प्रदेश सरकारले गर्‍यो जिससका प्रमुखसँग भर्चअल बैठक

A+ A A-

कर्णाली प्रदेश सरकारले कर्णाली १० वटै जिल्लाका जिल्ला समन्वय समितिका प्रमुखसँग भर्चुअल बैठक गरेको छ । मुख्यमन्त्री महेन्द्रबहादुर शाही, माननीय आर्थिक मामिला तथा योजनामन्त्री प्रकाश ज्वाला र आन्तरिक मामिला तथा कानुन मन्त्री नरेश भण्डारीले कर्णालीका १० वटै जिल्लाका समन्वय प्रमुखसँग भर्चुअल बैठक गरेका हुन् ।

१० वटै जिल्लाका जिल्ला समन्वय प्रमुखसँग कोरोना भाईरस (कोभिड-१९) को रोकथाम, नियन्त्रण तथा उपचारका लागि प्रदेश सरकार र स्थानीय तहहरूले गरेका कामहरुका सम्बन्धमा कर्णाली प्रदेश सरकारले जानकारी लिएको मुख्यमन्त्रीको सचिवालयले जनाएको छ ।

अर्चुअल भिडियो कन्फ्रेन्स बैठक कर्णालीमा कोरोना संकटको सामना गर्न प्रदेश सरकार र स्थानीय तहहरूले गरिरहेका कामहरूलाई प्रभावकारी बनाउन, आवश्यक समन्वय कायम गर्न, आगामी दिनमा अख्तियार गर्नुपर्ने नीति तथा योजना निर्माण गर्न प्रदेश सरकारले स्थानीय तहलाई निर्देशन दिएको मुख्यमन्त्रीको सचिवालयले जानकारी दिएको छ ।

मुख्यमन्त्री महेन्द्रबहादुर शाहीले कर्णालीका सबै स्थानीय तहसँग समन्वय गर्दै कोरोनाका विरुद्ध उच्च मनोवल, धैर्यता र आवश्यक सावधानी अपनाई प्रतिकार्यको समन्वय गर्न जिल्ला समन्वय प्रमुखहरुलाई आग्रह गरेको सचिवालय सदस्यले बताए । ‘आवश्यक बजेट, स्वास्थ्य सामाग्रि, अत्यावश्यक खाद्य वस्तुलगायतको व्यवस्थापनमा प्रदेश सरकारले गर्छ ।’ उनले जिल्ला समन्वय समितिका प्रमुखहरुलाई भने, ‘तपाईहरूले पनि स्थानीय तहहरूलाई त्यसमा लाग्नका लागि निर्देशन दिनुहोस ।’

प्रकाशित मिति: सोमबार, वैशाख ८, २०७७ १७:१५