कोरोना जोखिम : उमेरका आधारमा मात्र हेरिनुहुन्न

A+ A A-

नेपालमा कोरोना संक्रमितको संख्या १४ पुगेको छ । सोमबार स्वास्थ्य तथा जनसंख्या मन्त्रालयको कोभिड- १९ सम्बन्धी अपडेटका क्रममा प्रवक्ता डा. विकास देखकोटाले नेपालमा थप २ जनामा कोरोना भाइरसको संक्रमण देखिएको बताए ।

आज राष्ट्रिय जनस्वास्थ्य प्रयोगशालामा गरिएको परीक्षणमा २ वटा केस पोजिटिभ आएको छ । कैलाली जिल्लाको लम्की चुहा नगरपालिकाको क्वारेन्टाइनमा रहेकी ६५ वर्षीया महिलाको नमुना परीक्षण गर्दा राष्ट्रिय जनस्वास्थ्य प्रयोगशालामा परीक्षण गर्दा पोजिटिभ आएको हो , उनले भने, त्यसैगरी, रौतहट जिल्लाको क्वारेन्टाइनमा रहेका १९ वर्षीय पुरुषमा पनि नतिजा पोजिटिभ आएको छ । क्वारेन्टाइनबाट अस्पताल लैजाने प्रक्रिया सुरु भएको छ । यसरी हाल नेपालमा संक्रमितको संख्या १४ पुगेको छ ।

सरकारले परीक्षणको दायरा बढाएसँगै संक्रमितको संख्या पनि बढ्दै गएको छ । आइतबार मात्र ३ जनामा कोरोना भाइरसको संक्रमण पुष्टि गरेको मन्त्रालयले सोमबार थप २ जनामा कोरोना संक्रमण भेटिएको जानकारी दिएको हो । प्रयोगशाला विधिबाट ५ हजार ६ सय ९१ वटा र आरडीटी विधिबाट ५ हजार २ सय ९१ वटा गरी कुल १० हजार ९ सय ८४ परीक्षण गर्दा १४ जनाको कोरोना पोजिटिभ देखिएको हो ।

नेपालमा कोरोना भाइरसका पहिलो संक्रमित चीनबाट फर्केका युवक हुन् । उनमा ९ माघमा संक्रमण पत्ता लागेको थियो । उनी अहिले संक्रमणमुक्त भइसकेका छन् । त्यसको ठीक २ महिनापछि दोस्रो संक्रमित भटिए । फ्रान्सबाट फर्केकी १९ वर्षीया किशोरीमा ९ चैत कोरोना पत्ता लाग्यो । उनी कतारको दोहा हुँदै ४ चैतमा नेपाल आएकी थिइन् ।

त्यस्तै, तेस्रो संक्रमित यूएईबाट फर्किएका ३२ वर्षीय युवा हुन् । उनमा १२ चैतमा कोरोना संक्रमण पत्ता लागेको थियो । चौथो संक्रमित यूएईबाटै फर्किएका ३४ वर्षीय युवामा १४ चैतमा पत्ता लागेको थियो ।

पाँचौँ संक्रमित बेल्जियमबाट फर्किएकी १९ वर्षीया किशोरीमा १५ चैतमा पत्ता लागेको थियो । उनी र दोस्रो संक्रमित एकै विमान चढेर नेपाल उत्रिएका थिए ।

छैठौँ संक्रमित फ्रान्सबाट कतार हुँदै फर्किएकी बागलुङकी ६५ वर्षीया महिलाको २० चैतमा पत्ता लागेको थियो । उनी र पाँचौँ संक्रमित एकै दिन एउटै विमानमा आएका थिए । उनीहरू कतारको दोहा हुँदै कतार एअरवेजको क्यूआर ६५२ को विमानबाट नेपाल आएका थिए ।

सातौँ, आठौँ र नौँ संक्रमित २२ चैतमा भटिएका थिए । १ जना संक्रमित भारतको मुम्बईबाट फर्किएका कैलालीका २१ वर्षीय पुरुष र अर्का संक्रमित भारतको उत्तराखण्डबाट फर्किएका कञ्चनपुरका ४१ वर्षीय पुरुष हुन् । नवौँ संक्रमित यसअघि कैलालीमा संक्रमित भेटिएका पुरुषकी भाउजू नाता पर्ने कैलालीकी ३४ वर्षीया महिला हुन् ।

त्यसपछि १ सातासम्म कुनै संक्रमित भेटिएका थिएनन् । ३० चैतमा भने पर्साको वीरगञ्जमा थप ३ जनामा कोरोना संक्रमण देखियो । आइतबार पुष्टि भएका ३ जना नै भारतीय नागरिक रहेको र उनीहरू वर्ष ३७, ५५ र ४४ का पुरुषहरू रहेको मन्त्रालयले जनाएको छ ।

त्यसको भोलिपल्टै, १ वैशाखमा थप २ व्यक्तिमा कोरोना संक्रमण भएको पुष्टि भएको हो । लम्की चुहाकी ६५ वर्षीया महिलाको रिपोर्ट पोजिटिभ आएको हो भने रौतहटमा रहेका १९ वर्षीय पुरुषमा पनि नतिजा पोजिटिभ आएको मन्त्रालयले जनाएको छ ।

अहिले १३ संक्रमितको देशका विभिन्न अस्पतालमा उपचार भइरहेको छ । सबैभन्दा धेरै ५ जनाको सेती प्रादेशिक अस्पतालमा उपचार भइरहेको छ । ३ जनाको वीरगञ्जको नारायणी अस्पतालमा, २ जनाको बागलुङको धौलागिरि अस्पतालमा र २ जनाको काठमाडौंको शुक्रराज ट्रपिकल तथा सरुवा रोग अस्पतालमा उपचार भइरहेको छ ।

सोमबार नै संक्रमित भेटिएका रौतहटका १९ वर्षीय युवकलाई अस्पताल ल्याउने तयारी भइरहेको स्वास्थ्य मन्त्रालयका प्रवक्ता देवकोटाले बताएका छन् ।

नेपालमा हालसम्म कोरोना संक्रमण देखिएकामध्ये धेरै युवा अवस्थाका छन् । ४० वर्षभन्दा कम उमेरका १० जना छन् भने ४० पार गरेका ४ जना । ४० वर्ष पार गरेका व्यक्ति कोरोना संक्रमणको उच्च जोखिममा रहन्छन् । उमेर बढी, विभिन्न किसिमका दीर्घ रोग भएका व्यक्तिमा कोरोना भाइरसको असर बढी हुने विश्व स्वास्थ्य सङ्गठनको भनाइ छ ।

लन्डनस्थित इम्पेरियल कलेजले गरेको अध्ययन उद्धृत गर्दै बीबीसीले जनाएअनुसार संंक्रमित व्यक्तिको मृत्यु हुनुमा उसको उमेरमा पनि निर्भर रहने गरेको छ । अध्ययनकर्ताहरूका अनुसार जो वृद्ध र पहिलादेखि नै अन्य रोगबाट ग्रस्त व्यक्तिलाई कोरोना संंक्रमणबाट सबैभन्दा बढी खतरा हुन्छ ।

कलेजको अध्ययनअनुसार ८० वर्षभन्दा माथि उमेरका व्यक्तिको मृत्युदर १० गुणा बढी छ भने ४० वर्षमुनिका व्यक्तिमा त्यस्तो दर निकै कम छ । बेलायत सरकारको मुख्य चिकित्सा सल्लाहकार प्रोफेसर क्रिस ह्विटी वृद्ध व्यक्तिलाई बढी खतरा रहेको स्वीकार्दै वृद्ध व्यक्तिलाई कोरोनाको सामान्य लक्षण मात्रले पनि खतरा बढाइदिने बताउँछन् ।

उनका अनुसार कोरोनाले युवालाई असर नगर्ने भन्ने विलकुलै होइन, कतिपय युवा आईसीयूमा पुगिसकेका छन् । कोरोनाको खतरालाई उमेरका आधारमा मात्र हेरिनु गलत हुने उनको भनाइ छ ।

चीनमा पहिलो पटक कोरोना भाइरसको संकमित ४४ हजार व्यक्तिमाथि विश्लेषण गर्दा मधुमेह, उच्च रक्तचाप, स्वासप्रस्वाससम्बन्धी रोग भएका व्यक्तिको मृत्यु ५ गुणा बढी रहेको पत्ता लागेको थियो ।

यद्यपि, संसारका विभिन्न क्षेत्रमा अलगअलग प्रकारका मानिसमा यस भाइरसका कारण कति खतरा छ भन्नेबारे अहिलेसम्म कुनै अनुसन्धान भने भएको छैन ।

यस भाइरसको संक्रमण बालबालिकामा भने न्यून देखिएको छ । बालबालिकामा पनि कोरोना भाइरसको संक्रमणका कारण निमोनियको लक्षण देखिएको अन्तर्राष्ट्रिय सञ्चार माध्यमहरूले विज्ञलाई उद्धृत गर्दै समाचार सम्प्रेषण गरेका छन् । केही विज्ञहरूले प्रतिरोधात्मक क्षमता बढी भएका कारण कोरोनाले वयस्कलाई जस्तो बालबालिकालाई प्रभाव पार्न नसकेको भनाइ राखेका छन् ।

अहिलेसम्म बालबालिकामा जोखिम नदेखिए पनि यसबारे अनुसन्धान भने भइरहेको छ । विगतमा कोरोना भाइरसको परिवारको रूपमा रहेका सार्स, मर्स जस्ता भाइरसको संक्रमणको असर पनि बालबालिकामा कम देखिएको थियो ।

प्रकाशित मिति: सोमबार, वैशाख १, २०७७ १९:२५