उदयपुरवासीकाे मागः पैसा आफैं तिर्छाैँ, काेराेना परीक्षण गरिदेऊ

A+ A A-

‘म आफूलाई कोरोना भएको छ कि छैन भन्ने थाहा पाउन चार दिनदेखि परीक्षणको लाइनमा बस्दै फर्किदै गरिरहेको छु । मेरो स्वाब अहिलेसम्म लिएनन्, पैसा तिर्नुपर्ने हो भने तिरौंला, परीक्षण गरेपछि कम्तीमा ढुक्कले निदाउन त पाइन्थ्यो’, उदयपुर त्रियुगा नगरपालिका–३ भुल्केका ३८ वर्षीय नन्दलाल चौधरीले गुनासो गरे ।

उनलाई आफ्नो कारणले घरमा रहेकी बूढी आमा र स–साना बच्चाको स्वास्थ्यमा कुनै जोखिम आइपर्ने हो कि भन्ने चिन्ता छ ।

उनका अनुसार प्रत्येक परिवारबाट एकएक जनाको मात्रै स्वाब संकलन गर्ने स्वास्थ्यकर्मीहरुले बताएका थिए । ‘तर, आफ्नो छिमेकी नै संक्रमित भएका छन् । त्यसैले पनि स्वाब परीक्षण गरिहाल्नु पर्ने स्थिति छ । तर खोइ ?’ उनले प्रश्न गरे ।

भुल्केकै स्थानीय ६७ वर्षीय दीपरायण चौधरीको पनि अहिलेसम्म स्वाब परीक्षण हुन सकेको छैन । ‘मुख्यमन्त्रीको जिल्ला भोजपुरमा एकजनालाई कोरोना देखिँदा प्रदेशको टिम पठाएर धमाधम परीक्षण गरिरहेका छन्’, हाम्रो जिल्लामा २८ जना संक्रमित देखिए, हामी धेरैको परीक्षण हुन सकेको छैन । प्रदेशले खासै वास्ता गरेको महसुस भएन’, उनले भने ।

भुल्केस्थित आर्मी क्याम्प नजिकैको फुटबल मैदानमा स्वाब परीक्षणका लागि लाइनमा बसेका थुप्रै स्थानीयवासी यसैगरी निराश भएर फर्किने गरेका छन् ।

नूरी मस्सिदको छेउमै रहेका परिवारको समेत परीक्षण हुन सकेको छैन । ट्रेसिङ र टेस्टिङको काम प्रभावकारी हुन नसक्दा पूरै जिल्लावासी नै त्रस्त छन् ।

प्रभावित क्षेत्र भएकाले २१ सयभन्दा बढी नागरिकको परीक्षण तत्कालै गर्नुपर्ने स्थिति रहेको त्रियुगा नगरपालिकाका मेयर बलदेव चौधरी बताउँछन् । यद्यपि, अहिलेसम्म साढे ६ सय जनाको मात्र परीक्षण गरिएको छ । आइतबारदेखि स्वास्थ्य सामाग्री पनि सकिएको मेयर चौधरीले बताए । आवश्यक स्वास्थ्य सामाग्रीको अभावकै कारण धेरैको स्वाब लिन नपाइएको उनको भनाइ छ ।

‘परीक्षण गराउन नपाएको भन्दै दैनिक सयौंले गुनासो गरिरहेका छन् । पर्याप्त स्वास्थ्य सामाग्री भएको भए परीक्षणको दायरा बढाएर अलि छिट्टो भुल्केको लकडाउन खुकुलो पार्न हुन्थ्यो । जनजीवन कष्टपूर्ण बन्दै गएको छ’, उनले भने । यसअघि नगरपालिकाले संघ र प्रदेशलाई भुल्केसँगै १, २, ६ र १२ वडाका २५ हजार जनाको स्वाब परीक्षणका लागि अनुरोध गरेको थियो ।

१२ जनामा कोरोना भाइरस पुष्टि भएलगत्तै स्थानीय प्रशासनले नेपाली सेना, सशस्त्र र नेपाल प्रहरीको संयुक्त सुरक्षा टोली परिचालन गरेर भुल्केलाई सिल गरेको छ । गाउँ अहिले चकमन्न छ । स्थानीयवासी एउटा घरबाट अर्को घर जान पाउँदैनन् ।

आश्वासन मात्र बाँडेर गए मुख्यमन्त्री

गत शनिबार प्रदेश १ सरकारका मुख्यमन्त्री शेरधन राई, आन्तरिक मामिला तथा कानुनमन्त्री हिक्मत कार्की र सामाजिक विकासमन्त्री जीवन घिमिरे हेलिकप्टरमार्फत भुल्के आइपुग्दा स्थानीयवासीले राहत महसुस गरेका थिए । उनीहरूलाई लागेको थियो, ‘अब हाम्रो परीक्षण अलि छिट्टो हुन्छ ।’ तर, यस्तो भएन । मुख्यमन्त्री हेलिकप्टरमा आएर केही थान भीटीएम र बढी आश्वासन बाँडेर फर्किए । बरु मुख्यमन्त्री आएको भोलिपल्टै स्वास्थ्य सामाग्री सकियो ।

भुल्केका स्थानीयवासीसँगै नुरी मस्जिदमा आउनेहरु, गाईघाट र वरिपरिका गाउँका २ हजारभन्दा बढी मानिसको स्वाब परीक्षण तत्काल आवश्यक रहेको जिल्ला स्वास्थ्य कार्यालय उदयपुरका प्रमुख मोहन सुवेदी बताउँछन् ‘मुख्यमन्त्रीज्यूले शनिबार हेलिकप्टरमा आएर ९५ वटा भीटीएम दिएर जानुभयो,’ उनले भने ।

संघीय सांसदसँग गुनासो

जिल्लाका संघीय सांसदहरूले विपत्तिका बेलामा साथ नदिएको महसुस भुल्केवासीले गरेका छन् । ‘कति रातयता हामी निदाउन सकेका छैनौँ । कम्तीमा आफ्नो स्वास्थ्यको अवस्था के छ, थाहा पाउने हाम्रो चाहना हो । तर, माननीयज्यूहरूको ध्यान गएको पाइएन । गएको भए खोइ त हामीले परीक्षण गर्न पाएको ?’, स्थानीय विष्णु खड्काले प्रश्न गरे ।

विराटनगरतिर हिँडे मेयर

Image may contain: 1 person फाइल तस्वीर

स्वास्थ्य सामाग्रीको अभाव भएपछि त्रियुगाका मेयर चौधरी सोमबार मुख्यमन्त्रीलाई भेट्न विराटनगरतिर लागेका छन् । ‘मैले उदयपुरको स्थितिलाई गम्भीर रूपमा लिईदिनका लागि केन्द्र र प्रदेशलाई पटक–पटक आग्रह गरेँ । तर ध्यान दिइएको छैन । म आज मुख्यमन्त्रीलाई भेट्न जाँदैछु । उहाँसँग मेरा धेरै गुनासा छन् । धेरै समस्याको पोका उहाँको अगाडि फुकाउनु छ ।’

चरम समस्या

भुल्केमा अहिले कर्फ्युजस्तै कडाइ गरिएको छ । नेपाल प्रहरी, सशस्त्र प्रहरी र नेपाली सेनाको घेरामा छ । मानिसहरू एउटा घरबाट अर्को घर जान पाउँदैनन् । हुने खाने मानिनेहरूकै घरमा दाल, चामल सकिएको छ । ‘भकारीमा धान त छ तर कुटाउन मिल्न बन्द छ । पैसा छ, किनेर ल्याउन पाएका छैनौं, पसलमा समेत चामल सकिएको भन्छन् । हामीलाई राहत पनि दिँदैनन् । निकै गाह्रो दिन काटिरहेका छौँ’, स्थानीय आशादेवी चौधरीले भनिन् ।विपन्नको अवस्था त झनै टिठलाग्दो छ । कतिपय स्थानीयवासीले एक छाक मात्र खाएर बस्नुपरेको गुनासो गरेका छन् ।

मुस्लिमहरूको पैसा चल्न छाड्यो

भुल्के क्षेत्रका मुस्लिम समुदाय झन् ठूलो समस्यामा छन् । खानेकुरा किन्न जाँदा पसलेहरूले सामान दिँदैनन् । भुल्केमा मुस्लिम समुदायका ५७ परिवार बस्दै आएका छन् । यी सबै परिवार अहिले यस्तै समस्यासँग जुधिरहेका छन् । मुस्लिम टोल सुधार समितिका सचिव मोहम्मद अनिस राइन भन्छन्, ‘कोरोना भाइरस सर्छ भनेर पसलेले हाम्रो पैसासमेत चलाउन छाडे । गाउँमा १३ जना सुत्केरी छन्, पाँच गर्भवती छन् । उनीहरू पनि समस्यामा छन् ।’स्थानीय पत्रकार यदु ढकालले केन्द्र र प्रदेश सरकारले प्रभावित क्षेत्रप्रति बेलैमा ध्यान नदिए स्थिति भयावह हुनसक्ने बताए । ‘अब यहाँको समस्या कोरोना भाइरस मात्र रहेन । अरु थुप्रै समस्या थपिएका छन् । मासिनहरू भोकै पर्न थाले । बिरामीहरूले उपचार पाइरहेका छैनन् । किटनाशक औषधि र रासायानिक मलको अभावमा किसानहरूले ठूलै क्षति बेहोर्नुपर्ने देखिँदैछ । पशुचौपायाहरू भोकले गोठमै मर्ने स्थिति छ । बैंक तथा वित्तीय संस्थाहरू ठप्प छन् । खाद्यान्न किन्नका लागि पैसा हुनेले पनि निकाल्न पाएका छैनन्’, ढकालले भने ।

उदयपुरमा मात्र २८ जनामा कोरोना संक्रमण पुष्टि भएको छ । जबकि, देशभर संक्रमितको संख्या ५२ छ ।

त्रासको कारण

कोरोना संक्रमित १२ जना भारतीयको ... ५ वैशाखमा भुल्केस्थित नुरी मस्जिदमा रहेका ११ भारतीयसहित १२ जनामा कोरोना संक्रमण पुष्टि भयो । सुरूमा १६ जनाको परीक्षण गरिएकोमा ४ जनाको रिपोर्ट नेगेटिभ आयो । तर, दुई दिनलगत्तै ती ४ मध्ये एकजनामा कोभिड–१९ पोजेटिभ देखियो । ४ दिनपछि बाँकी ३ जनाको रिपोर्ट पनि पोजेटिभ आयो । यसरी मस्जिद आसपासका मानिसहरूको स्वाब नमूना (पीसीआर) संकलन गरी परीक्षण गर्दा अहिलेसम्म उदयपुरमा मात्र संक्रमितको संख्या २८ पुगेको छ । ‘संक्रमितको सम्पर्कमा आएका व्यक्तिलाई केही समयपछि पनि संक्रमण देखिने रहेछ । त्यसैले पनि यहाँका स्थानीय बढी त्रासमा छन् र छिटोभन्दा छिटो परिक्षणको माग गरिरहेका छन्’, पत्रकार ढकालले भने ।