उपचारपछि घर फर्किए ७ लाख १७ हजार कोरोना संक्रमित

A+ A A-

विश्वव्यापी महामारीका रुपमा फैलिएको कोरोना भाइरस (कोभिड–१९) बाट संक्रमित भएका ७ लाख १७ हजार बढी व्यक्ति उपचारपछि घर फर्किएका छन् ।

कोरोनाको संक्रमणबाट मुक्त हुनेमा सबैभन्दा बढी जर्मनीमा छन् । त्यहाँ १ लाख ५० हजार संक्रमितमध्ये ९९ हजार ४ सय व्यक्ति निको भइसकेका छन् ।

निरन्तर संक्रमण घटिरहेको जर्मनीमा ४६ हजार व्यक्ति मात्र अब मुक्त हुन बाँकी छन् । त्यहाँ अहिले झण्डै ३ हजार व्यक्तिको अवस्था गम्भीर रहेको छ ।

चीनमा ८२ हजार ७ सय संक्रमतिमध्ये ७७ हजार २ सय बिरामी उपचारपछि घर फर्किसकेका छन् ।

वर्ल्डोमीटरका अनुसार चीनमा अहिले ९ सय ५९ व्यक्तिको उपचार भइरहेको छ । जसमध्ये ६३ जनाको अवस्था गम्भीर रहेको छ ।

स्पेनमा संक्रमितको संख्या २ लाख ८ हजार नाघेको छ । जसमध्ये झण्डै ८६ हजार व्यक्ति उपचारपछि घर फर्किएका छन् ।

कोरोनाबाट सबैभन्दा बढी प्रभावित अमेरिकामा ८४ हजार व्यक्ति संक्रमणबाट मुक्त भएका छन् । त्यहाँ संक्रमितको संख्या सबैभन्दा बढी ८ लाख ४८ हजार नाघेको छ ।

इटालीमा ५४ हजार, फ्रान्समा ४० हजार ६ सय, इरानमा ६३ हजार, ब्राजिलमा २५ हजार, स्विटजरल्याण्डमा १९ हजार, टर्कीमा १६ हजार, क्यानाडामा १३ हजार, अष्ट्रेलियामा ११, आयरल्याण्डमा ९ हजार संक्रमित उपचारपछि घर फर्किसकेका छन् ।

दक्षिण एसियाकाे भारतमा ४ हजार ३ सय, पाकिस्तानमा २ हजार, बंगलादेशमा ९२, अफगानिस्तानमा १६६, श्रीलंकामा १०५, माल्दिभ्समा १६, नेपालमा ७ र भुटानमा २ जना निको भएका छन् ।

गत वर्षको डिसेम्बरमा चीनबाट फैलिएको कोरोनाबाट विश्वका २१० का देश प्रभावित भइसकेका छन् । बिहीबार बिहानसम्म २६ लाख ३६ हजार व्यक्तिमा कोरोना संक्रमणको पुष्टि भएको छ । जसमध्ये १ लाख ८४ हजार व्यक्तिले ज्यान गुमाएका छन् ।

प्रकाशित मिति: बिहीबार, वैशाख ११, २०७७ ०७:३७