आगामी बजेटका विषयमा कृषिमन्त्री भुसाल र सातै प्रदेशका कृषिमन्त्रीबीच भिडियो संवाद

आगामी बजेटका विषयमा कृषिमन्त्री भुसाल र सातै प्रदेशका कृषिमन्त्रीबीच भिडियो संवाद

A+ A A-

कृषि तथा पशुपन्छी विकासमन्त्री घनश्याम भुसाल र सातै प्रदेशका कृषि, भूमि तथा सहकारीमन्त्रीहरूबीच भिडियो कन्फ्रेन्स भएकाे छ ।

शुक्रबार भएकाे साे भिडियो कन्फ्रेन्समा मन्त्री भुसाल र सातै प्रदेशका कृषिमन्त्रीबीच कोरोना भाइरसका कारण कृषिक्षेत्रमा परेको प्रभावका बारेमा छलफल भएकाे छ ।

साे अवसरमा कृषिमन्त्री भुसालले आगामी बजेटमा कृषिक्षेत्रलाई कसरी अगाडि बढाउने भन्ने विषयमा छलफल भएकाे मन्त्रालयले जनाएकाे छ ।

मन्त्रालयका अनुसार छलफलमा बन्दाबन्दीले कृषि तथा पशुपन्छी क्षेत्रमा उत्पन्न समस्या समाधान गर्न सबै निकायहरूसँग समन्वय गरिरहेको कृषि तथा पशुपन्छी विकास मन्त्रालय र सबै प्रदेशका कृषि, भूमि तथा सहकारी मन्त्रालयको द्रुत कार्य समूहबीच अझ बढी समन्वय गर्ने निर्णय भएकाे छ ।

त्यस्तै, कृषि तथा पशुजन्य वस्तुको उत्पादन, ढुवानी र बिक्रीवितरणलाई अझ सहज बनाउन संघीय कृषि मन्त्रालयले गृह मन्त्रालयसँग समन्वय गर्ने, प्रदेशमा भएका कृषि तथा पशुजन्य क्षतिको आँकलन र राहतको प्रस्ताव भोलि शनिवारसम्म सबै प्रदेश कृषि मन्त्रालयले संघीय कृषि मन्त्रालयमा उपलब्ध गराउने निर्णय भएकाे छ ।

मन्त्रालयका अनुसार उक्त राहत प्रस्तावको निश्चित प्रतिशत संघीय कृषि मन्त्रालयले वहन गर्ने गरी राहत प्याकेज घोषणा गरिने भएकाे छ । प्रदेश सरकारले आफ्नो आवश्यकताअनुसार सो प्याकेजमा थप गरी किसानलाई राहत दिनेछ ।

तयसैगरी, आगामी वर्षको बजेटमा समावेश गर्नुपर्ने कार्यक्रमहरू र त्यसमा संघ र प्रदेशले गर्ने बजेट विनियोजनका सन्दर्भमा प्रदेशले योजनाकाे खाका संघीय सरकारलाई चाँडै उपलब्ध गराउने भएकाे छ ।

तयसैगरी, छलफलले सबै प्रदेश सरकारको अबको बजेट कम्तीमा २० प्रतिशत कृषिमा विनियोजन गर्न प्रदेश मन्त्रीले पहल गर्ने र सोही अनुपातमा स्थानीय सरकारलाई पनि कृषि बजेटका लागि समन्वय गर्ने मन्त्रालयले जानकारी दिएकाे छ ।

प्रकाशित मिति: शुक्रबार, वैशाख ५, २०७७ २०:३६