कोरोनाको प्रकोपकै बीच ऋणीहरूलाई एनआईसी एशियाको विशेष योजना

A+ A A-

एनआईसी एशिया बैंकले कोरोना भाइरसको विश्वव्यापी महामारी र यसको त्रासका कारण देश नै लकडाउन अवस्थामा रहेको बेला आफ्ना ऋणीहरूलाई विशेष सहुलियत दिन विशेष योजना सार्वजनिक गरेको छ ।

बैंकले यस असहज परिस्थितिमा आफ्ना ऋणीहरूलाई सहुलियत प्रदान गर्न तथा यस असहज परिस्थितिबाट उद्धार गर्न ऋणीले बुझाउनुपर्ने ब्याज रकममा भारी छुट प्रदान गर्ने योजना सार्वजनिक गरेको जानकारी दिएको हो ।

बैंकका अनुसार कोरोना संक्रमण फैलिन नदिन नेपाल सरकारले पूर्ण रूपमा आवतजावतमा प्रतिबन्ध लगाउँदै लकडाउन घोषणा गरेको वर्तमान अवस्थाले मुलुकका उद्योग, कलकारखाना, व्यापार, व्यवसाय, पर्यटनलगायत वित्तीय क्षेत्रसमेत प्रभावित भइरहेको यस असहज परिस्थितिमा बैंकले यस्तो ग्राहकमुखी योजना ल्याइएको हो ।

एनआईसी एशिया बैंकले यसअघि पनि नेपाल राष्ट्र बैंकको २०७६ चैत १६ गतेको निर्देशनअनुसार २०७६ चैत मसान्तभित्र भुक्तानी गर्नुपर्ने मासिक वा त्रैमासिक किस्ताबन्दी कर्जाहरूमा ग्राहकहरूले चैत महिनाभित्र नै ब्याज तथा किस्ता बुझाएमा किस्तामा समाविष्ट ब्याज रकममा १० प्रतिशत छुट प्रदान गरेको तथा अन्य विभिन्न छुट तथा सहुलियतहरू प्रदान गरेको जनाएको छ ।

बैंकले अहिले ल्याएको विशेष योजनाअन्तर्गत बैंकबाट कर्जा सुविधा उपयोग गर्ने सम्पूर्ण ग्राहकले वैशाख मसान्तसम्ममा चुक्ता भुक्तान गर्नुपर्ने सम्पूर्ण मासिक तथा त्रैमासिक किस्ता, ब्याजलगायत भुक्तानी गरेमा बुझाएको साधारण ब्याजको १० प्रतिशतले हुन आउने रकम तथा जरिमाना ब्याजको शतप्रतिशत रकम छुट प्रदान गरिने बताइएको छ ।

यो सुविधा मासिक तथा त्रैमासिक किस्ताबन्दी कर्जाहरुका साथै चालू पुँजी कर्जा तथा अन्य रिभल्विङ प्रकृतिका कर्जाहरूलगायत बैंकबाट प्रवाह भएका सम्पूर्ण कर्जामा लागू हुने बैंकले बताएको छ ।

बैंकका अनुसार उक्त छुट रकम २०७७ जेठ महिनाको पहिलो हप्ताभित्र सम्बन्धित ग्राहकको खातामा जम्मा गरिनेछ । तर, यसरी ब्याज छुट दिँदा छुटपश्चात् ग्राहकले तिर्नुपर्ने ब्याज आधार दरबाट गणना हुने ब्याजभन्दा कम हुने छैन ।

यस किसिमको सहुलियत नेपालको बैकिङ इतिहासमा दुर्लभ नै उपलब्ध हुने दाबी गर्दै बैंकले सो योजनाबाट सम्पूर्ण ग्राहकहरूलाई मौकाको फाइदा लिई अधिकतम लाभ प्राप्त गर्न अनुरोधसमेत गरेको छ ।