पोखरा महानगरद्वारा क्षेत्रीय अस्पताललाई ‘प्रेसर वाटर स्प्रे’ प्रदान

A+ A A-

कोरोना संक्रमण फैलिन नदिन पोखरा महानगरपालिकाले पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पताललाई ‘प्रेसर वाटर स्प्रे’ मेसिन प्रदान गरेको छ ।

पोखरा महानगरपालिकाका प्रमुख मानबहादुर जिसीले पोखरा स्वास्थ्य विज्ञान प्रतिष्ठानका निर्देशक डा. अर्जुन आचार्यलाई उक्त मेसिन हस्तान्तरण गरेका हुन् । मेसिनबाट अस्पतालमा भित्रिने र बाहिरिने व्यक्ति तथा सवारीसाधनलाई समेत स्प्रे गरिने महानगरपालिकाले जनाएकाे छ ।

अस्पतालमा धेरै मान्छेहरू आउजाउ हुने भएकाले संक्रमण फैलिन नपाओस् भन्ने उद्देश्यले ‘प्रेसर वाटर स्प्रे’ मेसिन अस्पताललाई प्रदान गरिएको प्रमुख जिसीले बताए । ‘अस्पताल संवेदनसील ठाउँ हो, यहाँ मानिसहरूको आउजाउ धेरै हुने भएकाले सुरक्षित बनाउन स्प्रे मेसिन प्रदान गरेका हौँ,’ उनले भने, ‘स्प्रेको प्रयोगबाट कोरोना भाइरसलाई १० मिनेटमा मार्न सक्छ ।’

उनले पोखरा महानगरमा आउने कर्मचारीलगायत सबैलाई समेत स्प्रे गर्ने गरी मेसिन सञ्चालन गरिएको बताए । ‘अहिले महानगरमा मान्छे धेरै आउँदैनन्, हस्पिटलमा मानिसहरूको चाप हुने भएकाले सुरक्षित गर्न मेसिन प्रदान गरिएको हो,’ उनले भने, ‘महानगरले प्रदान गरेकाे मेसिन भोलिबाटै सञ्चालनमा आउने विश्वास गरेको छु ।’

स्वास्थ्य विज्ञान प्रतिष्ठानका निर्देशक प्राडा. अर्जुन आचार्यले अस्पताललाई सुरक्षित बनाउन महानगरले गरेको सहयोग प्रशंसनीय रहेको बताए । उनले कोरोनाको संक्रमणलाई जित्न सबैको सहयोग र सहकार्य आवश्यक रहेको बताए ।

मन्टेश्वरी एसाेसिएसनकाे सहयोग

पोखरा महानगरले स्थापना गरेको राहत कोषमा मन्टेश्वरी एसाेसिएसन कास्कीले ५५ हजार ५ सय ५५ रुपैयाँ सहयोग गरेको छ । मन्टेश्वरी एसाेसिएसन कास्कीका अध्यक्ष मिलन केसीले बिहीबार महानगर प्रमुख मानबहादुर जिसीलाई चेक हस्तान्तरण गरिन् । संकटको बेला महानगरलाई साथ सहयोग गर्नु आफ्नो जिम्मेवारी र दायित्व भएको बताउँदै उनले कोरोना संक्रमण फैलिन नदिन सबै सतर्क र सचेत बन्नुपर्नेमा जोड दिइन् ।

महानगर प्रमुख जिसीले संकटका बेला सक्दो सहयोग गर्नुपर्नेमा जोड दिँदै कोरोना संक्रमणलाई रोक्न एकद्वार प्रणालीमार्फत राहत वितरण गरिएको बताए ।