तरकारी उठाउन गाडी लिएर किसानको बारीमा पुगे कृषि ज्ञान केन्द्र प्रमुख

A+ A A-

कोरोना भाइरको संक्रमणलाई कम गर्न लकडाउन हुँदा किसानले लगाएको तरकारी बारीमै कुहिने अवस्था आएपछि कृषि ज्ञान केन्द्र बाजुराका केन्द्र प्रमुख गाडी लिएर कृषकका बारीमा पुगेका छन् ।

‘बजारमा तरकारी ल्याउँन कोही तयार छैनन् कृषकको हिउँदभरीको मेहनत खेरजाने भएपछि मैले कार्यालयको भ्यान लिएर कृषकको तरकारी बजारसम्म ल्याउँन सहयोग गरेको हुँ’ कृषि ज्ञान केन्द्र बाजुराका प्रमुख गाविन्द्र सिजापतीले भने ।

‘आफैँ किसानको घरमा पुगेर तरकारी संकलन गरि बजारमा पुर्‍याउने काम गरेका छौँ उनले थपे, यसले किसानलाई केही राहत भएको छ । कोरोना भाइरसका कारण भएको लकडाउनले बाजुरा जिल्लाका तरकारी उत्पादक किसानहरू मर्कामा परेका छन् ।’

समयमै तरकारी ढुवानी नहुँदा तरकारी किसानको तरकारी बारीमै कुहिन थालेको छ । सबैतिरका बजार बन्द र आवत जावत तथा तरकारी ढुवानीको समस्या भएपछि बारीको तरकारी बारीमै कुहिन थालेको हो ।

लकडाउन सुरु हुँदा बिक्रीका लागि तयार भएको बन्दा, फर्सीलगायतका तरकारी यतिबेला बजारमा पुर्‍याउन नसकिएको यहाँ कृषकको गुनासो छ । ग्रामीण क्षेत्रका किसान निकै मारमा परेका भए पनि कालोपत्रे सडक भएको ठाउँका किसानको तरकारी भने सहज रूपमा ढुवानी गर्न कृषि ज्ञान केन्द्र बाजुराले आफ्नै गाडी प्रयोग गरिरहेको छ ।

‘लकडाउनका कारण करोडौंको तरकारी बारीमा सडने छ । टिप्नुपर्ने तरकारी पनि अब काम नलाग्ने भइसकेको अवस्थामा कृषि ज्ञान केन्द्रले आफ्नै गाडी ल्याएर बजारसम्म नलगिदिएको भए लाखौँको घाटा बेहोर्नु पर्ने थियो’ बडिमालिका नगरपालिका-६ का किसान महेन्द्र धामीले भने ।

लकडाउन लम्बिएपछि थप समस्या हुने बताउँदै ३/४ रोपनी प्याज, काउली बन्दा धनियाँलगायतको तरकारी सबै खेर जाने अवस्थामा पुगेको उनले बताए ।

कृषि ज्ञान केन्द्र बाजुराले एक दिन फरक पारेर कार्यालयको गाडी किसानका घरमै लिएर गाडीमा तरकारी भरेर सदरमुकामलगायत बाक्लो बस्ती भएका बजारमा वितरण गर्दै आएकोले कृषकलाई सहज भएको बूढीगंगा नगरपालिका २ ताप्रीसेराका तरकारी कृषक कृष्ण बहादुर थापाले बताए ।

सरकारले अत्यावश्यकीय वस्तुको निर्वाध आपूर्ति गर्ने व्यवस्था गर्ने भने पनि लकडाउनको प्रत्यक्ष प्रभाव बाजुराका तरकारी उत्पादन गर्ने किसानमा परेको छ । कोरोना नियन्त्रणका लागि गरिएको लकडाउनले छिटै नष्ट हुने तथा दैनिक अत्यावश्यकीय फलफूल, तरकारी लगायतको आपूर्ति प्रभावित भएको बूढीगंगा नगरपालिका-२ का वडा अध्यक्ष हिरा थापाले बताए ।

संकलन केन्द्रमा ठूला ट्रकहरू लिएर नियमित तरकारी लिन आउने व्यापारी लकडाउनमा परेका र किसानले लगाएको तरकारी पनि बिक्री गर्न नपाउने भएपछि सडकको छेउछाउँमा रहेका कृषकको तरकारी बजारसम्म पुर्‍याउन केही मद्दत गरिदिएको कृषि ज्ञान केन्द्र बाजुराका प्रमुख सिजापतीले बताए ।

प्रकाशित मिति: शुक्रबार, वैशाख ५, २०७७ १७:४७