कोरोनाको असर : ७ देशमा ७० नेपाली श्रमिकको शव रोकियो

A+ A A-

नेपालमा लकडाउनको शुरु नहुँदैदेखि हालसम्म खाडीसहितका ७ देशमा मृत्यु भएका ७० श्रमिकको शव नेपाल ल्याउन समस्या भएको वैदेशिक रोजगार प्रवद्धन बोर्डको सचिवलयले जनाएको छ ।

युएईमा ११, कतारमा ८, साउदीमा २८, कुवेतमा ६, मलेसियामा १५ जनाको शव नेपाली ल्याउन समस्या भएको सचिवलयले जनाएको हो । त्यस्तै, दक्षिण कोरिया र सेसेल्समा १/१ जनाको शव रहेको कोर्डले जानकारी दिएको छ । कोरोना महामारीका कारण अन्तर्राष्ट्रिय उडानमा गरिएको प्रतिबन्ध र लकडाउनले वैदेशिक रोजगारीमा मृत्यु भएका नेपाली श्रमिकको शव नेपाल ल्याउन समस्या भएको वैदेशिक रोजगार बोर्डका कार्यकारी निर्देशक श्रेष्ठले जानकारी दिए ।

दक्षिण कोरिया र सेसेल्समा मृत्यु भएका श्रमिकको शव परिवारको सल्लाहमा उत्तै दाहसंस्कार गरिएको बोर्डले जनाएको छ । अहिलेको अवस्थामा लकडाउन कहिले खुल्छ र शव सहज तरिकाले ल्याउन सकिन्छ भनेर कुर्नुभन्दा परिवारले सहमतिमा मृत्यु भएकै देशमा दाहसंस्कार गर्न सहज हुने बोर्डका कार्यकारी श्रेष्ठले जानकारी दिए ।

कोरोनाको संक्रमणका कारण युएईमा मृत्यु भएकी एक महिलाको शव पनि परिवारको सहमतिमा उतै दाहसंस्कार हुने उनले बताए । मृत्यु भएका कामदारलाई रोजगारदाता देशमा दाहसंस्कार नियोगमार्फत पहलसमेत गरि दिने बोर्डले जानकारी दिएको छ ।

कतार र युएई दूतावासबाट सबै विवरण मगाएर सबै मृतककको परिवारलाई जानकारी गराएर समन्वय गरिरहेको र अन्य देशमा मृत्यु भएकाहरुको परिवारसँग पनि सम्पर्क गर्ने प्रयास भइरहेको बोर्डले जानकारी दिएको छ । कार्य क्षेत्रमा हुने दुर्घटना, हर्ट अट्याक, सवारी दुर्घटनालगायत कारण श्रमिकले विदेशमा ज्यान गुमाउने गरेका छन् ।