सुर्तीजन्य उद्योग बन्द गरिन्छः सामाजिक बिकास मन्त्री

A+ A A-

प्रदेश ३ का सामाजिक बिकास मन्त्री युवराज दुलालले सुर्तीजन्य पदार्थहरु उत्पादन गर्ने उद्योग बन्द गरिने बताएका छन् ।

प्रदेश ३ का राजधानी हेटौंडामा आज भएको भएको एक कार्यक्रममा बोल्दै मन्त्री दुलालले मान्छे मार्ने उद्योगले निरन्तरता पाउनु भन्दा ठूलो अराजक काम अरु कुनै नभएको बताउदै भने ‘मान्छे मार्न पाईन्न, सुर्तीजन्य पदार्थ उत्पादन गर्नु भनेको पनि मान्छे मार्नु सरह हो ।’ उनले भने ‘स्लो पोइजन हो,यसले मान्छे मार्छ नै ।’

करबाट हुने आम्दानीको आशामा जनता मार्न नहुने उनले बताए । मन्त्री दुलालले सुर्तीजन्य पदार्थ उत्पादन गर्ने नयाँ उद्योग दर्ता नै नगर्ने र पुराना उद्योगलाई निश्चित समयमा बिस्थापित गराउने नीति ल्याउनु पर्ने बताए ।

विश्व स्वाथ्यको सहयोगमा स्वास्थ तथा जनसंख्या मन्त्रालय राष्ट्रिय स्वास्थ शिक्षा सूचना तथा सन्चार केन्द्रले आयोजना गरेको सुर्तीजन्य पदार्थ नियन्त्रण रणनीतिक योजना तर्जुमाको लागि सुझाव संकलन कार्यक्रममा मन्त्री दुलालले यस्तो बताएका हुन । ‘राज्यले अबैध काम रोक्नु पर्छ,यस्ता उद्योगले गरेको कामलाई बैध मान्नै सकिन्न’ उनले भने । बिद्यालय क्षेत्र, सरकार क्षेत्र तथा सार्वजनिक क्षेत्रमा सुर्तीजन्य पदार्थ सेवन रोक्दै रोक्दै उद्योगहरु नै बन्द गर्नुपर्ने उनले बताए ।

कार्यक्रममा हेटौंडा उपमहानगरपालिका उपमेयर मिना लामाले सुर्तीजन्य पदार्थ सेवनको लतमा यूवाहरु फस्ने क्रम बढेको बताईन । अन्य सामाजिक सुधारका सवाल संगै सुर्तीजन्य पदार्थ नियमनको सवललाई पनि अनिवार्य रुपमा जोडेर लैजानु लामाले बताईन ।

कार्यक्रम सामाजिक बिकास मन्त्रालय प्रदेश ३ का सचीव लिलानाथ पौडेलले सुर्तीजन्य पदार्थ नियन्त्रण ऎन २०६८ लाई कार्यन्वयनको क्रममा धेरै चुनौती आईपरेको बताए । अरुले सेवन गरेको कारण पनि दोस्रोपक्षको स्वास्थमा असर पुग्ने हुनाले यसको नियमन जरुरी भएको पौडेलले बताए ।

सुर्तीजन्य पदार्थ सेवनको लागि निश्चित क्षेत्र तोकिनु पर्ने,निजि घर,निजि सवारी, निजि बगैंचामा समेत सुर्तीजन्य पदार्थ सेवन गर्न नपाईने गरि कानूनी कडाईको सवालहरु दरिलो पारिदै ल्याएको पौडेलले बताए ।

सुर्ती सेवनको कारण प्रती ५ सेकेन्डमा एक जनाको मृत्यु

सुर्तीजन्य पदार्थ सेवनको कारण प्रती ५ सेकेन्डमा एक जनाको मृत्यु हुने गरेको तथ्यांक छ । यो विश्व स्वास्थको तथ्यांक हो ।

नेपालमै पनि प्रतिबर्ष २७ हजार जनाको मृत्युको कारण सुर्तीजन्य पदार्थको सेवनले नै हुने गरेको अनुसन्धानले देखाएको छ । सुर्तीजन्य पदार्थ सेवनको दर अहिले कै अवस्थामा रहने हो भने सन २०३० सम्म प्रतिबष मृत्यु हुनेको सङ्ख्या ८० लाख पुग्ने अनुसार गरिएको छ ।

स्वास्थ तथा जनसंख्या मन्त्रालयका अनुसार सरकारले सन २०३० सम्म सुर्तीजन्य पदार्थ मुक्त पिढी बनाउने लक्ष्य लिएको छ । यसका लागि हाल सुर्तीजन्य पदार्थ सेवन गर्ने २७ प्रतिशत युवाको सङ्ख्या घटाएर १५ प्रतिशतमा ल्याउने लक्ष्य लिएको छ । यसैगरी ४४ प्रतिशतको संङ्ख्यामा रहेको बयस्कको सङ्ख्यालाई २० प्रतिशत र ५ दशमलव ५ प्रतिशतको सङ्ख्यामा रहेको १५ बर्षमूनिका बालबालिकाको सङ्ख्यालाई १ प्रतिशतमा झार्ने लक्ष्य लिएको छ ।
नेपालमा सुर्तीजन्य पदार्थको सेवनक्क कारण ५० प्रतिशत मृत्यु अप्राकृतिक हुने गरेको डक्टर प्रकाश घिमिरेले बताए ।

नेपालमा सुर्तीजन्य पदार्थ नियन्त्रण तथा नियमन ऎन २०६८ कार्यन्वयनमा ल्याईएको छ । तर अझै पनि सार्वजनिक क्षेत्रमा पुर्णरुपमा सुर्तीजन्य पदार्थ नियमन हुन सकेको छैन । सुर्तीजन्य पदार्थ सेवनको कारण सेवन गर्नेलाई मात्रै हैन, नजिक बस्ने दोस्रो तेस्रो ब्यक्तिलाई पनि प्रत्यक्ष असर पुर्‍याउने भएकोले यसबारे सबैले चासो लिनुपर्ने डाक्टर प्रशाक घिमिरेले बताए । कार्यक्रम मा डक्टर घिमिरेले सुर्तीजन्य पदार्थको कारण देखिने समस्या, नियमनमा आईपरेका समस्या बारे कार्यपत्र प्रस्तुत गरेका थिए ।

प्रकाशित मिति: सोमबार, चैत ११, २०७५ २१:५२