कोरोना त्रासकाबीच रौतहटमा हावाहुरी र असिना, हिउँदे बाली नष्ट

A+ A A-

गएराति आएको हावाहुरी र असिनाबाट रौतहटमा करोडौँको क्षति पुगेको छ । बर्षासँगै आएको असिनापानीले तरकारी, फलफूल तथा हिउँदे बालीमा करोडौंको क्षति पुगेको हो ।

हावाहुरी र असिनाले जिल्लाको चन्द्रपुर नगरपालिकाको सिन्दुरेघारी, नजरपुर, सन्तपुर, चेतनगर, बेतौना, लगायतका स्थानको दलहन तथा तरकारी बाली नष्ट भएको स्थानियले बताएका छन् ।

शुक्रबार रातिको हुरीले रौतहटको अधिकांश स्थानीय तहमा घरटहरासमेत भत्किएका छन् । असिनासहित आएको हावाहुरीले घरका छानामा लगाइएको टायल फुट्नुका साथै खरका छाना र जस्तासमेत उडाएको स्थानीयले बताएका छन् ।

यमुनामाई गाँउपालिकामा रहेको तरकारी बजारको टहराको छानोसमेत हुरीले उडाएको छ ।

हावाहुरीका कारण सबैभन्दा बढी दलित बस्तीहरुमा रहेको झुपडीहरुमा ठूलो क्षति पुगेको बताइएको छ । घरका छानाहरु उडाएर कतिपय स्थानमा झुपडीहरु भत्किएका छन् ।

कोरोना त्रासकैबीच हावाहुरीले क्षति गर्दा दलित परिवारको विचल्ली भएको चन्द्रपुर–९ चेतनगरका सुजित चौधरीले बताए ।

घरको छाना उडाएपछि भित्र रहेका ओछयान, लताकपडा तथा खाद्यान्नसमेत भिजेको उनले बताए । विपन्नहरुले राहतमा पाएको खाद्यान्न पनि खानयोग्य नभएको पीडितहरुले गुनासो गरेका छन् ।

हुरीले मकै, आँप, लिचि, दलहनलाई सबैभन्दा बढी नोक्सानी पुर्‍याएको छ । जिल्लामा व्यावसायिक रुपमा लगाइएका आँप र लिचिको बगैँचामा पनि हावाहुरीले ठूलो क्षति पुर्याएको छ ।

कतिपय स्थानका गहुँबाली पनि नष्ट भएको छ । असिनापानीले रौतहटका इटा उद्योगमा पनि ठूलो नोक्सानी भएको बताइएको छ । हसिनापानीका कारण दर्जनौं इटा उद्योगले तयार पारेको काचो इटामा क्षति पुगेको छ ।

हावाहुरीले रौतहटका केही प्रहरी युनिटमा पनि क्षति पुगेको प्रहरी उपरिक्षक रविराज खड्काले जानकारी दिए ।

यसैबीच, संघीय संसदको विकास समितिकी सभापति कल्याणी खड्काले शुक्रबार राति आएको हावाहुरीबाट प्रभावित भएकालाई तत्काल राहत उपलब्ध गराउन सम्बन्धित निकायलाई आग्रह गरेकी छिन् ।

गएराति चलेको हावाहुरीसहित असिनापानीका कारण रौतहटका विभिन्न क्षेत्रमा ठूलो क्षति पुर्‍याएको भन्दै सभापति खड्काले प्रभावितलाई तत्काल राहतको व्यवस्था गर्न सरकार र सम्बन्धित निकायलाई आग्रह गरेकी हुन् ।

‘५ वैैशाखको राति चलेको हावाहुरीसहितको असिनापानीका कारण रौतहटको चन्द्रपुर, वृन्दावन नगरपालिलगायतका विभिन्न ग्रामीण बस्तीमा नागरिकको घरका छाना उडाएको, बालीनालीमा नोक्सानी पुर्‍याएको खबरले चिन्तित बनाएको छ ।’ उनले भनेकी छिन्, ‘रौतहटका हावाहुरीपीडित नागरिक तथा किसानलाई तत्काल राहत उपलब्ध गराउन नेपाल सरकार तथा सम्बन्धित निकायसँग अनुरोध गर्दछु ।’

प्रकाशित मिति: शनिबार, वैशाख ६, २०७७ ११:३८