सुदूरपश्चिममा १२ हजारभन्दा बढीको परीक्षण, ९ जनाको आरडीटी रिपोर्ट पोजेटिभ

A+ A A-

सुदूरपश्चिम प्रदेशका ९ जनार्को र्‍यापिड डाइग्नोस्टिक (आरडीटी) टेस्ट रिपोर्ट पोजेटिभ आएको छ ।

प्रदेशभर १० हजार २ सय ४ जनाको आरडीटी परीक्षण गरिसकिएको छ । बाजुरा, कैलाली कञ्चनपुर र दार्चुलामा २/२ जना तथा अछाममा १ जनामा पोजेटिभ रिपोर्ट आएको प्रदेश स्वास्थ्य आपतकालीन केन्द्र डोटीले जनाएको छ ।

ती ९ जना मध्ये ६ जनाको पीसीआर परीक्षण गर्दा रिपोर्ट नेगेटिभ आएको छ । अन्य ३ जनाको पीसीआर परीक्षण गर्न बाँकी रहेको केन्द्रले जनाएको छ । यस्तै, केन्द्रले सुदूरपश्चिम प्रदेशभरि ७६ जनाको रिपोर्ट ’इरर’ आएको जनाएको छ ।

बझाङमा ३६, कञ्चनपुरमा २५, डडेल्धुरामा १०, अछाम र बाजुरमा २/२ तथा दार्चुलामा १ जनाको रिपोर्ट ’इरर’ आएको हो । सुदूरपश्चिममा हालसम्म २ हजार ६ सय ६५ पीसीआर परीक्षण गरिएकोमा ५ जनामा संक्रमण भएको पुष्टि भएको थियो ।

तीमध्ये ४ जना उपचारपछि निको भएर घर फर्किसकेका छन् । धनगढीस्थित सेती प्रादेशिक अस्पतालमा १ महिलाको उपचार भइरहेको छ । उनको स्वास्थ्य अवस्था सामान्य रहेको अस्पतालले जनाएको छ ।

नमुना संकलन र परीक्षण सुस्त

सुदूरपश्चिम प्रदेशमा नमुना संकलन र कोरोना परीक्षण सुस्त गतिमा भइरहेको छ । संक्रमित निको भएर घर फर्किने क्रम सुरु भएसँगै नमुना संकलन र परीक्षण सुस्ताएको हो ।

प्रदेशका शंकास्पद र संक्रमितको सम्पर्कमा पुगेका व्यक्तिहरुको समेत परीक्षण हुन सकेको छैन । पछिल्लो ५ दिनमा धनगढी प्रयोगशाला र राष्ट्रिय जनस्वास्थ्य प्रयोगशालामा गरी सुदूरपश्चिम प्रदेशका १ सय ७० जनाको मात्रै पीसीआर विधिबाट परीक्षण गरिएको छ।

वैशाख ७ र ८ गते ११ र ११, ९ गते सय जना, १० गते १४ र ११ गते १३ जनाको मात्रै परीक्षण भएको प्रदेश स्वास्थ्य आपतकालीन केन्द्र डोटीले जनाएको छ। शुक्रबार सुदूरपश्चिम प्रदेशका २१ जनाको मात्रै पिसिआर विधिमार्फत परीक्षण गरिएको छ ।

उनीहरू सबैको रिपोर्ट नेगेटिभ आएको छ । शुक्रबार १९ जनाको मात्रै पिसिआर विधिमार्फत परीक्षणका लागि नमुना संकलन गरिएको छ। परीक्षणका लागि नमुना नै संकलन नहुँदा समस्या भएको धनगढीस्थित कोरोना परीक्षण प्रयोगशालाका इन्चार्ज रमेश शाहीले जानकारी दिए । थ्रोट स्वाबको पर्याप्त नमुना नै प्रयोगशालामा नपुगेको बताउँदै उनले प्रयोगशाला स्थापनाको भएको दिनदेखि नै क्षमताअनुसार परीक्षण गर्न नसकिएको बताए ।

प्रदेश जनस्वास्थ्य प्रयोगशालाकी निमित्त प्रमुख अस्मिता सापकोटाले भने थ्रोट स्वाब संकलनका लागि भिटिएमको अभाव रहेकोमा बिहीबार साँझ मात्रै ८ सय वटा भिटिएम धनगढी पुर्‍याइएको बताइन् । केही दिनयता र्‍यापिड टेस्टको क्रम पनि सुस्ताएको छ ।

अघिल्लो सातासम्म दैनिक हजार जना बढीर्को यापिड टेस्ट गरिएकोमा शुक्रबार ६ सय ९१ जनाको मात्रै र्‍यापिड टेस्ट गरिएको जनाइएको छ ।

प्रकाशित मिति: शनिबार, वैशाख १३, २०७७ १६:१५