पाटेबाघ देखिएपछि महाभारत वनक्षेत्रमा पुनः क्यामेरा ट्रयापिङ

A+ A A-

डडेल्धुराको महाभारत वनक्षेत्रमा पुनः क्यामेरा ट्रयापिङ सुरु भएको छ । महाभारत वन क्षेत्रमा पहिलोपटक रोयल बंगाल टाइगर(पाटेबाघ) देखिएपछि पुनः क्यामेरा ट्रयापिङ सुरु गरिएको हो ।

जिल्लाको महाभारत क्षेत्रको भागेश्वर काेरिडोरमा समुद्री सतहदेखि २५०० मिटरको उचाइमा पाटेबाघको इमेज ट्रयाप भएको थियो । ६ मार्चदेखि ६ अप्रिलसम्म महाभारत वन क्षेत्रमा वन्यजन्तुको अध्ययन गर्ने क्रममा पाटेबाघ क्यामेरा ट्रयापिङमा परेको थियो ।

वन विभाग, विश्व वन्यजन्तु कोष (डब्लूडब्लूएफ) संरक्षणकर्मीहरूसँग भेरिफाई गर्दा नेपालको त्यति उचाइमा पाटेबाघ भेटिएको पहिलो घटना भएको पुष्टि भएको थियो । दोस्रो चरणको अध्ययन गर्नका लागि ३० जोडी क्यामेरा जडान गरिएको डिभिजन वन कार्यालय डडेल्धुराका वन अधिकृत विष्णुप्रसाद आचार्यले जानकारी दिए ।

अधिकृत आचार्यका अनुसार तराई तथा भूपरिधि कार्यक्रम, विश्व वन्यजन्तु कोष र डिभिजन वन कार्यालय डडेल्धुराको आयोजनामा भागेश्वर काेरिडोरमा पाटेबाघलगायत अन्य वन्यजन्तुको उपस्थितिको दोस्रो चरणको अध्ययन गर्नका लागि क्यामेरा जडान गरिएको हो ।

यस पटकको अध्ययन परशुरामधाम सव डिभिजनअन्तर्गत पर्ने वनक्षेत्र (महाकाली नदीको किनारासम्म र साविकको शीर्ष गाविस) र भागेश्वर सवडिभिजनअन्तर्गतको रुपाल क्षेत्रसम्म गरिने डिभिजन वन कार्यालय डडेल्धुराका वन अधिकृत आचार्यले जानकारी दिए।

‘वन कार्यालयको तर्फबाट ५ जना सहयोगी र तराई तथा भूपरिधि आयोजनाको तर्फबाट ५ जना क्यामेरा ट्रयापिङ प्राविधिक खटाइएको छ। शुक्रबारदेखि एक महिनाका लागि ३० जोडी क्यामेरा राखिनेछन्।’ उनले भने, ‘ट्रयापिङ गर्नमा स्थानीय सरकारका प्रतिनिधि, स्थानीय सुरक्षा निकाय, राजनीतिक दल, संचारकर्मी, नागरिक समाज, सम्बन्धित सामुदायिक वनका उपभोक्ताहरुलाई सहयोग गर्न जरुरी छ।’

यसअघि क्यामेरा ट्रयापमा रेड फक्स, चितुवा, घोरल, लार्ज इन्डिएन सिभेट, लिओपार्ड क्याट, दुम्सी, मृगका प्रजाति र चरालगायतको तस्वीरहरू कैद भएका थिए।

प्रकाशित मिति: शुक्रबार, वैशाख १२, २०७७ १७:५४