राहत बाँड्दा नेकपाकाे झण्डा देखाइनु लज्जास्पद हाे

A+ A A-

किरण चौलागाईं राप्रपा सुनसरीका प्रवक्ता हुन् । सुनसरी जिल्लामा कोरोना भाइरसको त्रास, यसको अवस्था र यसविरुद्ध सरकारी अभियानमा राप्रपाको सहयोगलगायतका विषयमा सुनसरी राप्रपाका प्रवक्ता चौलागाईंसँग शिलापत्रकर्मी नवराज कुँवरले गरेको कुराकानीः

कोरोना भाइरसविरुद्धको युद्धमा स्थानीय सरकारलाई कसरी सघाइरहनुभएको छ ?

हामीले संस्थागतभन्दा पनि व्यक्तिगत रूपमै सहयोग गरिरहेका छौँ । विभिन्न स्थानीय तहमा हाम्रा पार्टीका अग्रज, नेता तथा कार्यकर्ताले राहत कोषमा सहयोग गरिरहनुभएको छ । हामीले लकडाउनको पूर्ण पालना गरेका छौँ भने स्थानीय सरकारहरूको राहत कोषमा सहयोग पनि गरिरहेका छौँ ।

संस्थागत सहयोग नगर्नुको कारण ?

हामीले संकटका बेला सहयोग गर्‍यौँ भनेर अरु दलजस्तो देखाउन चाहेका छैनौँ । यो बेला लकडाउनको पालना गर्नु पनि सरकारलाई सहयोग गर्नु नै हो । हामीले राहत कोषमा सहयोग गर्दा सामाजिक सञ्जालमा फोटो हाल्ने र पार्टीको नाम उल्लेख गर्ने काम गरेका छैनौँ ।

अरुले चाहिँ गरेका छन् र ?

छन् नि । मेरो घर सुनसरीको बराहक्षेत्र नगरपालिका–६, चक्रघट्टीमा पर्छ । यहाँ नेकपाका मेयर छन् । कतिपय ठाउँमा राहत वितरण गर्दा नेकपाको झण्डा पनि देखाइने गरेको छ । मेयरले नगरेका होलान् । तर, उनका कतिपय कार्यकर्ताले गरिरहेका छन् । यो सस्तो लोकप्रियता हो भन्ने लाग्छ । हामी यस्तो गर्न चाहँदैनौँ ।

जिल्ला प्रवक्ता भएको हैसियतले तपाईंले विरोध गर्नु पर्दैन त ?

यो बेला विज्ञप्तिबाजी गर्दा राम्रो सन्देश जाँदैन । मेरो र हाम्रो पार्टीको राजनीति देखाउनका लागि विल्कुल होइन, सेवा र उपलब्धिका लागि हो । त्यसैले हामीले विज्ञप्ति निकालेनौँ । सबै कुरा जनताले बुझेका छन् ।

कोरोना राहत कोषमा पार्टीका नेताहरूले व्यक्तिगत सहयोग गरेका छन् भन्नुभयो, अहिलेसम्म कहाँ, कसले, कति रकम सहयोग गरे ?

यसको एकमुस्ट तथ्यांक त मसँग छैन । अहिले नै संकलन गरेर प्रचारबाजी गर्न मैले नचाहेकै हो । तर, तपाईंले इटहरी र धरान उपमहानगरपालिका, बराहक्षेत्र नगरपालिकालगायत सुनसरीका स्थानीय तहका प्रमुखसँग गएर बुझ्नु भयो भने करोडभन्दा माथि सहयोग हाम्रा पार्टीका नेता तथा कार्यकर्ताले गर्नुभएको पाउनुहुन्छ ।

राहत विपन्नका लागि हो तर धनीले राहत लिइरहेका छन् । यस्तो कार्यलाई निरुत्साहित गर्न तपाईंहरूको भूमिका खोइ ?

हामीले खबरदारी गर्ने हो, गरिरहेका छौँ । तपाईं आफैं भन्नुस् त, यसबाहेक हामी के गर्न सक्छौँ ?

विपन्नलाई राहत दिलाएको कुनै प्रमाण तपाईंसँग छ ?

मैले सुरुमै भनेँ, देखाउनका लागि हामी काम गरिरहेका छैनाैँ । यो बेला देखाउनेभन्दा पनि गरिब जनतालाई बचाउने कुरा महत्त्वपूर्ण हो । त्यसैले तपाईंलाई मैले प्रमाण पेस गर्न सक्दिनँ । अब प्रमाण नभएको भनेर तपाईंले पत्याउनु भएन भने यो मेरो समस्या होइन ।

खै त, तपाईंको बराहक्षेत्र सबै घुमेर म यहाँका स्थानीयसँग कुरा गरिरहेको छु, कसैले तपाईं र राप्रपाको नाम लिएनन्, तपाईंले भनेको कुरा कसरी पत्याउने ?

मैले अघि नै पनि भनेँ कि हामीले क्रेडिट लिनका लागि यो सब गरिरहेका छैनौँ । राहत दिँदा राप्रपाले दिएको भनेका छैनौँ । व्यक्तिगत रूपमा प्रदान गरिरहेका छौँ । म आफैँ पार्टीको जिल्ला प्रवक्ता हुँ । तर, मैले राहत वितरण गर्दा राप्रपाको तर्फबाट भनेका छैनौँ । किनकि, यो समय स्वार्थ साँध्ने हुँदै होइन ।

कोरोना भाइरसविरुद्ध जनचेतना अभिवृद्धि गर्न तथा आमनागरिकलाई सहयोग गर्न त संस्थागत सक्रियता चाहिँदैन र ?

अवश्य चाहिन्छ । हामी छलफल गरिरहेका छौँ । तर, हाम्रो प्रयास र काम भनेको देखाउनका लागि मात्र हुनु हुँदैन भन्ने मेरो भनाइ हो । कसैले देखाउनका लागि भए पनि गरौँ भन्छ भने त्यसमा मेरो रिजर्भेसन रहन्छ । जनता बाँचे भने नेता र पार्टीको कुरा हुन्छ, जनता नै बाँचेनन् भने नेताको के काम ?

तपाईंको जानकारीअनुसार कोरोना भाइरस र यसको प्रकोपको अवस्था सुनसरी जिल्लामा कस्तो छ ?

म यसबारे विभिन्न स्थानीय तहका नगर र गाउँ कमिटीका प्रमुखसँग प्रत्येक घण्टा जानकारी लिइरहेको छु । यसका लागि मैले एउटा ग्रुप नै क्रिएट गरेको छु जहाँ सुनसरी जिल्लाका स्थानीय तहका पार्टी प्रमुखहरू संलग्न हुनुहुन्छ । अहिलेसम्म कसैलाई पनि कोरोना पुष्टि भएको छैन जुन राहतको विषय हो । धेरै स्थानीय तहमा विदेशबाट आउनेलाई क्वारेन्टाइनमा राखिएको छैन, यो जोखिमको विषय हो । म स्थानीय तहका प्रमुखहरूलाई आग्रह पनि गर्न चाहन्छु कि विदेशबाट आएकाहरूलाई क्वारेन्टाइनमा राख्न ढिला नगरौँ ।

त्यसो त, झापाको हल्दीबारी गाउँपालिकाबाट पनि यस्तो गुनासो आइरहेको छ, त्यहाँ त तपाईंकै पार्टीको नेतृत्वमा सरकार छ त ?

तपाईंलाई गलत जानकारी प्राप्त भएको हुन सक्छ । हल्दीबारी गाउँपालिकाका अध्यक्ष रवीन्द्र लिङ्देनले सामाजिक दूरी र स्वास्थ्य हेरचाहको दृष्टिमा निकै सतर्कता अपनाउनुभएको छ । विदेशबाट आएका नागरिकलाई क्वारेन्टाइनमा राख्नका लागि विभिन्न विद्यालय तथा खाली रहेका भवनहरूलाई क्वारेन्टाइनका रूपमा विकास गर्ने काम भइरहेको छ ।

पहाडी जिल्लाबाट सुनसरीका विभिन्न ठाउँमा थुनिएका विद्यार्थीहरूलाई राहत दिने काममा तपाईंहरूको पहल खोइ त ?

तपाईंले महत्त्वपूर्ण कुरामा ध्यानाकर्षण गराउनुभएको छ । यसमा म आजै हाम्रा पार्टीका साथीहरूसँग कुरा गर्छु । विद्यार्थीहरूको उद्धार तथा राहतका लागि हामी अब खट्ने कुरामा प्रतिवद्धता जनाउन चाहन्छु ।

प्रकाशित मिति: शुक्रबार, चैत २८, २०७६ १६:१०