‘लकडाउन’ उल्लंघन गर्दै हाट बजार सञ्चालन

A+ A A-

विश्वव्यापी रूपमा फैलिएको कोरोना भाइरस (कोभिड–१९)को संक्रमण फैलिन नदिन सरकारले आह्वान गरेको लकडाउन ग्रामीण क्षेत्रमा लागू हुन सकेको छैन । सामाजिक दूरी कायम राख्न सरकारले पटक–पटक आग्रह गरे पनि ग्रामीण क्षेत्रमा भने निर्वाध रूपमा साप्ताहिक हाट बजार लाग्नुका साथै भीडभाडसमेत हुने गरेको छ ।

मोरङकाे कटहरी–नयाँ बजारमा लकडाउनकाे समयमा पनि साप्ताहिक हटिया लागेको छ । नयाँ बजार मात्र नभएर सरकारले आह्वान गरेको लकडाउनलाई बेवास्ता गर्दै हरेक दिन ग्रामीण क्षेत्रमा हटिया लाग्ने गरेको छ । जहाँ सयौँ मानिसको भीड हुने गरेको छ ।

यसरी निर्वाध रूपमा लाग्ने हटियाका कारण कोरोनाको जोखिम बढेर गएको छ । लकडाउनका बारेमा राम्ररी जानकारी नहुँदा पनि ग्रामीण क्षेत्रमा हटिया लाग्ने गरेको हाे ।

ज्याला मजदुरी गरेर जीविकोपार्जन गर्दै आएकाहरूलाई काम गर्न जान पाइँदैन भन्ने मात्र ज्ञान छ । हटियामा भेटिएकी स्थानीय डुम्कीदेवी राजवंशीले लकडाउनबारे आफूलाई जानकारी नभएको बताइन् । रोगबारे सामान्य कुरा सुने पनि राजवंशीले कोरोना कस्तो रोग भनेर थाहा नभएको बताइन् ।

‘खाेई भीड नगर्नु भन्ने सुनेकी छु । किन गरेको थाहा छैन । सागसब्जी त खानैपर्‍यो’ उनले भनिन्, ‘सबै हटिया आएकाे देखेर म पनि आएँ ।’

हटियामा आएका व्यापारी र उपभोक्तालाई प्रहरीले हटाउने प्रयास गरे पनि उनीहरू जबर्जस्ती बसेका थिए । दैनिक उपभोग्य सामग्री सकिएकाले खरिद गर्न हटिया आउनुपरेको धनपालथान–१ का शम्भु मण्डलले बताए ।

उनले नुन, तेल, दाल चामललगायतका खाद्यान्न सामग्री किनमेल गर्नका लागि बाध्य भएर बजार आएको बताए । लकडाउनपछि दैनिक ज्यालादारी गर्ने वर्ग काममा जान सकेका छैनन् ।

आर्थिक अभावका कारण खाद्यन्नलगायतका अन्य अत्यावश्यक सामान जोहो नगरेका कारण हटियामा किन्नुपरेको उनीहरू बताउँछन् ।

सागसब्जी किन्न हटिया आउनुपरेको जहदा–४ की अगरबती राजवंशीले बताइन् ।

ग्रामीण क्षेत्रमा लाग्ने साप्ताहिक हटिया अझै रोकिएको छैन । सरकारले तेस्रो पटक लकडाउनको समयावधि थपेको छ । लकडाउनको समयमा घरमै बस्न सरकारले आग्रह गर्दै आएको छ । लकडाउन आफ्नै लागि हो भनेर आमजनताले नबुझेसम्म कोरोनाको जोखिम न्यूनीकरणका लागि सरकारले अघि सारेका योजना योजनामै सीमित हुने सरोकारवालाले बताएका छन् ।

प्रकाशित मिति: बुधबार, चैत २६, २०७६ १३:१६