जव मन्त्रीले परीक्षा हलमा अपशव्द बोले...

A+ A A-

एसईई परीक्षा केन्द्रको निरीक्षणमा हिडेका प्रदेश २ का सामाजिक विकास मन्त्री नवल किशोर शाहले धनुषाका एक केन्द्राध्यक्ष र निरीक्षकमाथि अपशव्द प्रयोग गर्दै गाली गरेका छन् ।

धनुषाको सरस्वती नमूना उच्च माध्यामिक विद्यालयमा निरीक्षणको क्रममा मन्त्री शाहले आज केन्द्राध्यक्षसहित परीक्षा हलमा गार्ड बसेका विद्यालयका शिक्षकलाई अपमानजनक शब्द प्रयोग गर्दै गाली गरेका छन् ।

बिहान ९ बजे विद्यालय पुगेका मन्त्रीले निरीक्षकको परिचयपत्रमा फोटो नभएको भन्दै गालीगलौज गरेका हुन् । विद्यालयका शिक्षक बेचन रामले भने, ‘उहाँले हिन्दीमा गाली गर्नुभयो ।’ बेचन रामका अनुसार मन्त्रीले परिचय पत्रमा फोटो नराखेको निहुमा आफुलाई ‘संस्कार नभएको चमार दलित’ भनेर हप्काएको बताए ।

बेचन रामले आफू विद्यालय शिक्षक भएको भन्दै मन्त्रीलाई परिचयपत्र पनि देखाएका थिए ।

निरीक्षकको परिचयपत्रमा फोटो भए/नभएको हेर्दै मन्त्री

त्यस्तै मन्त्री शाहले केन्द्राध्यक्ष सत्य नारायण मण्डललाई पनि हप्कीदप्की गरेका छन् । केन्द्राध्यक्ष मण्डलले भने, ‘मलाई पनि आएर गाली गर्नुभयो । तपाईको जागिर खाइदिन्छु । तपाईलाई हटाइदिन्छु । बेवकुप भनेर हप्काउनुभयो ।’

मण्डलका अनुसार मन्त्रीले आफूलाई केन्द्राध्यक्षबाट हटाइदिने धम्की दिँदै यस्तालाई कसले केन्द्राध्यक्ष बनाएको भनेर हप्काए । विद्यार्थीको भविष्यमाथि खेलवाड गर्न नहुने भन्दै मण्डलले मन्त्रीको हर्कत सहेरै भएपनि परीक्षा सञ्चालन गरेको बताए ।

परीक्षा केन्द्रमा चार जनाको परिचयपत्रमा फोटो थिएन । फोटो नहुनेमा शंकर दास, सीमाकुमारी कर्ण, विनिता यादव र बेचन राम हुन् ।

मन्त्रीको व्यवहारपछि नेपाल शिक्षक संघ धनुषाले पत्रकार सम्मेलन गर्दै मन्त्रीको राजीनामा मागेको छ । संघका अध्यक्ष राम सिनेही यादवले मन्त्रीको मानसिक सन्तुलन गुमेको हुनसक्ने भन्दै उक्त व्यवहारप्रति कटु आलोचना गरेका छन् ।

मन्त्रीको व्यवहारबारे मन्त्री आफै केही नबोलेपनि उनका स्वकीय सचिव राजकुमार यादवले भने, ’कतिपयको फोटो नभएका कारण मन्त्री साहले सचेत गराउनु भएको हो । चमार वा दलित भनेर हेपेको भने होइन ।’