नियमित कारोबार नहुने बैंक खातामा पैसा छ ? छिटो झिक्नुस्

नेपाल राष्ट्र बैंकको पुरानो भवन

A+ A A-

तपाइले कुनै बैंक तथा वित्तीय संस्थामा खोलेको खाताबाट नियमित कारोबार गरिरहनु भएको छैन र खातामा पैसा छ भने अब तपाइसँग २ विकल्प हुनेछन् ।

पहिलो विकल्प त त्यस्तो खातामा कारोबार नियमित गर्ने गर्नुस् । यदि त्यसो गर्न सम्भव छैन वा मन लागेको छैन भने त्यस्तो खाताको पैसा झिक्नुस् । किनभने नियमित कारोबार नहुने खाता निष्कृय गर्न नेपाल राष्ट्र बैंकले नै बैंक तथा वित्तीय संस्थाहरुलाई निर्देशन दिएको छ ।

तर, केही दिन वा महिना कारोबार नगरेकै भरमा तपाइको बैंक खाता निष्कृया हुने भने होइन । तीन बर्षसम्म पनि तपाइले खोलेको खाताबाट कुनै कारोबार गर्नुभएन भने मात्रै बैंक खाता निष्कृय हुने हो । राष्ट्र बैंकले बैंक तथा वित्तीय संस्थाहरुलाई तीन बर्षसम्म कारोबार नभएका खाता मात्रै निष्कृय गर्न निर्देशन दिएको छ ।

यसरी निष्कृय भएको खातामा रहेको तपाइको पैसा नै भुस हुने भने होइन । तपाइले निवेदन दिएमा सम्बन्धित बैंक तथा वित्तीय संस्थाले फेरि सक्रिय गराइदिनेछ ।

तीन बर्षको यस्तो व्यवस्था बचत खाताको हकमा मात्रै हो । कल र चल्ती खाताको हकमा भने बेग्लै व्यवस्था गरिएको छ । कल र चल्ती खाता ६ महिनासम्म कारोबारमा नआए त्यस्ता खातालाई पनि निष्कृया गर्न राष्ट्र बैंकले निर्देशन दिएको छ ।

निष्कृय भएका चल्ती र कल खाता पनि निवेदन दिएर सक्रिय गराउन भने पाइनेछ । बैंकमा खाता खोल्नेको संख्या धेरै देखिने तर नियमित कारोबार हुने बैंक खाताको संख्या कम देखिएपछि राष्ट्र बैंकले यस्तो व्यवस्था गरिएको जानकारी दिएको छ । निष्कृय बैंक खाताको फरक ढंगले गणना गरिने राष्ट्र बैंकको भनाइ छ ।

यस्तै प्राथमिकता प्राप्त क्षेत्रमा जाने कर्जामा पनि कडाइ गरिएको छ । राष्ट्र बैंकले बैंकहरुलाई आफ्नो कुल कर्जा लगानीको २५ प्रतिशत रकम अनिवार्य रुपमा तोकिएको प्राथमिकता प्राप्त क्षेत्रमा जानै पर्ने भनेको छ । बैंकहरुले प्राथमिकता प्राप्त क्षेत्रमा कर्जा प्रवाह बढाउनुको साटो केही रकम जरिवाना तिरेर अटेर गर्न थालेपछि राष्ट्र बैंक कडा रुपमा प्रस्तुत हुन थालेको हो ।

तोकिएको क्षेत्रमा तोकिए अनुसार कर्जा प्रवाह नभए ऋणमा लिने अधिकतम ब्याज बराबर जरिवाना तिराउने राष्ट्र बैंकको भनाइ छ । राष्ट्र बैंकले कृषि क्षेत्रमा १० प्रतिशत र उर्जा तथा पर्यटनमा १५ प्रतिशत गरी २५ प्रतिशत रकम प्राथमिकता प्राप्त क्षेत्रमा कर्जा दिनै पर्ने व्यवस्था गरेको छ ।

प्रकाशित मिति: शुक्रबार, चैत ८, २०७५ ०५:३१