जटिल बन्दै अर्बपतिमाथिको अनुसन्धान, कहाँ हराए २१ चैतमा चीनबाट भित्र्याएका सामान ?

जटिल बन्दै अर्बपतिमाथिको अनुसन्धान, कहाँ हराए २१ चैतमा चीनबाट भित्र्याएका सामान ?

A+ A A-

अर्बपति व्यापारी सुलभ अग्रवालमाथिको अनुसन्धान थप लम्बिएको छ । १२ दिन अनुसन्धान गर्दा पनि नसकिएपछि काठमाडौं प्रहरी परिसरले तेस्रो पटक १० दिनका लागि थुनामा राखेर अनुसन्धान गर्ने म्याद पाएको छ ।

बढीमा २८ दिन अनुसन्धानका लागि थुनामा राख्न सकिने व्यवस्थामा १२ दिनको समय गुजारिसकेको छ भने थप १० दिनको समय पाएको छ । अनुसन्धान सकेपछि सुलभलाई के कारबाही गर्ने भन्ने अधिकार जिल्ला प्रसाशन कार्यालयसँग हुन्छ ।

जटिल बन्दै अनुसन्धान

सुलभले दिएको बयानका आधारमा उनले १०/१५ लाख रुपैयाँको मात्रै लोभ गरेको देखिएको छ । अर्बपति व्यापारीले सीमित लाखका लागि लोभ देखाएर कालो बजारी गरेपछि अनुसन्धानको दायरा फराकिलो बनाउनुपर्ने भएको प्रहरीको बुझाइ छ । सुलभले आफूले १२ सय थान मात्रै थर्मल गन ल्याएको दाबी गरेका छन् । तर, प्रहरीमा आएको सुराकीअनुसार सुलभले २० हजार थर्मल गन ल्याएका छन् ।

प्रहरीको अनुसन्धानले पनि अझै थप थर्मल गन पत्ता लगाउन सकेको छैन । सुलभको नाममा १२ सय थर्मल गन आए पनि अन्यको नाममा पनि आएको हुन सक्ने प्रहरीको बुझाइ छ । ‘हामी अहिले पनि मात्रै १२ सय थान हुन भन्नेमा विश्‍वस्त हुन सकेका छैनौँ । तर, १२ सय थानभन्दा बढी आएको आएको हो कि हैन ? आएको भए कहाँ छ ? अनुसन्धान भइरहेको छ,’ प्रहरी स्रोतले भन्यो ।

सुलभले अनुसन्धानका क्रममा १ हजार थान थर्मल गन बिक्री गरिसकेको बिल भर्पाइ पनि दिएका छन् । प्रहरीको शंका बिल भर्पाइमा पनि छ । ‘बिल भर्पाइ नक्कली हो कि सक्कली हो भन्नेमा विश्‍वस्त हुन सक्ने देखिएको छैन,’ ती अधिकारीले भने ।

अनुसन्धानका क्रममा पनि प्राविधिक कठिनाइ देखिएको प्रहरी अधिकारी बताउँछन् । महानगरीय अपराध महाशाखाले पक्राउ गरेको तर उसको अनुसन्धान गरेर प्रहरी अदालतमा उभ्याउने काम नभएपछि काठमाडौं प्रहरी परिसरले अनुसन्धान गरिरहेको छ । सुलभले काठमाडौं प्रहरी परिसर टेकुमा नै राख्ने ठाउ हुँदाहुँदै पनि दरबारमार्ग परिसरमा राखिएको थियो ।

२१ गते आएको सामान खोजिँदै

प्रहरीले अनुसन्धानको क्रममा २१ चैतमा आएका सबै सामानको विषयमा अध्ययन गरिरहेको जनाएको छ । के-के सामान ल्याइएको हो । कहाँ छ र कसकसले लिएको होलगायतका विषयमा अध्ययन गरिरहेको प्रहरी स्रोतको भनाइ छ ।

प्रहरीले आफ्नो अनुसन्धानका क्रममा २१ चैतमा चार्टर जहाजमार्फत चौधरी फाउण्डेसन, दीपक मलहोत्रा, उत्सव डिटरजेन्ट कस्मेटिक, श्रेष्ठ साइन्टिफिक, नर्भिक अस्पताल, लक्ष्मी इन्टरनेसनल प्रालि, जय श्री श्याम ट्रेडिङ, जयमेड एप्लायन्सेस प्रालि, लर्ड बुद्ध फाउण्डेसनले पनि मेडिकल सामग्री ल्याएको पाइएको जनाएको छ ।

उक्त चार्टर विमानमा यी समूहका व्यापारीहरूले भने आफ्ना कुनै सामग्री नभएको बताएका छन् । ’२१ चैतमा मेरो कुनै पनि सामान आएको छैन, दोस्रो पटक ल्याउँदा पनि सामान छुटेको छ,’ व्यवसायी दीपक मलहोत्राले भने । २१ चैतमा धेरै व्यापारीहरूको सामान ल्याउने तयारी भए पनि सुलभले सेटिङ मिलाएर आफ्नो मात्रै सामान हालेको र त्यसमा चौधरी फाउण्डेसनको पीपीई पनि ल्याइएको केही व्यापारीको दाबी छ ।

२१ चैतमा २२ टन सामान ल्याउने तयारी गरेकोमा नेपाल वायु सेवा निगमको जहाज ७ टन मात्रै सामान बोकेर फर्किएको दाबी व्यापारीहरूको रहेको छ ।

भन्सार विभागमा महानिर्देशक सामानको परिणामका विषयमा आफूलाई जानकारी नहुने बताउँछन् । ‘जहाजको एरो बिल भन्ने हुन्छ, त्यो सामान गोदाम व्यवस्थापन लिमिटेडले स्टोरमा राख्छ, पाटीहरूले आएर घोषणा गरेर सिस्टममा हालेर पठाउँछन्, कसको कति भन्ने हामीसँग हुँदैन पाटीसँगै जाने हो,’ भन्सार विभागका महानिर्देशक सुमन दाहालले भने ।

दोस्रो लटमा आएको छ, प्रहरीले भनेको सामान

प्रहरीले उल्लेख गरेका व्यापारीमध्येका अधिकांशले भने ५ वैशाखमा सामान ल्याएका छन् । ४ वैशाखमा नेपाल वायु सेवा निगमका २ वटा जहाज चीन गएका थिए । उनीहरूले ५ वैशाख सामान ल्याएका थिए । ५ वैशाखमा एउटा जहाजमा साढे १७ टन र अर्कोमा साढे ७ टन गरी २५ टन सामान ल्याएका थिए ।

५ वैशाखमा सबैभन्दा धेरै परिणाममा सामान ल्याउनेमा व्यवसायी विशाल पण्डितको धेरै छ । दोस्रो लटमा पनि जहाजमा खाली ठाउँ हुँदाहुँदै पनि सामान नल्याइदिएको कतिपय व्यापारीहरूको गुनासो रहेको छ ।

दोस्रो लटमा श्रेष्ठ साइन्टिफिक, नर्भिक अस्पताल, लक्ष्मी इन्टरनेसनल प्रालि, जय श्री श्याम ट्रेडिङ, जयमेड एप्लायन्सेस प्रालि, लर्ड बुद्ध फाउण्डेसनले पनि सामान ल्याएको स्रोतले बतायो । चौधरी फाण्डेसनको केही पीपीई २१ चैतमा पनि आयात गरिएको बताइएको छ ।

अहिले पनि कालो बजारी !

सुलभ अग्रवाल पक्राउपछि पनि थर्मल गन, पीपीई, एन९५ मास्कलगायतका स्वास्थ्य सामग्रीमा कालो बजारी नै भएको व्यवसायीको गुनासो छ ।

व्यवसायी स्रोतका अनुसार अहिले पनि कतिपय व्यापारीहरूले थर्मल गन प्रतिपिस ९ हजार रुपैयाँमा बिक्री गरेका छन् भने पीपीई सेट ७ हजार रुपैयाँमा बिक्री गरेका छन् ।

त्यस्तै, एन ९५ मास्क ६ सय रुपैयाँमा बिक्री भएको जनाइएको छ । ‘पहिले गरिए जसरी अनुसन्धान फेरि गर्न आवश्‍यक छ । अहिले पनि स्वास्थ्य सामग्रीको व्यापाक कालो बजारी भएको छ,’ स्वास्थ्य क्षेत्रमा आवद्ध एक व्यवसायीले भने ।

प्रकाशित मिति: आइतबार, वैशाख ७, २०७७ १६:२५