डडेल्धुरामा लकडाउनको मौका छोपी वन अतिक्रमण तीव्र, दर्जनौँ टहरा निर्माण

A+ A A-

कोरोना भाइरस नियन्त्रणका लागि घोषणा गरिएको लकडाउन लम्बिएसँगै डडेल्धुरामा वन अतिक्रमण बढ्न थालेको छ ।

जिल्लाको महाभारत पर्वत श्रृंखलाको महत्वपूर्ण वन क्षेत्रमा लकडाउनको मौका छोपी स्थानीयले दर्जनौँ टहरा निर्माण गरेका छन् । डिभिजन वन कार्यालयले ५ बर्षदेखि प्रस्तावित महाभारत संरक्षित वनका रुपमा संरक्षण गरिएको छ ।

तर, अहिले महत्वपूर्ण वनक्षेत्रमा स्थानीयले टहरा निर्माण गर्न थालेपछि अतिक्रमण बढ्न थालेको हो । अहिले यो वनमा लामो लकडाउनको फाइदा उठाउँदै वन अतिक्रमण गरि टहरा निर्माण गर्ने प्रतिस्पर्धा नै चलिरहेको छ ।

स्थानीयले निर्माणाधिन डडेल्धुरा सदरमुकामदेखि चिरकिट्टे हुँदै परशुराम नगरपालिका जोड्ने सडक छेउछाउमा दर्जनौ टहरा निर्माण गरेका बताइएको छ । महाभारत संरक्षित वन सम्बन्धि प्रस्ताव स्वीकृत नहुँदा यस क्षेत्रमा विगत देखिनै अतिक्रमण तीव्र गतिमा बढिरहेको छ ।

लकडाउनका बेला महाभारत वन क्षेत्रमा घरटहरा बनाउनुका साथै खनजोत सुरु गरिन थालिएको स्थानीय बताएका छन् ।

जिल्लाको अमरगढी, परशुराम नगरापलिका, आलिताल र भागेश्वर गाउँपालिकालाई जोड्ने महाभारत वन क्षेत्रमा दर्जनौ टहरा निर्माण गरिएको अमरगढी नगरपालिका–३ का वडाध्यक्ष गोविन्दराज बोहराले जानकारी दिए ।

उनका अनुसार पुरात्वात्विक महत्व बोकेका प्राचीन धर्मशालासमेत अतिक्रमणको चपेटामा परेका छन् ।

सुदूरपश्चिम प्रदेशका सबैजसो पहाडी जिल्लाबासी तराई झर्ने र कञ्चनपुरको ब्रम्हदेवमण्डीबाट नुन ल्याउने परम्परागत पैदलबाटो रहेको महाभारत वन क्षेत्रमा सयौँ बर्ष पुराना दर्जनौ धर्मशाला रहेका छन्।

महाभारत वन क्षेत्रमा रहेका ऐतिहासिक तथा धार्मिक स्थलसमेत अतिक्रमण गरेर घरटहरा निर्माण गरिन थालिएको स्थानीय शिक्षक वेदप्रकाश पनेरुले बताए ।

‘लकडाउननको मौका छोपेर वन क्षेत्रका विभिन्न स्थानमा घरटहरा निर्माण भइरहेका छन् ।’ उनले भने, ‘आलिताल गाउँपालिका–३ स्थित सामुदायिक वनका पदाधिकारीको संलग्नतामा तराइका जिल्लाबाट आएका मानिसले अतिक्रमण गरिरहेका छन् ।’

पुख्र्यौली घर डडेल्धुरा भएर अहिले तराइका जिल्लामा रहेका दर्जनौ व्यक्ति अतिक्रमणमा संलग्न रहेको उनले बताए ।

‘तराइमा घरजग्गा र थुप्रै सम्पत्ती भएका धनाढ्य व्यक्तिबाट लकडाउनका बेला वन अतिक्रमण गरिन थालिएको हो’ पनेरुले भने, ‘लकडाउनका बेला वनकर्मी नभएकाले अतिक्रमणकारीलाई सहज भएको छ ।’

महाभारत वन क्षेत्र मात्रै नभएर चुरे क्षेत्रमा पनि वन अतिक्रमण गरेर घरजग्गा बनाइन थालिएको स्थानीयले बताएका छन् ।

डिभिजन वन कार्यालय डडेल्धुराका वन अधिकृत विष्णुप्रसाद आचार्यले संवेदनशील वन क्षेत्रमा लकडाउनका बेला वन विनाश र अतिक्रमण भइरहेको जानकारी पाएको बताए ।

उनले विनाश तथा अतिक्रमण रोक्नका लागि वनकर्मीको टोली त्यस क्षेत्रमा पठाउने तयारी भइरहेको जानकारी दिए ।

प्रकाशित मिति: आइतबार, वैशाख १४, २०७७ ०९:५१