एकाबिहानै घरमा थर्मागन बोकेका सांसद आएपछि..

A+ A A-

सुदूरपश्चिम प्रदेशका सांसद कर्णबहादुर मल्ल शुक्रबार बिहान घरमै आएर थर्मागनले ज्वरो नाप्न थालेपछि डडेल्धुरा गन्यापधुरा गाउँपालिका–१ भात्काँडा बजारकी ९० वर्षीया बृद्धा मंगलीमाया राईले ओछ्यानबाटै आर्शिवाद दिइन् ।

कोरोना भाइरसको महामारीबाट कुनै पनि नेपालीले अकाल मृत्यु भोग्नु नपरोस् भन्दै वृद्धा राईले विपद्का बेला जनताको घरदैलोमा पुगेर साथ दिएको भन्दै सांसद मल्ललाई धन्यवाद दिइन् ।

कोराना भाइरसको संक्रमण रोकथाम गर्न सरकारले जारी गरेको लकडाउन अवधि अनिश्चित बनेपछि सांसद मल्लले समस्यामा परेका विपन्न नागरिकलाई राहात वितरण गरिरहेका छन् भने जिल्लास्थित स्वास्थ्य सेवाप्रदायक सरकारी निकायलाई आवश्यक सामाग्रीसमेत वितरण गरिरहेका छन् ।डडेल्धुराबाट प्रदेशसभामा निर्वाचित सांसद तथा नेपाली कांग्रेस डडेल्धुराका सभापति मल्लले कोरोना महामारी नियन्त्रणका लागि लकडाउन घोषणा हुनासाथ डडेल्धुराका सात वटै स्थानीय तहलाई आठ हजार थान चाईनिज मास्क वितरण गरेका थिए ।

कोरोना महामारी रोकथामका लागि सांसद विकास कोषको सबै रकम खर्च गरिनुपर्ने प्रस्ताव सुदूरपश्चिम प्रदेशसभामा राखेका सांसद मल्लले सो प्रस्ताव स्वीकृत हुनसक्ने विश्वास व्यक्त गर्दै हाल जिल्लावासीहरुलाई आफूले सक्दो सहयोग गरिरहेको बताए ।

आफैंले थर्मागन बोकेर गाउँबस्तीमा पुगेर स्थानीयको ज्वरो नापिरहेका सांसद मल्लले बिहीबार मात्र आठ थान पीपीई स्वास्थ्य कार्यालय डडेल्धुरालाई हस्तान्तरण गरेका छन् ।

भात्काँडास्थित प्रहरी चौकीमा कार्यरत प्रहरीलाई ग्लोब र मास्क वितरण गरेका उनले जिल्लास्थित सुरक्षा निकायका कर्मचारीका लागि भने ग्लोब र मास्क उपलब्ध गराउन नसकिएकोप्रति चिन्ता व्यक्त गरे ।

‘रातदिन महामारी रोकथामका लागि खटिएका सुरक्षाकर्मीलाई मास्क र पञ्जासमेत उपलब्ध हुन सकेको छैन् ।’ उनले भने, ‘महामारीका बेला खटिरहेका स्वास्थ्यकर्मी, सुरक्षाकर्मी, एम्बुलेन्स चालक सबैलाई आवश्यक सामाग्री उपलब्ध गराउन व्यक्तिगत रूपमा सक्दो प्रयास गर्ने छु ।’

सांसद मल्लले दुई थान थर्मागन गन्यापधुरा गाउँपालिकालाई हस्तान्तरण गरेका छन् । आवश्यकताअनुसार अन्य स्थानीय तहलाई समेत एक÷एक थान र थप चाहिएजति थप थर्माेगन उपलब्ध गराउन सक्ने उनले बताए ।

सांसद मल्लले विपन्न परिवारलाई राहत र सरकारी निकायलाई स्वास्थ्य सामाग्रीहरू नेपाली कांग्रेस डडेल्धुरामार्फत हस्तान्रण गरिरहेका छन् ।

नेपाली कांग्रेस डडेल्धुराले सूचना जारी गर्दै स्वास्थ्य सुरक्षा सामाग्रीहरू मास्क, पञ्जा, सेनीटाईजर, साबुन, टुथब्रस नपुगेका तथा पाउन नसकेका जिल्लावासीले नेपाली कांग्रेस डडेल्धुराको कार्यालयका साथै स्थानीय तहमा रहेका पार्टी इकाईहरूमा सम्पर्क गर्न अनुरोध गरेको छ ।

नेपाललाई हिन्दु राष्ट्र घोषणा गरिनुपर्ने अडान राख्दै आएका सांसद मल्लले डडेल्धुरा जिल्लाका विभिन्न मन्दिरहरूमा पुगेर संकल्प पाठ गराउन थालेका छन् ।

प्रकाशित मिति: शुक्रबार, वैशाख १२, २०७७ २१:३५