घरबाटै जानकी जन्मोत्सवलाई विशेष बनाउँदै जनकपुरधामका महिला

A+ A A-

जनकपुरधाम-४ की जयमंगला देवी आजभोलि घण्टौँ बधाइ गीत गाउँछिन् । जानकी जन्मेका बेलायस्तै गीत गाउने गरेको उनले बताइन् । सोहर भनिने सो गीत अहिले घरघरमा महिला गाउने गरेका छन् । सीता मैयाको जन्मोत्सव रहेकोले नै आफू सोहर गीत गाउने गरेको जनकपुरधाम–१२ की पूनम झा मैथिलीले बताइन् ।

सीतालाई कसैले माता, कसैले छोरी र कसैले बहिनी भनेर मिथिलामा भन्ने गरिन्छ । सम्बोधनमा जे भनिए पनि सीता मातालाई आफूहरूले बहिनी नै मान्ने गरेको राष्ट्रिय समाजवादी पार्टीकी नेतृसमेत रहेकी मैथिलीले बताइन् ।

जानकी जन्मोत्सव यसपाली १९ बैशाखमा परेको छ । अन्य वर्षमा यतिबेला जनकपुरधामको प्रसिद्ध धार्मिक स्थल जानकी मन्दिर दुलहीझैँ सजाइएको हुन्थ्यो । रङ्गीचङ्गी बिजुलीबत्ती र मनमोहक फूलहरूले मन्दिरलाई झकिझकाउ पारिन्थ्यो । बिहान र साँझ श्रद्धालु भक्तजनहरू भीड लाग्थ्यो । मन्दिरमा जन्मोत्सवमा गाउने गीत गाइन्थ्यो । देश विदेशका साधुसन्तको आगमनले मन्दिर भरिभराउ हुन्थ्यो ।

तर, यस वर्ष भने जानकी मन्दिर सुनसान छ । मन्दिर सुनसान भए पनि परम्परादेखि गर्दै आएका पूजाआज घरघरमै गरिरहेको नेपाल पत्रकार महासंघ प्रदेश २ का उपाध्यक्ष गायत्री मिश्रले बताइन् । गायत्रीजस्तै सयौँ महिला गत ३ दिनदेखि आ-आफ्ना घरमा जानकी माताका लागि विशेष आरती गरिरहेकी छिन् ।

जानकी मन्दिरका उत्तराधिकारी महन्थ रामरोशन दास वैष्णवले जनकपुरधामका हरेक महिलालाई आफ्नै घरमा प्रत्येक साँझ जानकीलाई विशेष आरत गर्न आह्वान गरेका छन् । बिहीबारदेखि आरती गरेको भिडियो सामाजिक सञ्जालमा लाइभ देखाउने गरिएको छ ।

मैयाको जन्मोत्सवलाई विशेष बनाउन प्रत्येक साँझ सामाजिक सञ्जालको माध्यमबाट लाइब देखाउने गरी आफूहरूले आरती गर्ने गरेको जनकपुरधाम ४ का निलम देवी शर्माले बताइन् । साँझ ७ बजे घर घरबाट लाइभ आरती हुने गरेको छ ।

जानकी नवमीको ९ दिन अगाडिदेखि नै माता सीताको माइतमा उनको जन्मोत्सव मनाउने गरिन्छ । यस वर्ष पनि बिहीबारदेखि महोत्सवको शुभारम्भ भएको हो । जानकी मन्दिरको गर्भगृहमा कलश स्थापन गरी जन्मोत्सव विशेष पूजा सुरु गरिएको छ ।

तर, अन्य वर्षजस्तो न त श्रद्धालुको भीड छ न त विभिन्न सांस्कृतिक कार्यक्रम वा प्रवचन नै । यो महामारीको बेला सरकारले लागू गरेको लकडाउन पालना गर्नु नै पहिलो धर्म हो, जानकी मन्दिरका उत्तराधिकारी महन्थ रामरोशन दास वैष्णव भन्छन, ’जानकी जन्मोत्सव सुरु भएको छ । तर, म सबै श्रद्धालुलाई घरबाटै यो उत्सव मनाउन आग्रह गरेका छौँ ।’

जानकी नवमीका दिनसम्म प्रत्येक साँझ जनकपुरवासीले आआफ्नो घरबाटै जानकी माताको आरती गर्न उत्तराधिकारी महन्थ दासले आग्रह गरेका छन् । ’जानकी माता जनकपुरधामका हरेक घरमा बास गर्छिन् । उनको पूजा गर्न मन्दिर नै आउनुपर्छ भन्ने छैन, ’महन्थ दासले थपे, ’घरमै बसी जन्मोत्सवको यो ९ दिनलाई विशेष मनाउन सबैमा अपिल छ, आरती र पूजापाठ गर्न पनि आग्रह छ ।’

त्रेता युगमा देवी जानकीको जन्म भएको थियो । जानकीको मर्यादा पुरुषोत्तम भगवान् रामसँग विहे भएको हिन्दू धर्मावलम्बीको महत्वपूर्ण ग्रन्थ रामायणमा उल्लेख रहेको छ ।

प्रकाशित मिति: सोमबार, वैशाख १५, २०७७ १३:३९