खाेइ ! कोरोनाका लागि छुट्टै अस्पताल ? प्रसूतिदेखि डायलाइसिससम्म प्रभावित

A+ A A-

सुदूरपश्चिम प्रदेशमा कोरोना भाइरस (कोभिड-१९) संक्रमितको संख्या ५ पुगेको छ । सेती प्रादेशिक अस्पताल धनगढीको आइसोलेसनमा कोरोना भाइरस संक्रममित ५ सहित ६ जनाको उपचार भइरहेको छ ।

कैलालीको लम्की चुहा नगरपालिका- १, भुरुवाकी ६५ वर्षीया वृद्धामा कोरोना पुष्टि भएसँगै सुदूरपश्चिममा संक्रमितको संख्या ५ पुगेको हो । यसअघि दूबईबाट आएका धनगढीका युवक, उनकी भाउजू, भारतबाट फर्किएका लम्कीकै १ पुरुष र भारतबाटै फर्किएका कञ्चनपुरका अर्का पुरुषमा कोरोनाको संक्रमण पुष्टि भइसकेको छ। उनीहरू सबै सेती प्रादेशिक अस्पतालमा उपचाररत छन् ।

सेती प्रादेशिक अस्पताल सुदूरपश्चिम प्रदेशको एक मात्र रेफरल अस्पताल हो । यहाँ हुने उपचार सेवा र जनशक्ति प्रदेशका अन्य कुनै पनि स्थानमा छैन । तर, अहिले सुदूरपश्चिम प्रदेश सरकारले यसै प्रादेशिक अस्पतालबाट कोरोना संक्रमितको उपचार भइरहेको छ । जसका कारण अन्य उपचार सेवा प्रभावित बनेको छ ।

प्रसूतिदेखि डायलाइसिससम्म प्रभावित

सेती प्रादेशिक अस्पतालमा कोरोना संक्रमितको उपचार हुन थालेपछि अन्य बिरामी जोखिममा परेका छन् । सरकारले प्रादेशिक अस्पतालमा कोरोनाको उपचार थालेपछि विशेषगरी त्यहाँ डायलाइसिस गराइरहेका, सुत्केरी महिला र नवजात शिशु बढी जोखिममा परेका हुन् ।

संक्रमितको उपचार हुने वार्ड र सुत्केरी वार्ड सँगै रहेकाले सुत्केरी महिला तथा नवजात शिशु यसको उच्च जोखिममा रहेको चिकित्सकहरूले बताएका छन् । कोरोना त्रास र लकडाउनका कारण सेती प्रादेशिक अस्पतालमा प्रसूति सेवा लिन आउने महिलाको संख्या पनि झन्डै ५० प्रतिशतले घटेको छ ।

कोरोना संक्रमण न्यूनीकरण गर्न गरिएको लकडाउनका कारण समयमै अस्पताल पुर्‍याउन नसक्दा ४ शिशुको मृत्यु भएको छ । लकडाउनअघिसम्म दैनिक ३० देखि ४० महिला प्रसूति सेवा दिने अस्पतालमा हाल १५ देखि २० जना मात्र सेवा लिन आउने गरेको सुत्केरी वाड प्रमुख यशोदा ढकालले बताइन् ।

समयमै गर्भवती महिलालाई अस्पताल नपुर्‍याउँदा पेटभित्र शिशुको मृत्यु हुने दर बढ्दै भएको छ । त्यसमध्ये अधिकांश महिलाका परिवारले सुत्केरी भएकै दिन घर लैजान दबाब दिन थालेका छन् । लकडाउनका कारण अस्पतालमा टाढा-टाढाबाट आएका बिरामी र आफन्तलाई खान बस्न पनि समस्या हुँदै आएको कुरुवा गणेश भण्डारीले दुःखेसो पोखे ।

सेती प्रादेशिक अस्पतालमा सुत्केरी मात्रै नभई नियमित परीक्षणलगायत अन्य बिरामी पनि कोरोनाका कारण समस्यामा छन् । यसमा विशेषगरी त्यहाँ डाइलाइसिस गराइरहेका बिरामी र तिनका आफन्त उच्च जोखिममा देखिएका छन् ।

तर, सुदूरपश्चिम प्रदेशका स्वास्थ्य निर्देशक डाक्टर गुणराज अवस्थी कोरोनाका बिरामीलाई छुटै भवनमा राखेर उपचार गरिरहेका कारण जोखिम नरहेको बताउँछन् । सरकारले लागू गरेको स्वास्थ्य नीतिलाई कार्यान्वयन गर्न सके मात्रै अन्य रोगसरह कोरोना पनि निको हुने उनको दाबी छ ।

अस्पतालले जोखिम नरहेको बताए पनि सुत्केरीसँगै अन्य बिरामीको चाप भने निकै घटेको छ । अन्य समयमा भीडभाड हुने सेती अस्पतालमा हाल आपतकालीन अवस्थाका बिरामी मात्रै आउने गरेका छन् ।

आकस्मिक सेवा पनि अन्यत्र सारिँदै

सुदूरपश्चिम प्रदेशमा कोरोना संक्रमित देखिएसँगै सेती प्रादेशिक अस्पतालमा कोरोनाको उपचार थालिएको छ । योसँगै त्यहाँबाट प्रदान हुने आकस्मिकबाहेकका अन्य सेवा ठप्प भएका छन् । तर, अहिले संक्रमण फैलिँदै गएसँगै त्यहाँ प्रदान भइरहेको आकस्मिक सेवा पनि अन्यत्र सारिने भएको छ ।

सेती प्रादेशिक अस्पतालको चिकित्सकसहितका स्वास्थ्यकर्मीको टोली पठाएर नवजीवन अस्पतालमा प्रसूति सेवा सञ्चालन गर्ने निर्णय भएको छ । प्रदेश संकट व्यवस्थापन केन्द्रको बुधबार भएको बैठकले यस्तो निर्णय गरेको हो ।

यसअघि सामाजिक विकासमन्त्री कृष्णराज सुवेदीको अध्यक्षतामा भएको बैठकले सेती प्रादेशिक अस्पतालको प्रसूति सेवा बन्द गर्दै आमा सुरक्षा कार्यक्रम सञ्चालन गरिरहेको नवजीवन अस्पतालमा सार्ने निर्णय गरे पनि जनशक्ति व्यवस्थापनबारे कुनै निर्णय भएको थिएन ।

सेती प्रादेशिक अस्पतालको स्वास्थ्यकर्मीको टोली पठाएर नवजीवन अस्पतालमा प्रसूति सेवा सञ्चालन गर्ने निर्णय भएको सामाजिक विकास मन्त्री कृष्णराज सुवेदीले बताए ।

कोरोना संक्रमितको उपचारका लागि प्रि-फ्यावको अस्पताल निर्माण नभएसम्मका लागि सेतीमा प्रसूति सेवा बन्द भई सेवा नवजीवन अस्पतालमा सञ्चालन हुने मन्त्री सुवेदीले बताए । तर, सेतीमा मात्र उपलब्ध डायलासिसलगायतका सेवाबारे भने अन्योल नै देखिएको छ ।

चिकित्सक भन्छन् : सेवा सारिँदा झन् समस्या हुन्छ

सेती प्रादेशिक अस्पतालबाट प्रदान भइरहेको सेवा अन्यत्र सारिने भएपछि चिकित्सकले आपत्ति जनाएका छन् । कोरोना संक्रमितको उपचारमा संलग्न डाक्टर जगदीश जोशीले कोरोनाका लागि छुट्टै अस्पताल आवश्यक पर्ने बताए । ‘कोभिड १९ व्यवस्थापनका लागि अस्थायी अस्पताल बनाए झन् प्रभावकारी हुन्थ्यो, उनले भने ।

नेपालका अन्य प्रदेशमा अस्थायी अस्पताल स्थापना भइसकेका छन् । तर, सुदूरपश्चिम प्रदेश सरकारले भने इच्छाशक्ति नदेखाएका कारण यसो हुन सकेको छैन । अब यो अवस्थामा सरकारको विरोधभन्दा पनि निर्णय कार्यान्वयनमा जान ठीक हुन्छ , उनले थपे ।

सेती प्रादेशिक अस्पतालका फिजिसियन डा. शेरबहादुर कमरले आफ्नो फेसबुक पेजमा लामो स्टाटस लेख्दै एउटा प्रणालीमा चलिरहेका सेवाहरूमध्ये आज एक भाग निकाल्ने, भोलि अर्को भाग काट्ने गर्दा अपाङ्ग भइएला कि ? भोलि फेरि जोड्न कति गाह्रो होला ? प्रदेश सरकार र अस्पताल व्यवस्थापन समितिलाई लक्षित गरी उनले प्रश्न गरेका छन् । उनले भनेका छन्, भुइँको टिप्न खोज्दा पोल्टाको खस्ला भन्ने पिर ।

हेर्नुहोस् अस्पतालका फिजिसियन डा. शेरबहादुर कमरले लेखेको फेसबुक स्ट्याटस जस्ताको त्यस्तै ।

सरकार भन्छ : तत्काल कोरोनाsf लागि छुट्टै अस्पताल बनाउन सकिँदैन

चिकित्सकहरूले कोरोना भाइरस विशेष अस्पताल सञ्चालन गर्न माग गरेका छन् । ५ जनामा कोरोना सङ्क्रमण पुष्टिपछि सेती प्रादेशिक अस्पतालमा कोरोना सङ्क्रमितको उपचार गर्दै आएका चिकित्सकले कोरोना विशेष अस्पताल सञ्चालन गर्न माग गरेका हुन् ।

तर, सुदूरपश्चिम प्रदेश सरकारले भने तत्काल कोरोनाको लागि छुट्टै अस्पताल बनाउन सक्ने अवस्था नरहेको जनाएको छ । सामाजिक विकासमन्त्री कृष्णराज सुवेदीले सेती प्रादेशिक अस्पतालमै कोरोना सङ्क्रमितको उपचार हुने बताए । यसका लागि सेती प्रादेशिक अस्पतालबाट प्रदान भइरहेको अन्य सेवा अन्यत्र सारिन लागेको जानकारी दिए ।