिअ न्यौपानले बताए ।

सदरमुकाममा पर्याप्त क्वारेन्टाइन नहुँदा बाहिरबाट आएका मानिस सिधै घर गइरहेका बताइएको छ । बुधबार मात्रै जिल्लाको स्वामीकार्तिक खापर गाउँपालिकाका धेरै मानिस सदरमुकामबाट घर फर्किएका थिए ।

बाहिरबाट आउने मानिसको कारण पालिकाहरुलाई व्यवस्थापन गर्न गाह्रो भइरहेको जनप्रतिनिधिले बताएका छन् । स्वामीकार्तिक खापर गाउँपालिका अध्यक्ष चिरन्जीवि शाहीले भने, ‘हाम्रो स्थानीय तहमा क्वारेन्टाइनमा जति आए त्यति राख्न सकिँदैन । बरु जहाँ छन् त्यही राहत दिन तयार छौँ ।’

मानव अधिकार अनुगमन समितिका संयोजक अग्नि शाहीले दिनहुँ जिल्लामा भित्रिरहेको मानिसको भीडले कोरोना संक्रमणको जोखिम बढ्नसक्ने भएकाले छिटो रोक्नुपर्ने बताए ।

प्रकाशित मिति: बिहीबार, वैशाख १८, २०७७ १४:०८