चिकित्सक देवदूत हुन्, बिरामीकाे उपचारमा दिल खाेलेर लाग्नुपर्छ

A+ A A-

कोरोना भाइरसको महामारीपछि प्रदेश २ सरकारले जुन सक्रियता देखाउनुपर्ने थियाे, त्यो नदेखाएको भन्दै सरकारको निकै आलोचना भइरहेको छ । मुख्यमन्त्रीलगायत प्रदेशका मन्त्रीहरू संघीय सरकारको विरोध गरिरहेका छन् ।

प्रभावकारी रूपले प्रदेशले काम गर्न नसकेकाे सम्बन्धमा सत्तारूढ दल समाजवादी पार्टीका प्रदेश २ का उपनेता रहेका रामआशिष यादवसँग शिलापत्रका लागि सुजीतकुमार झाले गरेको कुराकानी :

अहिले तपाईंको दिनचर्या कसरी चलिरहेको छ ?

लकडाउन भएका कारण प्रायः घरमै बस्छु । अहिलेको समयमा बाहिर निस्कनु भनेको अपराध नै हो । हुन त मुख्यमन्त्रीले बोलाएका बैठकहरूमा जाने नै गर्छु तर त्यो पनि एकदमै कम । टेलिफोनमार्फत नै धेरै कुराकाे म्यानेज गरिरहेको छु । लकडाउनका कारण गरिब जनतामा खाद्यान्न समस्या देखिएको छ । अहिले आफ्नो क्षेत्रलाई केन्द्रित गरेर दातालाई खोजी गरी राहत वितरण गर्न पनि लगाइरहेको छु । धनुषाको कुम्भकरण, मतौना, चौराकोयलपुर, जनकपुरधामको स्टेसननजिकको मेस्टर टोलका केही घरमा राहत बाँड्न लगाएको छु ।

तपाईंको अध्ययन कोठामा धेरै पुस्तकहरू देखिन्छ, कस्ता पुस्तक पढ्नुहुन्छ ?

लकडाउनकाे याे अवस्थामा मेराे मेरो साथी नै यही पुस्तक बनेको छ । साथी, कार्यकर्ताहरूसँग भेटघाट बन्द गरेको छु । विल गेट्सले लेखेका द रोड इज अ हेड र प्रमुख नेताहरूको भाषण समेटेर बनाएको पुस्तक पनि पढिरहेको छु । यसमा नेल्सन मण्डेला, अटल बिहारी वाजपेयी, अब्राहम लिङ्कन, मार्टिन लुथरका भाषणहरू छन् । पत्रकारिता पृष्ठभूमि भएका कारणले पुस्तक पढ्नु पहिला पनि मेरो दिनचर्या नै हुन्थ्याे । तर, चुनाव जितेपछि अध्ययन घटेकाले पनि लकडाउनमा त्यसैकाे पूर्ति गरिरहेको छु । एउटा पुस्तक लेखनतर्फ पनि मैले कलम बढाएकाे छु ।

कस्तो पुस्तक लेख्दै हुनुहुन्छ ?

पर्यावरण र स्वच्छतामा केन्द्रित भएर पुस्तक लेखिरहेकाे छु । केही वर्षदेखि म आफैँ यस क्षेत्रमा लागेकाले त्यो अनुभवलाई पनि पुस्तकको माध्यमले बाहिर ल्याउन चाहेकाे हुँ ।

कोरोना नियन्त्रणका लागि संघीय सरकार, प्रदेश सरकार र स्थानीय तहबीच जुन समन्वय हुनुपर्ने हाे, त्यो नदेखिएको तपाईंलाई महसुस भएकाे छैन ?

जुन सत्य हो, त्यसलाई स्वीकार गर्नुपर्छ । तर, यसको मुख्य दोष संघीय सरकारकै हाे । साँचो जसकाे हातमा छ, उही नै दाेषी हाे । प्रधानमन्त्री केपी शर्मा ओली अस्वस्थ छन्, लाचार छन् । जो मन्त्री जिम्मेवार छन्, उसैले सामान ल्याउनमै पैसा खाएको धेरै कुरो बाहिर आइसकेका छन् । केन्द्रको नीतिअनुसार प्रदेश अघि बढ्ने हो । हामी त्यही रूपले काम गरिरहेका छाैँ ।

कोरोना भाइरसमा सावधानी अपनाउन प्रदेश सरकार पछि परेको भनिँदै छ नि ?

आलोचना गर्नेहरू किन गरिरहेका छन्, त्यो हामीलाई पनि थाहा छैन । तर, प्रदेश सरकारले विज्ञ चिकित्सक रहेको एउटा सल्लाहकार समिति गठन गरेकाे छ, उहाँहरूकै सल्लाहकाे हिसाबले कार्य अगाडि बढाएका छाैँ । लकडाउन सुरू भएलगत्तै विपन्न नागरिकलाई बचाउन आर्थिक प्याकेज दिइएको छ । महानगरपालिकालाई २५ लाख, उपमहानगरपालिकालाई २० लाख, नगरपालिकालाई १५ लाख र गाउँपालिकालाई १० लाख रूपैयाँ दिइएको छ । मुख्यमन्त्रीसँग हाम्रो कुरा भएको छ, आवश्यक पर्दा अरू पैसा पनि थप्न सकिन्छ । पैसाका कारणले जनतालाई हामीले मर्न दिँदैनाैँ । अरु दाताहरूसँग पनि हामीले समन्वय गरिरहेका छाैँ । त्यसको परिणाम पनि राहतमा देख्न थालिएको छ । स्थानीय तहलाई राहतमा पैसा थप्न हामीले आग्रह पनि गरेका छौँ ।

उपचारमा पछि परेको देखिएको छ नि ?

सर्जिकल सामानहरू हामीसँग छैनन् । यी सामाग्रीहरू चीन, फ्रान्स, इटालीले बनाइरहेका छन, हाल काेराेनाकै कारण पीडित ती देशहरूसँग पनि ती सामग्री अभाव भएको अवस्था सबैलाई जानकारी नै छ । फेरि हामीले सिधै विदेशबाट मगाउन सक्दैनाैँ । त्यसका लागि संघीय सरकारले अग्रसरता देखाउनुपर्छ । पहिलोपल्ट चीनबाट सामान ल्याउँदा कति भ्रष्टाचार भयो, कति विवाद भयो, सबैले देखिसकेका छन् । यसमा पीपीई, टेष्टिङ किट, भेन्टिलेटर, पीसीआरको आवश्यकता हुन्छ । यसका लागि प्रदेश सरकारले विभिन्न निकायसँग समन्वय गरिरहेको छ । प्रदेश २ मा कोरोनाबाट बच्न खासगरी अस्पताल नै बनाउने तयारी भइरहेको छ । अहिले प्रदेश सरकार चैत महिनामा बाहिरबाट कोको आएका छन्, स्थानीय तहसँग समन्वय गरेर तथ्यांक लिइरहेको छ । टेस्ट बढीभन्दा बढी गर्ने दिशामा कार्य भइरहेको छ । काेराेना संक्रमित भेटिएमा आइसोलेसनमा राखिनेछ र ती संक्रमितकाे कन्ट्राक्ट ट्रेसिङकाे काम अगाडि बढाइनेछ । साथै, काेराेना राेकथाम र नियन्त्रणमा गाउँ, शहर र टाेलटाेलमा कडाइ गरिनेछ ।

मुख्यमन्त्री लालबाबु राउतले चिकित्सकहरूलाई धम्की नै दिने गरेका छन्, यो धम्कीका कारण कति चिकित्सक त बिदा नै बसेका छन् । यही कारण मुख्यमन्त्रीको आलोचना भइरहेको छ नि ?

कोरोना भइरसको लडाइँमा चिकित्सक र स्वास्थ्यकर्मी नै सबैभन्दा अगाडि रहन्छन् । सबैलाई थाहा छ, चिकित्सकको भूमिका देवदूतजस्तै हुन्छ । तर, उपचार गर्नबाट डराउने, अस्पतालमा नआउने यो प्रवृत्ति राम्रो भएन । एउटा अभिभावकको रूपमा मुख्यमन्त्रीले सचेत गराउनुभएको छ । सबैले इमानदारीका साथ कार्य गरियो भने हाम्रो काेराेनाविरूद्धकाे हाम्राे लडाइँमा जीत सुनिश्चित छ । कारोनाविरुद्ध विजयी हुनेछाैँ ।

उपचारका क्रममा लगाउने पाेशाक त सरकारले उपलब्ध गराउनुपर्ने हाे नि !

हामी सबै सुविधा दिलाउन लागिपरेका छौँ । प्रदेश सरकार अहिले सबै कार्य छोडेर यसैमा लागिपरेकाे छ । स्वास्थ्यकर्मीले सर्दी, ज्वरोका बिरामी देख्नेबित्तिकै भागिहाल्ने, अरु बिरामीको उपचार नै नगर्ने भएपछि यसको आलोचना हुनैपर्छ, गर्नैपर्छ । जो अगाडि आएका छन्, त्यसलाई हामीले सम्मान पनि गरिरहेका छाैँ ।

मुख्यमन्त्री राहत कोषमा नेपाली कांग्रेसले ४० लाखभन्दा बढी रूपैयाँ सहयाेग दिएको छ तर राहत काेषमा पैसा जम्मा गर्न सत्तारुढ दल संघीय समाजवादी पार्टी र राष्ट्रिय जनता पार्टी नै उदासीन देखिएका छन् भनिन्छ नि ?

हाम्रो पार्टीका राष्ट्रिय अध्यक्ष उपेन्द्र यादवले सुरूमै १० लाख रूपैयाँ राहत कोषमा दिनुभएकाे छ । त्यस कारण यस्तो छैन । फेरि हामी अरुसँग समन्वयसमेत गरिरहेका छौँ । बैंकहरूसँग हामीले कुरा गरेर राहत कोषमा पैसा राख्न लगाइरहेका छौँ ।

प्रकाशित मिति: मंगलबार, चैत २५, २०७६ २०:२८