परम्परागत पूजापाठ गर्दै सम्पन्न भयो घटाल थानमा लाग्ने विसु जाँत

A+ A A-

डडेल्धुराको अमरगढी-३ डोटी खोलाको पुछारमा रहेको सुदूरपश्चिमकै प्रसिद्ध धार्मिक शक्तिपीठ घटाल थानमा लाग्ने विसु जाँत (मेला) सम्पन्न भएको छ । हरेक वर्ष नयाँ वर्षको दोस्रो दिन अर्थात् वैशाख २ गते घटाल थानमा लाग्ने विसु जाँत यसवर्ष परम्परागत रूपमा पूजापाठ गरि सम्पन्न भएको हो ।

विश्व व्यापि रूपमा फैलिरहेको कोरोना भाइरस (कोभिड-१९)लाई मध्येनजर गर्दै यसअघि नै घटाल क्षेत्र विकास समाजले मेला भर्ने कार्य नगरिदिन हुन सबैमा अनुरोध गरेको थियो ।

अन्य वर्ष हजारौँ दर्शनार्थीको सहभागीतामा सम्पन्न हुने विसु जाँत यस वर्ष यहाँका सीमित व्यक्तिहरूको सहभागितामा सम्पन्न भएको घटाल क्षेत्र विकास समाजले जनाएको छ ।

कोरोनाको संक्रमणबाट बच्नका लागि डडेल्धुरा जिल्लामा स्थानीय प्रशासन, घटाल क्षेत्र विकास समाज र स्थानीय सरकारको समन्वयमा परम्परागत रूपमा पूजापाठ गरेर मेला सम्पन्न गरिएको घटाल क्षेत्र विकास समाजका अध्यक्ष कृष्णराज बोहराले बताए ।

नयाँ वर्षको दिन चम्सालको देउघरबाट घटाल थान नजिकैको असिग्राम मन्दिरमा लग्ने र दोस्रो दिन घटाल थानमा ल्याएपछि मात्रै जाँत सुरु हुने गर्दछ ।

घटालथानमा गएर आफूले चिताएको कुरा मागेमा मनोकामना पूरा गरिदिने जनविश्वास रहिआएको छ। जबजब यस क्षेत्रमा खटेरी पर्छ तब यस क्षेत्रका स्थानीयले घटाल बाबासँग पानी माग्ने गरेका छन् । खडेरी परेमा पानी दिने, निसन्तानलाई सन्तान दिने गरेको जनविश्वास रहिआएको छ । घटाल बाबाले मनले चिताएको पूरा गरिदिएको भन्दै दैनिक सयौँको संख्यामा घटाल थानमा बलिदिनेहरूको भिड लाग्ने गर्दछ ।

किंवदन्तीअनुसार डोट्याली राजा नागी मल्लकी पुत्रविहीन रानीले भारतको गढवालबाट घटाल देउता दाइजोमा ल्याएको तर देउतालाई अहिले मन्दिर रहेको स्थानबाट दरबारसम्म लैजान नसकिएपछि त्यहीँ नै घटालबाबा स्थापना गरिएको बताइन्छ । पश्चिमी क्षेत्रमा आस्तिकहरू माझ घटालबाबाले मनोकामना पूरा गरिदिने जनविश्वास रहँदै आएको छ ।

द्वापरयुगमा कुरुक्षेत्रमा भएको कौरव र पाण्डवबीचको धर्मयुद्धमा भीमपुत्र घटोत्कचले ठूलो पराक्रम प्रदर्शन गरेका थिए । कौरव सेना माथी धावा बोलेर ठूलो क्षति पुर्‍याएको धार्मिक ग्रन्थहरूमा उल्लेख छ ।

लडाइँ मैदान मैवीरगति प्राप्त गरेका घटोत्कचको पराक्रम देखेका श्रीकृष्णले उनलाई कलियुगमा ख्याति प्राप्त भगवानका रूपमा मान्यता पाउने वरदान दिएको परापूर्वकाल देखिको भनाइ छ ।

प्रकाशित मिति: मंगलबार, वैशाख २, २०७७ १७:३३