बजार नपाएपछि बोटमै पाक्न थाले केरा

A+ A A-

लकडाउनसँगै बजार नपाएपछि कृषकका बारीमा बोटमानै केरा पाक्न थालेका छन् ।

कोरोना भाइरसको सम्भावित संक्रमण रोक्न ११ चैत देखि देशभर लकडाउन गरिएको छ । जिल्लाका विभिन्न ठाउँमा लगाईएको केरा बजार लैजान तयारी गरिएका थिए ।

जिल्ला केरा उत्पादक संघका अध्यक्ष धननाथ महतोका अनुसार बजार बन्द भएपछि छिप्पिएका केरा बारीमै पाक्न थालेका छन् ।

नारायणगढको तरकारी तथा फलफूल थोक बजार बन्द छ । थोक बजार बन्द भएपछि सामान बिक्री गर्न समस्या भएको उनले जानकारी दिए ।

स्थानीय प्रशासनले केरा बोकेको गाडी चलाउन दिएपनि बिक्री गर्ने स्थानको अभावमा बारीमा तयारी अवस्थामा रहेको केरा लैजान नसकिएको उनले बताए ।

मार्कण्डे केरा उत्पादक सहकारी संस्थाका अध्यक्ष ध्रुव ढुंगानाले बिक्रीका लागि केरा तयारी भए पनि बेच्न नसकीएको बताए । पूर्वी चितवनका केरा उत्पादक कृषक यज्ञ सुवेदीले केरा बेच्न सबै तयार हुँदा पनि बिक्री नहुँदा लाखौं नोक्सान हुने बताए ।

ढुवानी सहज नहुँदा र बाहिर निस्कन नपाउँदा बगैंचामा रहेका केरा कुन अवस्थामा छन् भन्नेसमेत थाहा नभएको उनको भनाइ छ ।

उनले मात्र जिल्लामा ७० बिघामा केराखेती गर्दै आएका छन् । अवस्था असहज भएकाले बैंकबाट ल्याएको ऋणको ब्याजको विषयमा सरकारले ध्यान दिनुपर्ने केरा उत्पादक कृषकले माग गरेका छन् ।

प्रमुख जिल्ला अधिकारी नारायणप्रसाद भट्टराईले केरा, फलफूल, तरकारीका साना गाडीलाई बारीबाट बजारसम्म लैजान दिने व्यवस्था मिलाएको जानकारी दिए ।

भीड नगरी आफ्नो सामग्री बजार लैजान दिने व्यवस्था सिर्जना गरिएको उनले दावी गरे । केरा उत्पादन सङ्घको तथ्याङ्कअनुसार जिल्लामा ३ हजार बिघामा केरा खेती हुँदै आएको छ ।

संघमा मात्रै ७ सय कृषक आबद्ध छन् । त्यहाँबाट गतवर्ष मात्रै ५० करोड रुपैयाँ बराबरको केरा निकासी भएको संघले जानकारी दिएको छ ।

२ वर्ष अघि हावाहुरी र असिनाले यहाँ लगाईएको केरा नष्ट गरेको थियो । त्यसको ऋण कृषकले तिर्न नपाउँदै थप नोक्सानी बेहोर्नुपरेको हो । त्यहाँको केराको मुख्य बजार राजधानी काठमाडौँसहित देशका प्रमुख सहरहरु हुन् । रासस

प्रकाशित मिति: शुक्रबार, वैशाख ५, २०७७ १४:१६