बतास फाउन्डेसन र पशुपति कोषको सहकार्यमा गाई संरक्षण अभियान

A+ A A-

कोरोना भाइरसको सङ्क्रमणबाट बच्न लकडाउन चलिरहेका बेला काठमाडौं उपत्यकामा छाडा छोडिएका गाईकाे उद्धार गरिएकाे छ । उपत्यकामा छाडा छाेडिएका ४० वटा गाई (बाच्छासमेत) लाई आश्रय दिने अभियान सुरु भएको छ ।

पशुपति क्षेत्र विकास कोष र बतास फाउन्डेसनको सहकार्यमा छाडा गाई र बाच्छा संरक्षण अभियान सुरू गरिएको हो ।

सोमबार काठमाडौंको बालाजुदेखि काभ्रेको धुलिखेलसम्म गरी साे संख्याका गाई र बाच्छाकाे उद्धार गरिएको बतास फाउन्डेसनका अध्यक्ष आनन्दराज बतासले जानकारी दिए ।

उद्धार गरिएका गाईलाई त्रिभुवन अन्तर्राष्ट्रिय विमानस्थलको उत्तरी कुनामा रहेको कागेश्वरी मनोहरा नगरापालिका– ८ स्थित गोठाटारको बागमती किनारको चौरमा राखिएको छ ।

सोमबार गाईको उद्धारमा फाउन्डेसनका अध्यक्ष बताससहित पशुपति क्षेत्र विकास कोषका अध्यक्ष डा. प्रदीप ढकाल, कोषाध्यक्ष डा. मिलन थापा पनि ट्रक चढेर काभ्रेसम्म पुगेका थिए ।

फाउन्डेसनका अध्यक्ष बतासले भने, गाईको उद्धारमा जाँदै गर्दा बाटोमा मान्छेकै पनि उद्धार गर्‍याैँ, लकडाउनका कारण बाटाेमा दर्जनौँ बटुवा घर फर्किंदै गरेकाे भेट्यौँ । उनीहरूले पनि हामीलाई गाईको उद्धारमा सघाए, हामीले उनीहरूलाई ट्रकमा हालेर सिन्धुली छेउसम्म पुर्‍याइदियौँ ।

कोषले यही २६ चैतदेखि उपत्यकाका सडकमा छोडिएका गाई उद्धार गर्ने कार्य अघि बढाएको थियो । बतास फाउन्डेसनका अध्यक्ष बतासका अनुसार केही दिनभित्रै ५ सय गाई बाच्छाको उद्धार गरिनेछ।

उपत्यकासहित काभ्रेको बनेपा, धुलिखेललगायत क्षेत्रमा पालिएका गाई फार्मले गाईका बाच्छा जन्मिए केही दिनमा पशुपतिवरपरको क्षेत्रमा लगी छोड्ने गरेका छन् ।

बाच्छी जन्मिए राख्छन् र बाच्छा जन्मिए केही महिनामै पशुपति एवं बागमती किनारमा छोडिदिन्छन् । कतिपय गाई पनि छाडा छोडिएको हुन्छ । यसबाट सडक दुर्घटना बढ्ने गरेको पाइएकाे छ ।

संविधानमा गाईलाई राष्ट्रिय जनावरका रूपमा उल्लेख गरिएको छ । वैदिक सनातन हिन्दु धर्मअनुसार गाईलाई गौमाताका रूपमा पुजिन्छ । शास्त्रीय रूपमा गरिने प्रत्येक शुभकर्ममा गाईदानकाे महत्त्वका बारेमा समेत उल्लेख गरिएको छ ।

गाईको यही महत्त्वका कारण कोष र फाउन्डेसनलगायत संस्थाको सहकार्यमा छाडा छोडी सडकमा अलपत्र गाई बाच्छा उद्धार अभियान सुरु भएको हो । लकडाउन सकिएपछि यहाँ जम्मा भएका गाई बाच्छालाई गोठाटारिस्थत कोषको जग्गामा व्यवस्थित गरिने मौखिक सहमतिसमेत भएको छ ।

स्थानीय तहले आफ्नो क्षेत्रका गाई बाच्छा दर्ता गर्ने व्यवस्था गरेर छाडा छोडेको पाएमा सेवा सुविधा कटौती गर्नुपर्ने माग अभियानकर्मीले गरेका छन् । बन्दाबन्दीमा सडकमा छोडिएका छाडा गाईले खान नपाएका कारण पनि यस्तो अभियान सुरु गरिएको फाउन्डेसनका अध्यक्ष बतासले बताए ।

प्रकाशित मिति: सोमबार, वैशाख १, २०७७ २२:५५