लगानी सम्मेलनको तयारी कमजोर भयोः पूर्वअर्थमन्त्री डा. महत

A+ A A-

प्रमुख प्रतिपक्षी दल नेपाली कांग्रेसका नेता एवम् पूर्व अर्थमन्त्री डा. रामशरण महतले लगानी सम्मेलन गर्नु आवश्यक रहेको स्पष्ट पारेका छन् ।

‘मुलुकको विकास र समृद्धिको लागि विदेशी लगानी आवश्यक छ, त्यसैले सरकारले आयोजना गर्न लागेको लगानी सम्मेलन स्वागतयोग्य छ, तर यसको लागि जति तयारी र छलफल गर्नुपर्ने थियो, त्यो भएको छैन,’ रिपोर्टस क्लबले आयोजना गरेको साक्षात्कारमा बोल्दै डा. महतले भने ।

उनले विदेशी लगानी ल्याउने प्रक्रियाको सुरुवात पूर्वप्रधानमन्त्री गिरिजा प्रसाद कोइरालाले नै सुरु गरेको दाबी गरे । कोइरालाले उदार आर्थिक नीति ल्याएर आधुनिक नेपालका लागि ठूलो काम गरेको पनि बताए ।

‘लगानी सम्मेलनको आयोजना खुशीको कुरा हो, सम्मेलन सफल होस्, विदेशी लगानी नबढाई मुलुक विकास हुन सक्दैन,’ डा. महतले भने ।

विदेशी लगानी आकर्षणको लागि सरकारले केही पूर्व आवश्यकत्ताहरु पूरा गर्नुपर्ने उनको सुझाव छ । नयाँ कानुनहरु पारित भएपनि विदेशी लगानीको लागि नेगेटिभ लिष्ट पहिलेभन्दा लामो बनाईएको महतको आरोप छ ।

महतले औद्योगिक, कृषिलगायतका क्षेत्रमा विदेशी लगानी ल्याउन जरुरी रहेको सुनाए ।

‘उद्योग–धन्धा, जलस्रोत तथा पूर्वाधारको क्षेत्रमा लगानी गर्न जरुरी छ, लगानीको लागि ऐन, कानुनहरु बनाएर मात्रै हुदैन, यी सबै कुराहरु अब व्यवहारिक रुपमा लागू गर्नुपर्छ, मिठा र राम्रा कुरा गरेर हुँदैन्,’ उनले थपे ।

महतले विदेशी लगानी भित्र्याउनको लागि पहिले नेपालका सडकहरु, विमानस्थललगायत पूर्वाधारको विकास र स्तरोन्नती गर्नुपर्ने पनि सुझाए । तर, सरकार अदक्ष भएको र कुनै पनि कुरामा दक्षता नदेखाएको महतको आरोप छ ।

त्यस्तै, उनले लगानी सम्मेलनको लागि प्रशासनिक तथा व्यवस्थापकीय पाटो पनि चुस्तदुरुस्त बनाउनुपर्नेमा जोड दिए । एकद्धारा प्रणाली लागू गरिएको भनेर प्रधानमन्त्री केपी शर्मा ओलीले दाबी गरेपनि कुनै काम गर्दा दर्जनौं कार्यालयहरु धाउनुपर्ने बाध्यता रहेको गुनासो उद्योगी तथा व्यवसायीहरुले सुनाउने गरेको डा. महतले बताए । उनले पछिल्लो समय भ्रष्टाचार बढेको दाबी पनि गरे ।

‘सरकारले पहिलो कुरा सुशासन कायम गर्नुपर्छ, अहिलेपनि सरकारले दिने सुविधा लिनै मुश्किल छ, कानून बनाएर मात्रै हुँदैन्, कार्यान्वयनमा जानुपर्छ,’ उनले भने ।

तीन वर्ष पहिले काठमाडौंमा भएको लगानी सम्मेलनको स्मरण गराउँदै उनले उक्त सम्मेलनबाट आएको प्रतिबद्धता अनुसार लगानी नआएकोमा अब सरकारले गम्भीर समीक्षा गर्नुपर्ने धारणा राखे ।

‘के कति कारणले प्रतिबद्धता अनुसार लगानी आएन ? यसबारेमा समीक्षा गर्नुपर्छ, त्यतिवेला मैले पनि ‘कि–नोट स्पिच’ दिएको थिएँ, १४ खर्बको प्रतिबद्धता आएको थियो, तर अहिलेसम्म त्यो प्रतिबद्धताको एक ‘फ्याक्शन’ पनि लगानी आएको छैन,’ उनले थपे ।

फरक प्रसँगमा उनले आफू गुट तथा उपगुटको पक्षमा नरहेको स्पष्ट पारे ।

‘पार्टीका आन्तरिक कुराहरु बाहिर धेरै गर्न जरुरी छैन, म गुटको पक्षमा छैन,’ महतले भने । उनले गुटभन्दा माथि उठेर पार्टीलाई चलाउनुपर्ने धारणा राखे ।

‘सरकारले यति धेरै गल्तीहरु गरिरहेको छ, यसमा प्रतिपक्षीको भुमिका प्रभावकारी हुनुपर्दथ्यो, तर, हुन सकेको छ्रैन, यो दुःखदायी कुरा हो,’ डा. महतको भनाइ छ । पार्टीको महासमिति बैठक र जिल्ला सभापतिहरुको कुरालाई पार्टी नेतृत्वले तत्काल सम्बोधन र कदर गर्नुपर्ने पनि डा. महतले जोड दिए ।

प्रकाशित मिति: शुक्रबार, चैत ८, २०७५ ०५:०६