दराजले अत्यावश्यक सामग्री घरदैलोमै पुर्‍याउने गर्‍यो घोषणा

A+ A A-

नेपालको अग्रणी अनलाइन बजार दराजले आवश्यक वस्तुहरू काठमाडौं उपत्यकाभित्र डेलिभरी गर्न सुरु गर्ने घोषणा गरेको छ। कम्पनीले बिगमार्टसँग साझेदारी गरी त्यस्तो सेवा सुरु गर्न लागेको हो ।

दराज र बिगमार्टले सरकारको अनुमतिमा उक्त साझेदारी गरी लकडाउनमा ग्राहकहरूको घरदैलोमै दैनिक आवश्यक वस्तुहरू जतिसक्दो चाँडो पुर्‍याउन तयारी गरेको बताइएको छ ।

कम्पनीका अनुसार दराजको डीमार्ट नामक किराना खण्ड बिगमार्टको अनलाइन शाखामा रूपान्तरण हुने र त्यहाँ ग्राहकहरूले आवश्यक उत्पादनहरूको अर्डर गरी घरदैलोमै सामान पाउन सक्नेछन् ।

साथै, ग्राहकहरूले बिगमार्टमार्फत उपलब्ध छुटसम्बन्धी सेवाहरू पनि उपयोग गर्न सक्नेछन् । ग्राहकहरूले दराजको बैंक पार्टनरहरूको डेबिट र क्रेडिट कार्ड प्रयोग गरी १० प्रतिशत अधिकतम ५ सय रुपैयाँसम्म छुट पाउन सक्ने दराजले जनाएको छ ।

दराजका बैंक पार्टनरहरूमा सनराइज बैंक, सनिमा बैंक, स्ट्याण्डर्ड चार्टर्ड बैंक, नबिल बैंक, एनआईसी एशिया बैंक र कुमारी बैंकहरू रहेका छन् ।

यसका साथै दराजकोे अनुभव र संसाधनहरूले उत्पादनहरू समयमै सुरक्षित तरिकाले डेलिभरी गरिने बताइएको छ । हाललाई काठमाडौं उपत्यकाभित्र मात्र डेलिभरी गरिने भए पनि कम्पनीले चाँडै नै देशका अन्य शहरहरूमा पनि आफ्ना सेवा पुर्‍याउने जानकारी दिएको छ ।

प्रकाशित मिति: मंगलबार, चैत २५, २०७६ २०:३५