केपी ओली कुर्सीमा रहुन्जेल लोकतन्त्रमाथि खतरा : बाबुराम भट्टराई

A+ A A-

पूर्वप्रधानमन्त्री बाबुराम भट्टराईले प्रधानमन्त्री केपी शर्मा ओली कुर्सीमा रहुन्जेल लोकतन्त्रमाथि खतरा रहेकाले सवाधान हुन आग्रह गरेका छन् । शुक्रबार बसेको मन्त्रिपरिषद् बैठकले विवादित बनेका दुवै अध्यादेश फिर्ता लिने निर्णय गरेपछि भट्टराईले सामाजिक संजाल ट्विटरमार्फत यस्तो प्रतिक्रिया दिएका हुन् ।

शुक्रबार दिउँसो बसेको मन्त्रिपरिषदको बैठकले दुवै अध्यादेश फिर्ता लिने निर्णय गरेको प्रधानमन्त्री केपी शर्मा ओलीका प्रेस सल्लाहकार सूर्य थापाले जानकारी दिए । दुवै अध्यादेश संविधानको धारा ११४ (ख) बमोजिम फिर्ता गर्ने निर्णयका साथ राष्ट्रपतिज्यूसमक्ष सिफारिश गर्ने निर्णय भएको जानकारी दिएका हुन् ।

कोरोना भाइरस संक्रमणको महामारीका बेला सरकारले अध्यादेश ल्याएपछि त्यसको चौतर्फी विरोध भएको थियो । पार्टीभित्र छलफल नगरी अध्यादेश ल्याएपछि प्रधानमन्त्री ओली घेराबन्दीमा परेका थिए । शुक्रबारको बैठकमा प्रधानमन्त्री ओलीले पार्टी र जनताको मतको सम्मान गर्दै विधेयक फिर्ता लिनुपरेको बताएका सहभागी एक मन्त्रीले शिलापत्रलाई बताए ।

प्रधानमन्त्री ओलीले अध्यादेश फिर्ता लिने निर्णयपछि उनको कामकारबाहीका विषयमा पार्टी भित्र र बाहिरबाट प्रश्‍न उठेको छ । यसैबीच पूर्वप्रधानमन्त्री भट्टराईले ओलीबाट लोकतन्त्र नै खतरामा रहेको आरोप लगाएका छन् । उनले समाजवादीतर्फ हानेको अध्यादेशको गोली आफैँतिर फर्किएपछि घाइते भएका प्रधानमन्त्री ओलीले अध्यादेश फिर्ता लिएको टिप्पणी गरेका छन् ।

समाजवादीतर्फ हानेको अध्यादेशको गोली आफैतिर फर्केर घाइते भएपछि श्री ७ खड्ग शमशेर बन्ने सपना देखेका @kpsharmaoli ले अध्यादेश फिर्ता लिएछन्।यसवीचमा उनी र उनको आडमा भएको गम्भीर अपराध लुक्दैन र त्यसको छानवीन/कार्वाही हुनैपर्छ! उनी कुर्सीमा रहुन्जेल लोकतन्त्रमाथि खतरा रहिरहन्छ।सावधान! उनले ट्विटमा भनेका छन् ।

यसअघि नेकपाकै सांसद राकुमारी झाँक्री र नेता विष्णु रिजालले पनि प्रधानमन्त्रीमाथि नैतिक प्रश्‍न राखेका थिए । सांसद झाँक्रीले मन्त्रिपरिषद्को निर्णयलगत्तै अध्यादेश फिर्ताले अच्चम परेको प्रतिक्रिया दिएकी छन् । उनले सरकारको निर्णयले सम्पूर्ण राजनीतिक र नैतिक प्रश्न सकिन्छ ? भन्दै प्रश्न गरेकी छन् ।

त्यस्तै, नेकपाकै नेता विष्णु रिजाल अध्यादेशको पक्षमा वकालत गरेका व्यक्तिप्रति व्यंग्य गरेका छन् । त्यही भएर म भन्छु- लाहुरेभन्दा गुन्टा अगाडि उफ्रिएको सुहाउँदैन । ‘अध्यादेश आजको आवश्यकता हो, यो फिर्ता गर्नलाई ल्याएको होइन, फिर्ता हुँदैन, यसले लोकतन्त्रलाई बलियो बनाउँछ, कानुनले दल बन्ने होइन’ भनेर वकालत गर्नेहरूलाई अब रफ्फु भर्न परेन फसाद ! उनले ट्विटमा भनेका छन् ।

प्रकाशित मिति: शुक्रबार, वैशाख १२, २०७७ १५:१३