एनआईसी एशियाले दिने भयो अनलाइन डेलिभरी व्यवसायीलाई क्यूआर काेड

A+ A A-

एनआईसी एशिया बैंकले अत्यावश्यक सामग्री घरघरमै डेलिभरी गरिदिने अनलाइन सपिङ कम्पनीलगायत डेलिभरी कम्पनीहरूलाई क्यूआर कोड प्रदान गर्ने भएको छ ।

बैंकले कोरोना भाइरसको संक्रमणका कारण देश नै लकडाउनमा रहेको अवस्थामा संक्रमणबाट जोगिन घरमै क्वारेन्टाइन/आइसोलेसनमा बसिरहेका आफ्ना ग्राहकहरूका लागि अत्यावश्यक खाद्य सामग्री घरमै पुर्‍याइदिने व्यवसायीहरूलाई क्यूआर कोड प्रदान गर्ने भएको हो ।

विश्वभर महामारीको रूपमा फैलिएको कोरोना भाइरसको संक्रमण कम गर्न नेपाल सरकारले जारी गरेको लकडाउनले देशभर व्यवसाय, उद्योग, कारखानालगायतका गतिविधि बन्द रहेको अवस्थामा चालिएको यस्तो कदमले ग्राहकहरूलाई सहज हुने विश्वास बैंकले लिएको छ ।

बैंकद्वारा जारी विज्ञप्तिमा भनिएको छ, ‘धेरै समयको लकडाउनका कारण हाम्रा ग्राहकहरूसँग नगद अभाव हुन सक्ने तथा एटीएमसम्म पुग्नसमेत संक्रमणको त्रासका कारण नसकिरहेको अवस्थालाई मध्यनजर गर्दै यस्तो योजना ल्याएका हौँ ।’

बैंकका अनुसार ग्राहकहरूले मोबाइल बैंकिङको प्रयोग गरी क्यूआर कोडबाट सामग्रीहरूको मूल्य भुक्तानी गरेपछि रकम सिधै सम्बन्धित व्यवसायीको बैंक खातामा जम्मा हुन्छ ।

व्यवसायीले क्यूआर कोड लिने कसरी ?

१. सर्वप्रथम व्यवसायीहरूले एनआईसी एशिया बैंकको इमेल ठेगाना [email protected]मा आफूले गर्ने व्यवसायको प्रकृति खुलाई क्यूआर सेवा लिन इच्छुक रहेको कुरा इमेल गर्ने । उक्त इमेलमा सम्बन्धित व्यवसायीले आफ्नो कम्पनीको खाता नम्बर, नाम, इमेल र सम्पर्क नम्बरसमेत उल्लेख गर्नुपर्नेछ ।

२. बैंकले उक्त इमेल पाइसकेपछि सम्पर्क नम्बरमा बैंकको सम्बन्धित विभागबाट व्यवसायीलाई सम्पर्क गर्नेछ ।

३. बैंकले व्यवसायीलाई सम्पर्क गरेपश्चात उक्त क्यूआर कोड प्रदान गर्न आवश्यक फाराम भर्न व्यवसायीलाई इमेलमार्फत लगाउनेछ ।

४. व्यवसायीले सम्बन्धित व्यक्तिको हस्ताक्षर गराई कम्पनीको छापसमेत लगाएर बैंकलाई इमेलमार्फत जानकारी गर्नुपर्नेछ ।

५. त्यसपछि बैैंकले आवश्यक प्रक्रिया पूरा गरी व्यवसायीलाई सुरक्षित उपाय अपनाई इमेलमार्फत क्यूआर कोड प्रदान गर्नेछ । साथै, सम्बन्धित व्यवसायीले बैंकबाट प्राप्त क्यूआर कोडबाट स्वयम् प्रिन्ट गरी ग्राहक महानुभावहरूसँगबाट मोबाइल बैंकिङमार्फत भुक्तानी लिन सक्नेछन् ।

साथै, कोरोना महामारी समाप्त भई आवतजावत सामान्य भइसकेपछि बैंकले नियमित रूपमा प्रदान गर्ने क्युआर स्ट्यान्डी व्यवसायीहरूलाई प्रदान गर्नेछ ।

त्यस्तै, नेपालभरका कुनै बैंक तथा वित्तीय संस्थाहरूको कार्ड वाहकले एनआईसी एशिया बैंकका ४५० भन्दा धेरै एटीएम प्रयोग गर्दा शुल्क नलाग्ने र यस बैंकको कार्डवाहकले अन्य कुनै बैंक तथा वित्तीय संस्थाहरूको एटीएम प्रयोग गर्दा कुनै शुल्क नलाग्ने व्यवस्था गरिएको छ ।

हाल यस बैंकले मुलुकभर रहेका आफ्ना ३१९ शाखा कार्यालय, ४६१ एटीएम, १०८ वटा एक्स्टेन्सन काउण्टर एवं ६१ वटा शाखारहित बैंकिङमार्फत बैंकिङ सेवा प्रदान गर्दै आइरहेको छ । २१ लाखभन्दा बढी ग्राहक रहेको यस बैंकका प्रमुख वित्तीय परिसूचकहरू अत्यन्त उत्साहप्रद रहेका छन् ।

गतआवमा करिब ३ अर्ब १५ करोड रुपैयाँभन्दा बढी राजस्व भुक्तानी गरिसकेको यस बैंकले बैंक तथा वित्तीय संस्थाहरू नपुगेका ३४ भन्दा बढी स्थानीय तहमा आफ्नो शाखा विस्तार गरी आमसर्वसाधारणलाई बैंकिङ सेवा दिइरहेको छ ।

प्रकाशित मिति: आइतबार, वैशाख ७, २०७७ २०:५१