लकडाउनको असर अटोमोबाइल क्षेत्रमा : ब्याज तिर्ने ६ महिना समय दिनुपर्ने माग

A+ A A-

नाडा अटोमोबाइल्स एसोसिएसन अफ नेपालले वैशाख २५ गतेपछि पनि लकडाउनले निरन्तरता पाए अटोमोबाइल्स क्षेत्र धारासायी अवस्थामा पुग्ने बताएको छ ।

करिब २ महिनादेखि व्यापार ठप्प रहेको अवस्थामा ठूलो आर्थिक क्षति भइसकेको र अब पनि लकडाउनले निरन्तरता पाए झनै समस्या बढ्ने नाडाले बताएको छ । नाडाका अध्यक्ष कृष्णप्रसाद दुलालले २ महिनादेखि उद्योग व्यवसाय र प्रतिष्ठानहरू बन्द रहेको र खर्चमा कुनै कटौती नभएको अवस्थामा व्यापार व्यवसायलाई अगाडि बढाउन नपाए समस्या बढ्दै जाने बताए ।

उनले अहिले पनि कर्मचारीको तलब पूर्ण रुपमा दिन नसक्ने अवस्था आइसकेकोले उद्योग वाणिज्य महासंघले दिएको सुझावअनुसार लकडाउन अवधिको तलब ५० प्रतिशत मात्रै दिने व्यवस्था गराउन सरकारसँग आग्रह समेत गरे ।

यस्तै, नेपाल राष्ट्र बैंकले बैंकको ब्याजदर २ प्रतिशतले घटाउनु सकारात्मक कदम भएको र बैंकहरूले पनि त्यसमा अझ केही कम गर्ने गरी व्यवस्था गर्न बैंकहरूलाई सुझावसमेत दिए । यसबाहेक आगामी असार मसान्तसम्मको ब्याज तिर्ने समय थप ६ महिना दिनुपर्ने मागसमेत उनले गरे ।

अध्यक्ष दुलालले सरकारले भ्याट विवरण बुझाउने समय थप गर्नुपर्ने, कर बुझाउने अन्तिम समय पनि पुस मसान्तसम्म पुर्‍याउनुपर्ने लगायतका व्यवस्था गर्नसमेत माग गरे ।

यसबाहेक भन्सार परिसरमा रोकिएर बसेका सवारी साधनको शुल्क मिनाह गर्न एवं कन्टेनरको डिटेन्सन चार्ज पनि मिनाह गर्न अध्यक्ष दुलाले माग गरे । उनले लकडाउनपछि कसरी व्यवसाय सुरक्षित तरिकाले सञ्चालन गर्न सकिन्छ भन्ने विषयमा नाडाले सुरक्षा प्रबन्ध अवधारण गाइड ल्याउन लागेको समेत बताए ।

उनले व्यापार व्यवसाय र उद्योग प्रतिष्ठानहरू सञ्चालनमा नआए देशको अर्थतन्त्रमा ठूलो क्षति हुने भएकाले वैशाख २५ गतेपछि जसरी पनि लकडाउन खुलाउने व्यवस्था गर्न माग गरे ।

प्रकाशित मिति: बुधबार, वैशाख १७, २०७७ १४:०२