२ वर्षपछि पायो बाजुराको कोल्टीले डाक्टर

A+ A A-

बाजुराको कोल्टी प्राथमिक स्वास्थ्य केन्द्रले २ बर्षपछि डाक्टर पाएको छ ।

सुदूरपश्चिम स्वास्थ्य निर्देशनालय दिपायलले सदरमुकाम मार्तडीको जिल्ला अस्पतालमा कार्यरत डा. राजुराज जोशीलाई कोल्टी प्राथमिक स्वास्थ्य केन्द्रको आइसोलेसन हेर्ने गरी खटाएको हो ।

बुढीनन्दा नगरपालिका अर्तगत रहेको सो सवास्थ्य केन्द्रमा कार्यरत डा. गणेश चौधरी समायोजन भएर गएपछि केन्द्रले २ वर्षयता डाक्टर पाएको थिएन ।

कोल्टी प्राथमिक स्वास्थ्य केन्द्रमा यो जिल्लाका बुढीनन्दा नगरपालिका, हिमाली गाउँपालिका, जगन्नाथ गाउँपालिका स्वामीकार्तिक खापर गाउँपालिका, छिमेकी जिल्ला हुम्ला र मुगुका बिरामी आउने गर्दछन् । डाक्टर नभएका कारण अहिले अहेबले सो केन्द्रको जिम्मेवारी सम्हालिरहेका थिए ।

डाक्टर नभएका कारण त्यहाँ जनताले चिकिसकीय सेवा लिन पाएका थिएनन् । डाक्टर अभावमा यहाँका विरामी सदरमुकाम मार्तडी वा धनगढी नेपालगञ्जमा गएर उपचार गर्न बाध्य छन् । तर, अब भने सामान्य उपचारका लागि ठूलो रकम खर्चदै मार्तडी, धनगढी, नेपालगञ्ज जानुपर्ने बाध्यता कमी आउने स्थानीय अनिल शाही विश्वास व्यक्त गर्छन् ।

प्रदेश स्वास्थ्य निर्देशनालयको निर्देशन समयमै नमानेका कारण जोशीमाथि कोल्टी प्राथमिक स्वास्थ्य केन्द्रमा आउन ढिलाई भएको आरोप लागेको छ । तर, उनले भने आफ्नो तयारीका कारण आउन केही ढिलो भएको बताएका छन् ।

महामारीको समयमा डाक्टर बिनाको आइसोलेसन राखेको भन्दै जिल्लामा बिरोध भएको थियो । कोल्टी प्राथमिक स्वास्थ्य केन्द्रमा १ जना मेडिकल अधिकृतको दरबन्दी छ ।

जोशी स्वास्थ्य सेवा विभागबाट खटाएर करार सेवामा कार्यरत छन् । उनले १ बर्ष दुर्गममा र बाँकी १ बर्ष सुगमका जिल्लामा काम गर्ने सम्झौता गरेर सरकारबाट पाउने छात्रवृति कोटामा अध्ययन गरेका हुन् ।

बुढीनन्दा नगरपालिकाले उक्त केन्द्रलाई आकस्मिक प्रसुती सेवा केन्द्रका रुपमा सञ्चालन गर्ने गरी परीवार नियोजन महाशाखाले यस बर्ष ३० लाख रुपैयाँ विनियोजन गरेको छ । तर, हालसम्म आकस्मिक प्रसुती सेवा केन्द्र सञ्चालनमा नआउँदा सेवा लिने महिला सदरमुकाम मार्तडी र नेपालगञ्ज गएर सेवा लिनुपर्ने बाध्यता छ ।

दरबन्दीमा रहेका १ जना स्थाई मेडिकल अधिकृत र आकस्मिक प्रसुती केन्द्र सञ्चालनका लागि अर्को तालिम प्राप्त डाक्टरको व्यवस्थापन गर्नुपर्ने माग उठ्दै आएको छ ।

प्रकाशित मिति: सोमबार, वैशाख १५, २०७७ ०९:०३