कोरोना कोषमा नेकपाका सांसद र मन्त्रीबाहेकका नेताको योगदान शून्य

A+ A A-

विश्वव्यापी महामारीको रूपमा रहेको कोरोना भाइरस (कोभिड– १९) को जोखिमलाई लक्षित गर्दै सरकाले स्थापना गरेको कोरोना भाइरस संक्रमण रोकथाम, नियन्त्रण तथा उपचार कोषमा सत्तासीन नेकपाका सांसद र मन्त्रीबाहेक अन्य नेताको अहिलेसम्म व्यक्तिगत तथा संस्थागत कुनै पनि उपस्थिति देखिएको छैन ।

प्रधानमन्त्री तथा मन्त्रिपरिषद कार्यालयका अनुसार अहिलेसम्म कोषमा १ अर्ब ८८ करोड ३५ लाख रकम जम्मा भइसकेको छ । तर, सत्तामा रहेको नेकपाले भने अहिलेसम्म काेषमा रकम सहयोग गरेको छैन । त्यसो त राष्ट्रपति विद्यादेवी भण्डारीले पनि १० चैतमै आफ्नो २ महिनाको तलब कोरोना कोषलाई दिने औपचारिक घोषणा गरेकी थिइन् । राष्ट्रपतिकाे तर्फबाट आउने भनिएकाे सहयाेगसमेत अहिलेसम्म काेषमा जम्मा हुन सकेकाे छैन ।

सहयोगका लागि किसानदेखि व्यापारीसमेत जुर्मुराइरहँदा देशकै ठूलो दल नेकपाले भने सहयोग गर्ने कुरामा अझै निर्णय गर्न सकेको छैन ।

किसानदेखि ठूला व्यापारी र प्रहरीदेखि ठूला कर्मचारीबाट सहयोग जुटिरहेको बेला पदमा बसेकाहरूले भने सहयोग गर्न कन्जुस्याइँ गरेको देखिन्छ ।

कोष कार्यालयका प्रवक्ता राजेन्द्रकुमार पौडेलका अनुसार कोषमा रकम जम्मा गर्नेमा बैंक तथा वित्तीय संस्थाहरू अगाडि छन् । दिन्छु भनेर घाेषणाा गरेकाे सहयाेग रकम २० दिन बित्न लाग्दासमेत अहिलेसम्म काेषमा जम्मा हुन नसकेकाे उनकाे भनाइ छ ।

पूर्वराजाले आफ्नाेतर्फबाट हिमानी कोषमार्फत २ करोड रूपैयाँ जम्मा गरिसकेका छन् । त्यस्तै, चौधरी फाउन्डेसनले १ करोड, नेपाली कांग्रेसे ५० लाख, विभिन्न संघसंस्थाबाट ५ करोड, नेपाल आयल निगमबाट ५० करोड, बैंक तथा वित्तीय संस्थालगायतबाट १ अर्ब ८८ करोड रूपैयाँ कोषमा जम्मा भइसकेको छ ।

संसद सचिवालयले भने नेकपाका १९५ जना सांसदको समेत सेवासुविधामा कटौती गरेर १ करोड १ लाख ३२ हजार ८ सय रुपैयाँ जम्मा गरिसकेको छ । तर, सो रकम बैंकमार्फत कोषमा भने जम्मा भई नसकेको कोषले जनाएको छ ।

राप्रपालगायतका दलले पनि कोषमा रकम जम्मा गरेका छन् ।

सम्भावित आर्थिक संकटलाई मध्यनजर गर्दै सरकारले प्रहरीहरूको तलबबाट पनि पैसा कटौती गर्ने नीति ल्याइरहँदा सबैभन्दा ठूलो पार्टी नै सहयोगका लागि अगाडि बढेको देखिँदैन ।

नेकपा प्रवक्ता नारायणकाजी श्रेष्ठ पार्टीकाे तर्फबाट कोषमा रकम जम्मा गर्ने विषयमा निर्णय भइनसकेको बताउँछन् ।

नेकपाकाे तर्फबाट संसदमा प्रतिनिधित्व गर्ने नेताको भने संसद सचिवालयमार्फत सहयोग रकम जम्मा भइसकेको छ ।

अहिलेसम्म अर्थ मन्त्रालयबाट ११ लाख ९६ हजार ८१, रक्षा मन्त्रालयबाट २ लाख ६७ हजार, प्रधानमन्त्री तथा मन्त्रिपरिषद कार्यालयबाट १७ लाख ७ हजार ७ सय ७४, पर्यटन विभागबाट १ लाख १० हजार १ सय ४० रुपैयाँ कोषमा जम्मा भएको छ ।

संघीय मामिला तथा सामान्य प्रशासन मन्त्रालयले ९ लाख ६१ हजार १ सय ६२ र वाणिज्य आपूर्ति तथा उपभोक्ता संरक्षण विभागबाट १ लाख ९४ हजार ८ सय ८४ रुपैयाँ कोरोना कोषमा जम्मा भएको छ ।

प्रकाशित मिति: बिहीबार, चैत २७, २०७६ १४:५८