सुदूरपश्चिम सरकारले विपन्न परिवारलाई ३ हजार राहत दिने

A+ A A-

सुदूरपश्चिम प्रदेश सरकारले अति विपन्न, असहाय तथा ज्यालादारी गरी निर्वाह गर्ने मजदुरको परिवारका लागि राहत प्याकेज ल्याएको छ ।

बिहीबार बसेको प्रदेश सरकारको मन्त्रिपरिषद्को बैठकले अति विपन्न, असहाय र ज्यालादारी मजदुरका परिवारलाई ३ हजार रुपैयाँका दरले राहत वितरण गर्न १६ करोड बजेट छुट्याएको हो ।

यस्तै, बैठकले कोरोना भाइरस (कोभिड–१९) को उपचारमा खटिने स्वास्थ्यकर्मीको बीमामा १५ लाख दिने निर्णय गरेको छ । प्रदेशमा कार्यरत स्वास्थ्यकर्मीलाई थप १५ लाख र सञ्चारकर्मीलाई १५ लाखको बीमा गर्ने निर्णय गरिएको प्रदेश सरकारका प्रवक्ता शाहले जानकारी दिए ।

मन्त्री शाहका अनुसार (कोभिड–१९) को राहत कोष सञ्चालन तथा वितरण मापदण्ड स्वीकृत गर्नुका साथै प्रदेशमा फाल्गुन मसान्तभित्र बुझाउनुपर्ने कर शुल्क र दस्तुरको अवधि वैशाखसम्म गर्ने निर्णय पनि गरिएको छ ।

सबै जिल्ला प्रशासन कार्यालयलाई ५ लाख रुपैयाँका दरले र नेपाली सेना, सशस्त्र प्रहरी र नेपाल प्रहरीका लागि १५ लाखका दरले व्यवस्थापनका लागि रकम उपलब्ध गराइने प्रदेश सरकारका प्रवक्ता शाहले जानकारी दिए ।

२० वटा भेन्टिलेटर खरिद गर्दै प्रदेश सरकार

मन्त्रिपरिषदको बैठकले सुदूरपश्चिमका जिल्ला अस्पतालका लागि २० वटा भेन्टिलेटर खरिद गर्ने निर्णय गरेको छ । बैठकले सबै जिल्ला अस्पतालका लागि २० वटा भेन्टिलेटर खरिद गर्ने निर्णय गरेको हो ।

प्रदेश सरकारका प्रवक्ता शाहले जिल्ला अस्पतालका लागि २० वटा भेन्टिलेटर खरिद गर्ने निर्णय गरेको जानकारी दिए । विश्वव्यापी महामारीका रूपमा फैलिएको कोरोना भाइरसका गम्भीर बिरामीको उपचारका लागि भेन्टिलेटर अति आवश्यक भए पनि सुदूरपश्चिमका अस्पतालमा अभाव छ ।

अहिले सेती प्रादेशिक अस्पतालमा दुईवटा भेन्टिलेटरसहित पाँच शय्याको आईसीयू सेवा सञ्चालनमा रहे पनि कोरोनाका बिरामीलाई उपचार गर्न नमिल्ने भएकाले थप दुईवटा खरिदको प्रक्रिया थालिएको छ । महाकाली अस्पतालमा पनि एउटा भेन्टिलेटर रहेकोमा १ वटा खरिदको प्रक्रिया थालेको जनाइएको छ ।

प्रकाशित मिति: बिहीबार, चैत २७, २०७६ २०:४९