सुदूरपश्चिममा २ हजार ९ सय ४१ जनाको र्‍यापिड टेस्ट, सबैको रिपोर्ट नेगेटिभ

A+ A A-

सुदूरपश्चिम प्रदेशमा २ हजार ९ सय ४१ जनाको कोरोना संक्रमण परीक्षण गर्न र्‍यापिड टेस्ट गरिएको छ ।

कैलालीमा १ हजार ५ सय २१, कञ्चनपुरमा ४ सय १५, बैतडीमा एक सय ४२, दार्चुलामा ५८, डडेल्धुरामा ९, डोटीमा २ सय ७१, बझाङमा चार सय ६१, अछाममा १, बाजुरामा ६३ जनाको र्‍यापिड टेस्ट गरिएको जनाइएको छ ।

प्रदेश स्वास्थ्य स्वास्थ्य आपतकालीन केन्द्रका अनुसार सबैको रिपोर्ट नेगेटिभ आएको छ। र्‍यापिड टेष्टमा भने कोभिड १९ ले संक्रमण गरेको शरीरले उत्पादन गर्ने ‘एन्टीबडी’को मात्रा परीक्षण गर्ने गरिएको छ । र्‍यापिड टेष्टमा पोजेटिभ देखाए पनि पुष्टिका लागि पीसीआर परीक्षण गर्ने गरिएको छ । हालसम्म सुदूरपश्चिमका विभिन्न अस्पतालको आइसोलेसनमा राखिएका ७४ जनालाई डिस्चार्ज गरिएको छ ।

उनीहरूको कोरोना परीक्षण रिपोर्ट नेगेटिभ आएपछि डिस्चार्ज गरिएको हो । अहिले प्रदेशका विभिन्न ७ वटा अस्पतालमा १८ जनालाई आइसोलेसमा राखिएको छ । जसमा ५ जना कोरोना संक्रमित छन् भने बाँकी १३ जनालाई कोरोनाको आशंकामा आइसोलेसमा राखिएको छ ।

मंगलबारसम्म सेती प्रादेशिक अस्पतालमा कोरोना संक्रममित ५ जनासहित ६ जना, डडेल्धुरा अस्पतालमा ५, जिल्ला डोटी अस्पतालमा ३, जिल्ला अस्पताल बैतडी, गोकुलेश्वर अस्पताल दार्चुला, बयलपाटा अस्पताल अछाम र चौमाला प्राथमिक स्वास्थ्य केन्द्र कैलालीमा १–१ गरी १८ जनालाई आइसोलेसमा राखिएको छ ।

उनीहरूको परीक्षण रिपोर्ट आउन बाँकी छ । डोटीबाहेक सुदूरपश्चिमका अन्य आठ जिल्लामा १ हजार ८३ जनालाई विभिन्न क्वारेन्टाइनमा राखिएको छ । जसमा १ हजार ९ पुरुष, ६९ महिला र ५ जना बालबालिका रहेका छन् ।

कैलालीको लम्कीचुहा नगरपालिका-१ भुरुवाकी ६५ वर्षीया वृद्धामा कोरोना पुष्टि भएसँगै सुदूरपश्चिममा संक्रमितको संख्या ५ पुगेको छ ।

यसअघि दुबईबाट आएका धनगढीका युवक, उनकी भाउजू, भारतबाट फर्किएका लम्कीकै १ पुरुष र भारतबाटै फर्किएका कञ्चनपुरका अर्को पुरुषमा कोरोनाको संक्रमण पुष्टि भइसकेको छ । उनीहरू सबै सेती प्रादेशिक अस्पतालमा उपचाररत छन् ।

प्रकाशित मिति: बुधबार, वैशाख ३, २०७७ १६:००