नेकपाभित्र बालुवाटार भर्सेस खुमलटार–कोटेश्वर

A+ A A-

देश कोरोना महामारीसँग जुधिरहेका बेला सत्ताको नेतृत्वकर्ता नेकपाभित्र घरझगडा चलिरहेको छ । प्रधानमन्त्रीसमेत रहेका पार्टी अध्यक्ष केपी शर्मा ओलीको कार्यशैलीलाई लिएर खासगरी दुई समूह असन्तुष्ट छन् ।

अर्का अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल यस पटक प्रधानमन्त्री ओलीलाई ‘यसै छाड्ने’ पक्षमा छैनन् । अध्यादेश प्रकरणले नैतिक संकटमा परेका प्रधानमन्त्री ओली भने भागबन्डा मिलाएर भए पनि विवाद साम्य पार्न उद्यत छन् ।

अध्यादेश ल्याउनासाथ त्यसको विरोध गर्दै खारेजीको माग गरेका प्रचण्ड र नेपालले सरकारले अध्यादेश फिर्ता लिँदा पनि विरोध गर्न नछाड्नुलाई ओलीले ‘आफूविरुद्धको षड्यन्त्र’का रूपमा बुझेका छन् । मंगलबार मात्र प्रचण्डसँगको भेटमा ओलीले पार्टीभित्रबाटै राजीनामा माग गरिएको विषयलाई आफूले रहस्यका रूपमा लिएको बताएका थिए ।

सरकारले राजनीतिक दल र संवैधानिक परिषद्सम्बन्धी अध्यादेश ल्याएपछि अध्यक्ष प्रचण्ड, उपाध्यक्ष वामदेव गौतम, वरिष्ठ नेताद्वय माधवकुमार नेपाल र झलनाथ खनाललगायतले तत्कालै विरोध जनाएका थिए ।

प्रचण्डले त आफूनिकट तथा ओलीसँग असन्तुष्ट पूर्वएमालेका नेताहरूसँगको छलफललाई तीव्रता दिए र ओली कार्यशैलीविरुद्धको माहोल अझै तताए ।

सरकार सञ्चालनका क्रममा सरसल्लाह नगर्ने, आफूनिकट व्यक्तिलाई मात्र राष्ट्रियसभा, मन्त्रिमण्डल तथा राजनीतिक नियुक्तिमा स्थान दिनेजस्ता ओली कार्यशैलीप्रति प्रचण्ड रुष्ट थिए ।

वरिष्ठ नेता नेपाल पनि यस्तै खालको असन्तुष्टि लिएर बसेका थिए । वरिष्ठ नेता झलनाथ खनाल राष्ट्रपति चयन प्रक्रियादेखि नै ओलीका कमजोरी पर्खेर बसेका थिए । अहिले असन्तुष्ट नेताहरू सबै एक ठाउँमा उभिएकाले ओली चर्को दबाबमा छन् ।

त्यसैले यही बेला अध्यक्ष प्रचण्ड सरकार र पार्टी सञ्चालनमा ओलीको कार्यशैली तथा भूमिकाबारे कुनै हालतमा स्थायी कमिटी बैठकमा छलफल गर्नुपर्ने पक्षमा देखिन्छन् । पूर्वमाओवादी पक्षका एक स्थायी कमिटी सदस्य भन्छन्, ‘यसपटक ओली स्थायी कमिटी बैठक टार्न चाहनुहुन्छ । बैठक बस्यो भने आफू अप्ठेरोमा पर्ने कुरा उहाँले बुझिसक्नुभएको छ । त्यसैले माधव नेपाल पक्षलाई फकाएर स्थायी कमिटी बैठक टार्ने माहोल तयार गर्न उहाँ सक्रिय हुनुहुन्छ ।’

सोमबार मात्र प्रधानमन्त्री ओलीसँग छलफल गरी निस्किएका एक सांसदका अनुसार आफूलाई नियोजित रूपमा अप्ठ्यारो पार्न खोजेको बुझेका ओलीले स्थायी कमिटी बैठकको माग हुनुलाई एक चाल नै ठानेका छन् ।

‘कसले के गर्न खोज्दै छ र कुन प्रयोजनका लागि गर्दै छ भन्ने कुरा तपाईंहरूले बुझ्नुहोला’, आफूहरूलाई ओलीले भनेका कुरा स्मरण गर्दै ती सांसदले भने, ‘हिजो विरोध गर्नुपर्ने विषय ठाने होला, विरोध गरे । आज विरोध गर्ने विषय नै नहुँदा पनि विरोध गरिनुलाई कसरी सामान्य र संयोग ठान्नु ? तपाईंहरू सामान्य ठान्नुहुन्छ ?’

राजीनामा असम्भव

अध्यक्ष प्रचण्ड र वरिष्ठ नेता नेपाल पक्षका कतिपय नेता ओलीले प्रधानमन्त्री र पार्टी अध्यक्षबाट राजीनामा दिनुपर्ने बताइरहेका छन् । उपाध्यक्ष वामदेव गौतमले त बालुवाटार पुगेरै ओलीलाई प्रधानमन्त्री पदबाट राजीनामा दिन आग्रह गरेका थिए । सत्ता र पार्टी सञ्चालनमा असफल भएकाले ओलीले मार्ग प्रशस्त गर्नुपर्ने तर्क गौतमले गरेका थिए ।

तर, ओली यति सजिलै राजीनामा दिने पक्षमा छैनन् । मंगलबार मात्र बालुवाटारमा प्रचण्डसँग छलफल गरी ओलीले राजीनामा बाहेकका अरु एजेण्डामा छलफल हुन सक्ने बताएका छन् ।

‘तपाईंहरूले सुरूमा बेमौसमी अध्यादेश ल्याइस् भन्नुभयो । त्यसैमा टेकेर सरकारलाई अप्ठेरो पार्ने काम गर्नुभयो । साथीहरूले मान्दैनन् भने म एक्लै किन अघि बढौं भनेर अध्यादेश फिर्ता गरेँ । तर, अध्यादेश फिर्ता भइसक्दा पनि कतिपय मान्छे राजीनामा नै भन्दै हिँडेका छन् । यो त सामान्य विषय होइन नि !’, ओलीले बालुवाटारमा प्रचण्डलाई भनेका थिए । उनले स्थायी कमिटी बैठक पनि अलि पछि डाक्नुपर्नेमा जोड दिएका थिए ।

ओलीबाट यस्तो प्रतिक्रिया पाएका प्रचण्ड र नेपालले पनि छलफल र परामर्श तीव्र पारेका छन् । खुमलटार र कोटेश्वरमा अहिले नेताहरूको आउजाउ बाक्लिएको छ । ‘स्थायी कमिटी बैठक नबसेसम्म यो विवाद साम्य हुन सक्दैन’, प्रचण्डनिकट ती स्थायी कमिटीले थपे, ‘स्थायी कमिटीमा गएर सुध्रिने वा मार्गप्रशस्त गर्ने भन्ने विषयमा प्रधानमन्त्रीजीले स्पष्ट पार्नुपर्छ ।’

ती नेताका अनुसार बुधबार (आज) साँझ सचिवालय बैठक बस्दै छ । उक्त बैठकअघि प्रचण्ड र नेपाल पक्षका नेताहरू विभिन्न चरणको छलफलमा जुटेका छन् । ‘सचिवालयमा एउटै खालको एजेण्डा जानुपर्छ । स्थायी कमिटी टर्नु हुँदैन । हामी सबैको चाहना यही छ’, उनले भने ।

प्रकाशित मिति: बुधबार, वैशाख १७, २०७७ १२:४५